Xoossaa Qaalaappe Tamaara
Xoossay Kumetta Saˈaa Haariya Kawotetta Essanee?
Ha huuphe yohoy neeni oychidoba gidana danddayiya oyshatu zaaruwaa qonccissees; qassi he zaarota Geeshsha Maxaafan awan demmana danddayiyaakko yootees. Yihoowa Markkati he zaarota nenaara tobbanau ufayttoosona.
1. Kumetta saˈaa haariya kawotettay asaa naatussi koshshiyoy aybissee?
Ha wodiyan asaa naata metiyaabay darotoo alame yuushuwan deˈees. Issi issi biittan daro asay hiyyeesa, qassi huqqunnettidi deˈees. Hara biittan qassi daro asay keehi ishalidi deˈees. Saˈaa aquwaa oonanne yuuˈennan ubbau gattana danddayiyay kumetta saˈaa haariya kawotetta xalla.—Eranchchaa 4:1; 8:9 nabbaba.
2. Kumetta saˈaa haarana danddayiyay oonee?
Asi loytti ayssana danddayenna gishshau, issi uri kumetta saˈaa ayssana giyoogee daroti maayennaba. Ubba asay dosiyo uri baa. Qassi sunttettidi asa qohennay oonee? Issi uri asa ubbaa huqqunnidi haaranaagaa qoppiyoogee yashshiyaaba.—Leemiso 29:2; Ermmaasa 10:23 nabbaba.
Xoossaa Yihooway ba Naˈay Yesuusi asaa naata merinau haaranaadan sunttiis. (Luq. 1:32, 33) Yesuusi saˈan deˈiis. He wode, sahettidaageeta pattiis, ashkketa tamaarissiis, qassi guutta naatuura wodiyaa aattiis. (Mar. 1:40-42; 6:34; 10:13-16) Yaatiyo gishshau, Yesuusi haarana danddayiya dumma Kawo.—Yohaannisa 1:14 nabbaba.
3. Kumetta saˈaa haariya kawotetti eqqana danddayii?
Xoossay ba Naˈay saluwan uttidi saˈaa haaranaadan sunttiis. (Dane. 7:13, 14) Kawo gidida uri haariyo katamaa ubbaa baana koshshennaagaadan, Yesuusi asaa naata haaranau saˈaa yaana koshshenna.—Maatiyoosa 8:5-9, 13 nabbaba.
Yesuusi Kawo gidanaadan ubba asay koyanee? Akkay. I kawo gidanaadan koyiyaageeti loˈˈobaa dosiya asatu xalla. Yihooway i sunttido, siiqiya geeshsha kawuwau haarettenna asaa saˈaappe xayssana.—Maatiyoosa 25:31-33, 46 nabbaba.
4. Kumetta saˈaa Haariyaagee ay oottanee?
Henttanchay ba dorssata shiishshiyoogaadan, Yesuusi ubba deriyaappe ashkke asaa shiishshidi, Xoossaa siiquwaabaa tamaarissiiddi deˈees. (Yoh. 10:16; 13:34) He asati Yesuusaunne a haaruwau wozanappe exatoosona. (Maz. 72:8; Maa. 4:19, 20) Kumetta saˈan, Yesuusau ammanettidi haarettiyaageeti i Kawo gididoogaa issippetettan yootiiddi deˈoosona.—Maatiyoosa 24:14 nabbaba.
Yesuusi matan iita kawotettata xayssidi asaa shemppissana. I ammanettidi bana kaalliyaageetuppe amaridaageeti saluwan banaara kawo gididi saˈaa haaranaadan dooriis. (Dane. 2:44; 7:27) Yesuusa Kawotettan saˈay Yihoowa eriyoogan kumana, qassi asaa naatu taarikiyaa doomettan xayidaagaa mala gannatee zaarettidi eqqana.—Isiyaasa 11:3, 9; Maatiyoosa 19:28 nabbaba.
