He oyshaa zaaroy aybakko shaˈan qoodettiya layttawu asay eribeenna. He wodetun, wurssiya harggee miilooniyan qoodettiya asaa woriis. SHin guyyeppe, saynttistteti he harggee waati oyqqiyaakko tumaa eridosona. Harggiyawu darotoo bakiteeriyaanne bayresiya mala, ayfiyan beettenna jarmeti gaaso gidiyoogaa eti akeekidosona. Hegaabaa tumaa eridoogee asaa harggiyaappe pattanawunne akkamanawu maaddiis; hegaappe denddidaagan, miilooniyan qoodettiya asay daro wodiyawu payyatettan deˈana danddayiis.

Hara keehi koshshiya oyshati shin? Kaallidi deˈiya oyshatu zaaruwaa demmiyoogee nena waati maaddanee?

• Xoossay oonee?

• Yesuus Kiristtoosi oonee?

• Xoossaa Kawotettay aybee?

• Sinttappe aybi hananee?

Miilooniyan qoodettiya asati he oyshatu zaaruwaa eridoogan bantta deˈuwan daro maaduwaa demmidosona. Neenikka hegaa zaaruwaa eriyoogan goˈettana danddayaasa.

Neeni, ‘Ubbabaa xeelliyaagan tumaa waata demmana danddayiyaanaa?’ gaada oychchana danddayaasa. Qassi darobaa xeelliyaagan tumaa demmiyoogee yaa metiyaabaa milatana danddayees. Aybissi?

Daro asay kawotettatinne, zalˈˈe woy oduwaa dirijjiteti tumaa odana giidi ammananawu metootees. Issi uri odiyoobay tumakkonne woy coo A qofaakko, woy bagga tumakkonne woy mule worddokko shaakki eranawu asay metootees. Asay issoy issuwaa ammanenna gishshawunne daro odoy worddo gidiyo gishshawu, tumay aybakko, ubba qassi A goˈˈay aybakko asay maayenna.

Metiya hegaa malabay deˈishinkka, deˈuwan nu oychchiyo keehi koshshiya oyshatu tumu zaaruwaa demmana danddayoos. Waatidi? Darin koshshenna oyshatu zaaruwaa demmanawu oottiyoogaa malabaa oottiyoogaana.

Nuuni tumaa demmanawu galla galla pilggiyo issi issi hanotati deˈoosona. Jesiki hanotaabaa qoppa. A, “Ocholonee ta naˈeeyyo sifenna; ubbaa qiiba ocholoniyaa ta naˈiyaa miikko O worana danddayees” yaagaasu. Hegaa gishshawu Jesika issibaa shammanaappe kase ba naˈiyo qohiyaabaa gidennaadan loytta xeellada shammawusu. A hagaadan gaasu: “Ubbaappe kasetada taani he qumay aybippe giigidaakkonne qonccissiya xaafettidabaa nabbabays. Qassi gujjada hegaabaa pilggays; ubbaa qassi qiiba ocholoneekkonne walahettibeennaagaa shaakka eranawu hegaa giigissiya paabirkkaa oychchays. He paabirkkay giigissidobay tumukka ammanttiyaakkonne eranawu hara naqaashaa demmanawu pilggays.”

Galla galla ne deˈuwan neeni oychchiyo oyshatu tumu zaaruwaa demmanawu koyiyo koshshay Jesikiigaadan keehi qofissiyaaba waayi gidana; shin Jesika oottidoogaadan neeni ne oyshatu zaaruwaa demmanawu kaallidi deˈiyaaba oottana danddayaasa:

• Tuma gididabaa shaakka.

• Gujjada pilgga.

• He qofaa pulttoy ammanttiyaakkonne loytta era.

Yaatiyoogee deˈuwan neeni oychchiyo keehi koshshiya oyshatu zaaruwaa demmanaadan maaddees. Waatidi?

Jesika Geeshsha Maxaafaa tumaa koyiyo wodekka, ba naˈiyo qohiya quma qommuwaa shaakka eranawu oottidobaara issi malabaa oottaasu. A hagaadan gaasu, “Loyttada nabbabidoogeenne minnada pilggidoogee taani Geeshsha Maxaafaa tumaa eranaadan maaddiis.” Jesikiigaadan, miilooniyan qoodettiya asay kaallidi deˈiya oyshatubaa Geeshsha Maxaafay woygiyaakko eriis:

• Nuuni merettidoy aybissee?

• Asay hayqqiyo wode waanii?

• Metoy nuna gakkiyoy aybissee?

• Xoossay metuwaa ubbaa xayssanawu oottanabay aybee?

• Soo asaa deˈuwan waani ufayttana danddayiyoo?

Geeshsha Maxaafaa nabbabiyoogaaninne jw.org web saytiyan gujjada pilggiyoogan he oyshatunne hara oyshatu tumu zaaruwaa demmana danddayaasa.