Dure bitaneenne Alˈˈaazari, Yesuusi yootido issi taarikiyan etabaa medhdhi ekkidi odido asata. (Luqaasa 16:19-31) He taarikiyan, Yesuusi naaˈˈu citan deˈiya asatubaa yootanawu eta goˈettiis; hegeetikka: (1) Yesuusa wode deˈida, Ayhuda haymaanootiya kaalettiya otorettiya asata, qassi (2) Yesuusi tamaarissidobaa ammanida ashkke asata.

Ha huuphe yohuwan

•  Dure bitaniyabaanne Alˈˈaazarabaa Yesuusi woygidee?

•  Ha taarikee tumuppe hanidabee?

•  Ha taarikee siˈooliya tamaa timirttiya kaafiyabee?

•  Dure bitaniyanne Alˈˈaazara taarikiya birshshettay aybee?

 Yesuusi Luqaasa shemppo 16n, eta hanotay muleera laamettido naaˈˈu asatubaa qonccissiis.

 Yesuusi yootido taarikee qanttan hagaadaana: Issi dure bitanee ishaluwan deˈiis. Alˈˈaazara giyo issi woossiyagaa, dure bitaniya penggen ehiidi wottidosona; I dure bitaniya masoofiyappe laalettiya qumay bawu imettanaadan koyiis. Guyyeppe, Alˈˈaazari hayqqin, kiitanchchati A tookkidi, Abrahaama baggi aattidosona. Dure bitaneekka hayqqidi moogettiis. He taarikiyan, naaˈˈu asatikka hayqqi simmidi, hanettiyabaa eriyabadan odettiis. Hayqqida dure bitanee eexxiya taman qaxxayettidi, kushiya biradhdhiyappe xokkiya haattan A inxxarssaa irxxissanaadan Alˈˈaazara kiittana mala Abrahaama oychchiis. Abrahaami dure bitanee oychchidobaa oottibeenna, qassi eta naaˈˈaa hanotaykka muleera laamettidoogaanne eti issoy issuwakko pinnennaadan gita aafoy eta gidduwan merettidoogaa yootiis.

 Hanidaba gidenna. Hagee Yesuusi issibaa tamaarissanawu koyidi yootido leemiso. Hagee leemiso gidiyogaa eranchchatikka yootoosona. Leemisuwawu, 1912n attamettida Lutera Geeshsha Maxaafan issi sima huuphe yohoy hegee leemiso gidiyogaa yootees. Qassi, Kaatooliketu Jerusalem Baybilee, tohossa qofan, hagee “deˈon deˈida asabaa gidennan leemisuwan odettida taarike” gidiyogaa yootees.

 Yesuusi ha taarikiyan hayquwappe simmin deˈiya deˈuwabaa yootidee? I issi issi asay hayqqidi siˈooliya taman waayettiyogaa, qassi Abrahaaminne Alˈˈaazari saluwan deˈiyogaa yootidee? He taarikiyan odettida darobati hanotay hegaadaana gidennaagaa bessoosona.

 Leemisuwawu:

•   Dure bitanee tumuppe eexxiya taman qaxxayettiidi deˈiyakko, Alˈˈaazara biradhdhiya xeeran deˈiya haattaa, tamay melissi aggennee?

•   Haattay melennaba gidiyakkokka, he dure bitanee taman waayettiyagaa biradhdhiyappe issitoo xokkiya haattay irxxissanee?

•   He taarikee odettido wodee gakkanawu, ooninne saluwa bibeennaagaa Yesuusi yootido gishshawu, Abrahaami waanidi saluwan deˈana danddayii?—Yohaannisa 3:13.

 Gidenna. Hagee tumu hanida taarike gidana xayikkonne, issoti issoti ha qofay loˈˈo asay saluwa biyogaanne iita asay siˈooliya taman qaxxayettiyogaa bessiyaba giidi palamettoosona. a

 Hegaadan qoppiyogee bessiyabee? Chii.

 Siˈooliya tamaabaa tamaarissiyobay hayqqidaageetu hanotaabaa Geeshsha Maxaafay yootiyobaara maayettenna. Leemisuwawu, Geeshsha Maxaafay hayqqida loˈˈo asa ubbay saluwan ufayssan deˈees woy iita asay siˈooliya taman xuugettees geenna. Ubba, Geeshsha Maxaafay, “Paxa de7iya asati issitoo haiqqanau de7iyoogaa eroosona; shin haiqqidaageeti aibanne erokkona” yaagees.—Eranchchaa 9:5.

 He taarikee, naaˈˈu citan deˈiya asaa hanotay keehippe laamettanaagaa bessees.

 Dure bitanee “miishsha dosiya” Ayhuda haymaanootiya kaalettiyageetu leemiso. (Luqaasa 16:14) Eti Yesuusi yootiyobaa siyikkonne, hegaa eqettidosona. Haymaanootiya kaalettiya he asati hara coo asaa karoosona.—Yohaannisa 7:49.

 Alˈˈaazari, Ayhuda haymaanootiya kaalettiyageeti eta kariyo Yesuusi tamaarissiyobaa ammanida asaa leemiso.

 Naaˈˈu citan deˈiyageetu hanotaykka muleera laamettiis.

•   Ayhuda haymaanootiya kaalettiyageeti Xoossay banttana nashshees giidi qoppidosona. Eti Yesuusi tamaarissiyobaa ammanenna gishshawu, Xoossay etanne eta goynuwa ixxees; hegee eti hayqqidosona giyogaa mala. Qassi, Yesuusinne I kiittidoogeeti tamaarissiyobay eti waayettanaadan oottiyaba.—Maatiyoosa 23:29, 30; Oosuwaa 5:29-33.

•   Haymaanootiya kaalettiyageeti daro wodiyawu kariiddi takkido coo asati haˈˈi ufayttoosona. Daroti Yesuusi tamaarissido, Geeshsha Maxaafay yootiyobaa ammanidi hegaappe goˈettiiddi deˈoosona. Haˈˈi, eti merinawu Xoossan sabettana danddayiyo injjee deˈees.—Yohaannisa 17:3.