Hi Jesus nagin kilala tikang han nabawtismohan hiya. Yinukot nga Judio an nakakita han iya mga milagro, ngan an sumat mahitungod han iya mga ginbuhat nahibantog ha bug-os nga nasud. Yana, hini nga Piyesta han mga Tabernakulo (o, mga Payag) ha Jerusalem, damu an nagpipinamiling ha iya.

Iba-iba gud an opinyon mahitungod kan Jesus. An iba nasiring: “Maopay hiya nga tawo.” May nasiring liwat: “Diri hiya maopay, kay iginsisimang niya an mga tawo.” (Juan 7:12) Kadam-an hini nga uruistorya nahitabo durante han siyahan nga mga adlaw han piyesta. Pero waray bisan usa an may kaisog ha pagdepensa kan Jesus ha publiko tungod kay damu an nahadlok ha magigin reaksyon han Judio nga mga lider.

Han katunga-tungaan han piyesta, nagpakita hi Jesus didto ha templo. Damu an nahipausa han iya maopay gud nga abilidad ha pagtutdo. Waray hiya mag-aram ha eskwelahan han mga rabbi, salit an mga Judio nagpakiana: “Paonan-o ini nga tawo nagkaada kahibaro han mga sinurat nga waray man hiya mag-eskwela?”—Juan 7:15.

Hi Jesus nagsaysay: “An akon igintututdo diri akon, kondi tikang ha iya nga nagsugo ha akon. Kon an bisan hin-o naruruyag pagbuhat han Iya kaburut-on, mahibabaro hiya kon ito nga katutdoan tikang ha Dios o ha akon kalugaringon nga mga ideya.” (Juan 7:16, 17) An mga igintututdo ni Jesus uyon ha mga Balaud han Dios, salit matin-aw nga an iya ginhihimaya amo an Dios, diri an iya kalugaringon.

Katapos hi Jesus nagsiring: “Diri ba iginhatag ha iyo ni Moises an Balaud? Pero diri niyo ginsusunod an Balaud. Kay ano nga karuyag niyo ako patayon?” An pipira han mga tawo nga posible mga bisita tikang ha gawas han syudad diri maaram ngan diri makatoo nga may nag-iikaparatay ha magturutdo nga pariho ha iya. Tungod hini, naghunahuna hira nga bangin may diperensya hi Jesus salit nakayakan hiya hin sugad. Hira nagsiring: “May demonyo ka. Hin-o an naruruyag pagpatay ha imo?”—Juan 7:19, 20.

Ha tinuod la, mga usa ngan tunga ka tuig na an naglabay, gin-ikaparatay hi Jesus han Judio nga mga lider katapos niya tambalon an usa nga tawo ha Sabbath. Gumamit yana hi Jesus hin pangatadongan nga nakaaghat ha ira nga maghunahuna ngan nagbuhayhag han ira pagin diri makatadunganon. Gin-unabi niya nga sumala ha Balaud, an usa nga bata nga lalaki kinahanglan turion ha ikawalo ka adlaw, bisan kon Sabbath. Katapos nagpakiana hiya: “Kon may gintuturi ha adlaw han sabbath basi diri matalapas an balaud ni Moises, kay ano nga nasisina gud kamo ha akon tungod kay nagtambal ako hin tawo ha adlaw han sabbath? Ayaw na kamo paghukom sumala ha iyo nakikita, kondi paghukom kamo ha matadong nga paagi.”—Juan 7:23, 24.

An mga taga-Jerusalem nga maaram han nahitabo, nagsiring: “Diri ba ini an tawo nga karuyag nira [mga magmarando] patayon? Pero kitaa! Nagyayakan hiya ha publiko ngan waray hira ginsisiring ha iya. Diri gud maaram an mga lider nga hiya an Kristo, diri ba?” Kon sugad, kay ano nga diri natoo an mga tawo nga hi Jesus an Kristo? Hira nagsiring: “Maaram kita kon diin tikang ini nga tawo; pero kon umabot an Kristo, waray mahibabaro kon diin hiya tikang.”—Juan 7:25-27.

Didto mismo ha templo, hi Jesus binaton: “Kilala niyo ako ngan maaram kamo kon diin ako tikang. Ngan kinanhi ako diri ha akon la kaburut-on, kondi ginsugo ako han Dios ngan diri kamo nakilala ha iya. Kilala ko hiya kay ako an iya representante, ngan Hiya an nagsugo ha akon.” (Juan 7:28, 29) Tungod han matin-aw nga ginsiring ni Jesus, nagsari hira pag-aresto ha iya basi prisuhon hiya o patayon. Pero napakyas hira tungod kay diri pa panahon nga mamatay hi Jesus.

Kondi damu an tumoo kan Jesus, ngan husto gud ito. Naglakat hiya ha bawbaw han tubig, nagpakalma han hangin, milagroso nga nagpakaon hin yinukot pinaagi hin pipira la nga tinapay ngan isda, nagtambal ha mga may sakit, nagpalakat ha mga piay, nagpukrat ha mga mata han buta, nagtambal ha mga may liprosi, ngan nagbanhaw pa ngani hin mga patay. Oo, may hinungdan gud hira nga magpakiana: “Hiya an Kristo, kay waray magbubuhat hin mas damu pa nga milagro kay ha ginbuhat hini nga tawo, diri ba?”—Juan 7:31.

Han hinbatian han mga Pariseo ini nga ginsiring han mga tawo, hira ngan an punoan nga mga saserdote nagsugo hin mga opisyal basi arestuhon hi Jesus.