Yoosoma anyu enrowa okhala sai? Yoonyoonya wala yoohakalaliha? Eyo enlipa vanceene ni nyuwo. Nrowe niwehe moota mukhale anyu oowiiriha yoosoma anyu okhala yoohakalaliha.

Mmuthanleke Biibiliya oororomeleya ni onirumeela moolumo ookhweya. Khuuvo mutthu oniphavela osoma etthu erina moolumo oovila, ahinisuweliwa ni a khalai. Nto mmuthanleke Biibiliya onirumeela moolumo okhweya wiiwexexa ni onivara murima. Nave muhaana omwaavya Biibiliya otaphuleliwe saana ni oororomeleya. *

Murumeeleke etekonologia. Olelo-va, Biibiliya onniphwanyaneya oowimpirimiriwa ni eletroniko. ABiibiliya akina aniphwanyaneya munternetini, nto pooti waasoma wala waabaxari wira mukhalane mukomputatoreni, taableti wala selulari. ABiibiliya akina eletroniko aakhalana ireferensia sinrowa wookhaliheryani osoma iversiikulu sikina sinilavula mwaha mmosaru. Akhala wira onoosivelani onwiriyana ohiya omusoma, onniphwanyaneya Biibiliya ookravariwa. Atthu anceene onaasivela onwiriyana audio a Biibiliya ari ene mukaaroni, okathi anivara aya miteko sa vate wala okathi anivara aya miteko sikina siniweemererya owiriyana etthu. Munoonela sai weererya malakiheryo awo?

Mutokoseke. Sookhala itthu sinceene sinrowa wookhaliheryani ottottela mureerelo yoosoma anyu. Mwa ntakiheryo, maapha a ilapo sinilavuliwa mBiibiliyani animookhaliheryani oweha opuro siiraneyale aya itthu munisoma anyu. Eyo ennikhaliherya yoosoma okhala yoohakalaliha. Etthu ekina ekhanle oowookhaliheryani ori osoma myaha sa mBiibiliyani siri va jw.org mpantta oni “Sowiixuttiha sa Biibiliya”.

Murumeeleke inamuna soovirikana. Niireke munnixanka vaavo munuupuwela anyu omusoma Biibiliya otheene? Khivanitthuneya nyuwo omusoma okhuma wanipacerya, nyuwo pooti opacerya omusoma Biibiliya mipantta seiye sinoosivelani. Mwa ntakiheryo, munoonela sai waasoma atthu anilavuliwa vanceene mBiibiliyani? Nyuwo pooti orumeela ekaaxa eni: “ Musuwele Oratteene Makhalelo a Atthu Anilavuliwa Vanceene MBiibiliyani”, ekaaxa eyo enimoovahani malakiheryo ooloka. Nave, nyuwo pooti omusoma Biibiliya moovarihana ni myaha wala moota itthu siiraneyale aya. Munoonela sai otthara malakiheryo ala?