Damu nga mag-asawa an talagsa la mag-istorya bisan kon magkaupod hira. Ano an mga rason?

•  Magkaupod pero magkabulag—kay ano?

•  An imo puydi himoon

•  An ginsisiring han mga mag-asawa

•  An mahimo pag-istoryahan

•   Kakapoy

   “Kon san-o may panahon kami nga mag-istorya, kon diri an akon bana an kapoy, ako naman an kapoy. Madali la ako maaringit kon kapoy ako. Gabay na la kami magkita hin TV.”—Anna.

•   Internet

   “Puydi maubos an imo panahon ha social media ngan mga kaliawan ha Internet. Bangin damu ka oras ka na nga nag-i-enjoy hito, pero waray ka pa gud makiistorya ha imo padis. Baga hin diri la gihap kamo magkaupod.”—Katherine.

•   Magkaiba nga hilig

   “Pag-uli han akon bana tikang ha trabaho, agsob nga nauubos an iya panahon ha iya mga hilig. Maduruto gud hiya magtrabaho, salit angay la nga tagan liwat niya hin panahon an iya kalugaringon. Pero unta mas damu an amon panahon nga magkaupod.”—Jane.

•   Trabaho

   “Tungod han mga gadyet makakagtrabaho la gihapon kita bisan kon aada la kita ha balay ngan kaupod an pamilya. Damu ka beses nga nagri-reply ako ha mga email ngan text parte ha trabaho imbes nga tagan na unta hin panahon an akon asawa.”—Mark.

•   Hinumdumi nga kinahanglan mo maghatag hin panahon ha imo padis, diri kon makalugar ka la.

   Prinsipyo ha Biblia: ‘Siguroha an mas importante nga mga butang.’—Filipos 1:10.

   Hunahunaa ini: Iginpapakita ba han imo mga buhat nga mas importante ha imo an iyo pag-asawa kay han imo trabaho o mga hilig? Gintatagan mo la ba hin panahon ngan atensyon an imo padis kon waray ka na ginhihimo?

   Tip: Regular nga maghimo hin plano basi magkaupod kamo nga duha ngan makakapokus kamo ha usa kag usa.

   “Nalilipay gud ako kon may ginpaplano an akon bana nga para la ha amon nga duha. Inaabat ko nga espesyal ako, ngan nag-i-enjoy hiya nga makaupod ako. Salit mas nahigugma pa gud ako ha iya.”—Anna.

•   Mahibaro pagkontrol ha paggamit han imo gadyet.

   Prinsipyo ha Biblia: “May itinanda nga panahon para ha tagsa nga butang.”—Eclesiastes 3:1.

   Hunahunaa ini: Ano kaagsob mawara an imo pokus ha imo padis tungod han mga text o notification nga imo nakakarawat?

   Tip: Pangalimbasugi nga magdungan kamo pagkaon bisan makausa la kada adlaw—ngan ayaw isapit an iyo celfon. An pangaon maopay gud nga higayon nga pag-istoryahan an iyo nahimo ha bug-os nga adlaw.

•   Kon posible, magkaupod nga buhata an iyo mga buruhaton.

   Prinsipyo ha Biblia: “An duha mas maopay kay ha usa tungod kay mas daku an ira napapahimulosan han ira pagpinaniguro ha pagtrabaho.”—Eclesiastes 4:9, footnote.

   Hunahunaa ini: Agsob ba nga diri kamo magkaupod han imo padis ha pag-asikaso han mga butang nga para ha pamilya, sugad han pamalit ha merkado?

   Tip: Magbinuligay—bisan ha mga buruhaton nga kaya buhaton han usa la ka tawo.

   “Imbes nga hunahunaon nga an pag-groseri, panhugas, pamilo hin mga bado, ngan panlimpyo ha libong mga buruhaton la ha balay, kay ano nga diri hunahunaon nga mga higayon ini basi makaupod an imo padis?”—Nina.

•   Magin reyalistiko ha imo ginlalaoman

   Prinsipyo ha Biblia: “Ipakita . . . an iyo pagkamakatadunganon.”—Filipos 4:5.

   Hunahunaa ini: Paonan-o mo maipapakita nga makatadunganon ka ha imo ginlalaoman ha imo padis?

   Tip: Pag-istorya kamo basi masabtan kon ano an kinahanglan niyo nga duha. Pagsabot kamo kon paonan-o niyo magagamit an iyo panahon basi pariho kamo malipay.

   “Makusog an akon bana, pero ako naman diri tungod kay may mga problema ako ha kahimsog. Agsob ko hiya sidngan nga gumawas ngan mag-enjoy, ngan huhulaton ko na la hiya nga bumalik. Napahuway ako ha balay kay ito an akon kinahanglan ngan hiya naman nagawas para mag-ehersisyo kay ito an iya kinahanglan. Magigin malipayon kami nga duha kay mahihimo namon an kinahanglan namon buhaton.”—Daniela.

 Siyahan, mahimo igkonsiderar han tagsa ha iyo an masunod nga mga pakiana. Katapos, pag-istoryahi niyo nga duha an iyo mga baton.

•   Masisiring mo ba nga may igo kamo nga panahon para ha usa kag usa yana?

•   Ano nga kumendasyon an maihahatag mo ha imo padis may kalabotan hini?

•   Ano an karuyag mo nga pauswagon han imo padis?

•   Agsob ba maagaw han imo gadyet an imo atensyon samtang nag-iistorya an imo padis?

•   Paonan-o niyo maipapakita nga makatadunganon kamo ha iyo ginlalaoman ha usa kag usa?

•   Ano nga mga pagbag-o an puydi niyo buhaton hini nga semana basi mas makapokus kamo ha usa kag usa?