‘SHaaramuxiyoogaa muleera agganaadan’ Xoossay koyiyoogaa Geeshshaa Maxaafay yootees. (1 Tasalonqqe 4:3) “SHaaramuxiyoogaa” giya qaalay Geeshsha Maxaafan wodiraa laammiyoogaa, mattuman issi mala gidida asati mattumaa gayttiyoogaa, aqo oyqqibeenna attumaageenne maccaara mattumaa gayttiyoogaa qonccissees.

•  Coo issippe deˈin woy aqo oyqqin Xoossaa qofissii? Aybissi?

•  Issoy issuwaara maayettanaakkonne giidi aqo oyqqanaappe kase issippe deˈiyoogaa xeelliyaagan shin?

•  Azinaynne machchiyaa bantta aqo deˈuwaa minttanawu waatana danddayiyoonaa?

•   Aqo deˈuwaa giigissidaagee Xoossaa. I koyro asata azinanne machcho oottido wode aqo deˈuwaa doomissiis. (Doomettaabaa 2:22-24) Issi attumaageenne maccaara aqo oyqqennan issippe deˈanaadan I koyibeenna.

•   Asawu aybi kehakko Xoossay erees. I keettaa asay ubbay goˈettanaadaaninne qohiyaabaappe naagettanaadan aqo deˈuwan issi attumaageenne maccaara mule shaahettennan issippe deˈanaadan halchchiis. Ane issi leemisuwaa beˈa. Issibaa waati waaxanaakko hegaa giigissidaageeti yootidobay maaddiyoogaadan, Xoossay immiyo kaaletoy so asaa issippetettay minnanaadan ay oottana bessiyaakko qonccissees. Xoossaa maaraa kaalliya uri awudekka goˈettees.—Isiyaasa 48:17, 18.

•   Aqo oyqqennan mattumaa gayttiyaageeti darotoo iita metuwan geloosona. Leemisuwawu, koyennan shahaaranaadan, mattuma gayttiyoogan yiya harggiyan oyqettanaadan, ba mooruwan keehi zilˈˈettanaadan oottees. a

•   Xoossay attumaageetinne maccaageeti mattumaa gayttiyoogan naata yelanaadan oottiis. Xoossay deˈuwaa geeshshabadan xeellees, qassi naata yeliyoogee alˈˈo imota. Xoossay nuuni aqo deˈuwaa giigissuwaa bonchchiyoogan he imotaakka bonchchanaadan koyees.—Ibraawe 13:4.

 Aqo deˈuwan ufayttanawu maacettennan amarida wodiyaa issippe deˈiyoogee maaddenna. SHin, aqo oyqqidaageeti issippe deˈanawu murttiyaabanne metuwaa xoonanawu issippe oottiyaaba gidikko, aqo deˈoy minnees. b Aqo laggeti maacettikko, haratuppe aaruwan shaahettennan deˈana danddayoosona.—Maatiyoosa 19:6.

 Wottiyoobi baynna aqo deˈoy baawa. Gidoppe attin, aqo oyqqidaageeti Xoossaa Qaalan deˈiya zoriyaa oosuwan peeshshikko, eta aqo deˈoy minnana danddayees. Amarida leemisota beˈa:

•   Nebaappe aaruwan ne aqo laggiyaabaa qoppa.—1 Qoronttoosa 7:3-5; Piliphphisiyuusa 2:3, 4.

•   Issoy issuwaa siiqitenne bonchchite.—Efisoona 5:25, 33.

•   Haasayiyooban naagettiyoogaa meezeta.—Leemiso 12:18.

•   Danddayanchcha gida, qassi sohuwaara atto ga.—Qolasiyaasa 3:13, 14.