An nadoksadok (limpet), nga usa nga susô ha tubig nga an kurti han shell baga hin sadok, may mga ngipon nga diri ordinaryo an karig-on. Ito nga mga ngipon ginkukompwesto hin magnipis ngan sùsò nga mga fiber han usa nga matig-a nga mineral nga gintatawag nga goethite nga nakadukot ha mas mahumok nga protein base.

 Tagda ini: An radula han nadoksadok pariho hin dila an kurti. Puno ito hin mga ngipon nga nakalinya hin pakurba​—nga an tagsa nga ngipon waray mag-usa ka milimetro an kahilaba—​nga ginagamit sugad nga pangkaros. Kinahanglan sobra gud karig-on ngan katig-a an tagsa nga ngipon basi makaros hito an mga lumot ha bato ngan magin pagkaon han nadoksadok.

 An mga parasaliksik naggamit hin atomic force nga mikroskopyo basi suklon kon mationan-o karig-on an ngipon han nadoksadok. Nadiskobrehan nira nga an mga ngipon han nadoksadok amo an pinakamarig-on ha ngatanan nga ira ginsaliksik—mas marig-on pa kay ha sapot han baraw o lawa. An nanguna ha pagsaliksik nagsiring: “Nangangalimbasog kami nga kopyahon an pagkadisenyo han ngipon han nadoksadok ha amon mga imbensyon.”

 An mga parasaliksik natoo nga an artipisyal nga substansya nga ginsubad ha ngipon han nadoksadok magagamit ha paghimo hin mga awto, mga barko, mga eruplano, ngan bisan ha paghimo han artipisyal nga ngipon han tawo.

 Ano ha imo panhunahuna? An nakakaimpres ba nga ngipon han nadoksadok produkto han ebolusyon, o may nagdisenyo hito?