Wahala Oopacerya 28:1-21
28 Davidi aahaathukumanya makhulupale ootheene a wIsarayeli, oYerusalemu: makhulupale a mahimo, makumantanti a ikurupu sanvarela muteko mwene, maxeefi a atthu 1.000, maxeefi a atthu 100, ale yaaweherya mireerelo sootheene ni inama sa mwene vamosa ni anaawe, makhulupale a opalaasio wa mwene ni alopwana ootheene ootupa ni oowerya.
2 Moottharelana, mwene Davidi aaheemela onahimya wiira:
“Mukiwiriyane, axinnaka ni atthu aka. Etthu kaaphavela aka ni murima aka wootheene, waari oteka empa wiira ekhale opuro waarowa aya opwehiwaka nivuku na nivarihano na Yehova ni opuro Muluku ahu aarowa awe opweheryaka inawu sawe, tivo koolokiherya itthu sootekana.
3 Masi Muluku eekeekhai ookihimeerya wiira: ‘Nyuwo khamunrowa oteka empa erina nsina naka, okhala wiira moowana ikhotto sinceene ni moowiiva atthu anceene’.
4 Yehova, Muluku a Isarayeli, ookithanla eriyari ya atthu ootheene a etthoko ya paapa aka wiira kikhale mwene a atthu a Isarayeli mahiku ootheene. Owo oomuthanla Yuda wiira okhale muhooleli, nave nihimo na Yuda oothanla etthoko ya paapa aka, vano eriyari ya anamwane a paapa aka, ookithanla wiira kikhale mwene a atthu ootheene a Isarayeli.
5 Tthiri Yehova ookivaha anamwane anceene, nto eriyari ya anamwane awo ootheene, oomuthanla mwanaka Salomoni wiira okilaathi veehiceni ya Yehova, aalamuleleke atthu a Isarayeli.
6 “Owo ookihimeerya wiira: ‘Mwaninyu, Salomoni, tonrowa okitekela empa ni nivate naka, okhala wiira koomuthanla wiira okhale mwanaka, nave miyo kinrowa okhala paapa awe.
7 Miyo kinoolipiha omwene awe mahiku ootheene, akhala wiira onimwiiwelela sooruma saka ni onootthara ikano saka, ntoko oniira awe vano’.
8 Vano kinoohimeeryani ohoolo wa atthu ootheene a Isarayeli, nloko na Yehova, ni ohoolo wa Muluku wiira: Mphaveleke osuwela ni wiiwelela oratteene sooruma sootheene sa Yehova, Muluku anyu, wiira muhihiye okhala elapo ela yooreera ni mwaavahe aniinyu ntoko etthu yoohiyeriwa mahiku ootheene.
9 “Nto nyuwo mwanaka Salomoni, mmusuwele Muluku a paapa anyu ni mmurumeeleke ni murima anyu wootheene ni okumi anyu wootheene, okhala wiira Yehova onnitokosa mirima sootheene ni onnisuwela miyuupuwelo sootheene. Vakhala wiira munomphavela, owo onimweemererya wiira mumphwanye, masi vakhala wiira munoomuhiya, owo onimookhoottani mahiku ootheene.
10 Musuwelexe wiira Yehova ohoothanlani wiira muteke empa enrowa okhala opuro woowaarya. Mulipe murima ni mpaceryeke ovara muteko”.
11 Vano Davidi aahinvaha mwanawe Salomoni edeseenyu ya moota waarowa aya okhala mukhora ni ipa saya, opuro waarowa osukiwaka itthu, moota yaarowa aya otthunyeliwa, moota saarowa aya okhala isaala sa muhina ni empa ya mukuttho onikhuneela etampi.
12 Owo aahinvaha-tho edeseenyu ya itthu sootheene aasuwelihiwe awe ni Muluku, seiyo saarowa okhala vate va empa ya Yehova, mapuro ootheene yaalyiwa yaarukurenrye empa eyo, empa yaasukiwa mihakhu sa Muluku eekeekhai ni empa ya mihakhu sa itthu saakhalihiwe soowaarya.
13 Nave-tho aahinvaha malakiheryo a ikurupu sa anamukuttho ni alevi, a miteko sootheene saarowa ovariwaka empa ya Yehova ni mireerelo sootheene saarowa ovareliwaka muteko empa ya Yehova.
14 Nave aahiphima olemela wa eweero, eweero yootheene yaarowa opakeliwa mireerelo saarowa ovareliwaka miteko, olemela wa mireerelo sootheene sa eparatha, ni mireerelo sootheene saarowa ovareliwaka miteko.
15 Aahiphima olemela wa mithuko sa eweero ni ixamaniya saya sa eweero, olemela wa mithuko soovirikana ni ixamaniya saya, ni olemela wa mithuko sa eparatha, moovarihana ni muteko waarowa aya ovareliwaka khula muthuko ni ixamaniya saya.
16 Nave-tho aahiphima eweero ya khula meesa a iphaawu saavahiwa Muluku, olemela wa khula meesa a eparatha,
17 ikarfu, itixela ni ixaaru sa eweero yooreerexa, vamosa ni olemela wa khula itixela saamukhaani sa eweero. Nave aahiphima olemela wa khula itixela saamukhaani sa eparatha.
18 Nave-tho aahiphima olemela wa eweero yooreerexa yaarowa otekeliwa altaari a nsenso,* ni yaarowa otekeliwa ethoonyeryo ya ekaaro, eyo piiyo, makerubi a eweero, yaawo yaatapuruxiwe mapupha aya akhuneela nivuku na nivarihano na Yehova.
19 Davidi aahihimya wiira: “Yehova ookivaha osuwela wiira kilepe moota itthu sootheene sinrowa aya okhala”.
20 Vano Davidi aahimuleela mwanawe Salomoni wiira: “Mulipe murima ni mwiilipihe, mpaceryeke ovara muteko. Muhoove, nnakhala muhithukumele, okhala wiira Yehova Muluku, Muluku aka, onrowa okhala ni nyuwo. Owo khonrowa woohiyani nnakhala woonyanyalani, masi owo onrowa okhala ni nyuwo mpakha omaliha muteko wootheene wooteka empa ya Yehova.
21 Sookhala ikurupu iya sa anamukuttho ni alevi, yaawo anrowa ovaraka muteko wootheene wa empa ya Muluku eekeekhai. Nave mookhalana anamuteko owiivahererya ni anisuwela ovara miteko soovirikana, aakhala-tho makhulupale ni atthu ootheene yaawo anrowa ottharaka malakiheryo anyu ootheene”.
Inoota
^ Aahiiso, “erupani”.
