Bollan malaata wottiyoogee Geeshsha Maxaafan Wogaabaa 19:28 xallan qoncciis; he xiqisee, “Cachchaa malaataa intte bollan kessoppite” yaagees. Xoossay Israaˈeela asawu ha azazuwaa yootidoy, eeqa xoossatu sunttaa woy malaataa bantta bollan cadissida, eta heeran deˈiya asatuppe haakkanaadan koyido gishshataassa. (Zaarettido Wogaa 14:2) Kiristtaaneti Israaˈeelatussi imettida Higgiyawu haarettana xayikkonne, he higgiyan deˈiya maaraa loytti qoppana koshshees.

Kiristtaaneti bantta bollan malaataa cadissana koshshii?

 Kaallidi deˈiya Geeshsha Maxaafaa xiqiseti neeni hegaa akeekanaadan maaddana danddayoosona:

•   ‘Maccaasay bessiyaagaadan banttana alleeqissona.’ (1 Ximootiyoosa 2:9, 10) Ha maaray attuma asawukka macca asawukka hanees. Nuuni haratussi siyettiyaabaa bonchchana bessees; qassi asay nuna bessenna ogiyan xeellanaadan oottana koshshenna.

•   Issooti issooti issi citan deˈiyoogaa woy bantta bollan koyidobaa oottanawu banttassi maatay deˈiyoogaa bessanawu bollan malaataa wottoosona. SHin Geeshsha Maxaafay nuna hagaadan giidi minttettees: ‘Intte intte asatettaa Xoossaa ufayssiya deˈonne [‘akeekan qoppido,’ NW] geeshsha yarshsho oottidi, Xoossawu shiishshite.’ (Roome 12:1) Neeni bollan malaataa wottanawu koyido gaasuwaa eranawu ‘akeekan qoppa.’ Hegawu gaasoy bollan malaataa wottiyoogee keehi erettidaba woy neeni issi citaa yame gidiyoogaa erissanaassa gidikko, guyyeppe ne qofay laamettikkonne malaatay mule laamettennaagaa hassaya. Yaatanaadan nena denttettidabaa eriyoogee loˈˈobaa kuuyanawu nena maaddana danddayees.—Leemiso 4:7.

•   “Mino oosanchchaa halchchoi dureyees; shin eesotiya ubbai hiyyeesana.” (Leemiso 21:5) Daroti yuushshi qoppennan bollan malaataa wottoosona, shin hegee asay etabaa qoppiyoobaa moorees, qassi oosuwaa demmanawukka metana danddayees. Hegaa bollikka, bollan cadissido malaataa xayssiyoogee keehi sakkananne daro miishshaa qanxxissana danddayees. Xinaateti, qassi bollan wottido malaataa xayssiyo zalˈˈee daroti bantta bollan malaataa wottidoogan zilˈˈettidoogaa bessoosona.