Damu la gihap an natoo nga an angayan nga panggawi magriresulta hin mas maopay nga kabubuwason. Nangangalimbasog hira nga magin matinalahuron, magpakita hin maopay nga pamatasan, kilalahon an ira papel ha sosiedad, ngan magkaada maopay nga konsensya. Hi Linh, usa nga babaye ha Vietnam, nagsiring, “Tikang pa hadto natoo na ako nga kon tangkod ako ngan sinsero, magigin maopay an akon kinabuhi.”

An iba nagbubuhat hin maopay tungod han ira mga gintotoohan ha ira relihiyon. Hi Hsu-Yun, usa nga lalaki nga naukoy ha Taiwan, nagsiring, “Gintutdoan ako nga an binuhatan han usa nga tawo samtang buhi hiya an magigin basihan kon magigin malipayon ba hiya ha kadayonan o mag-aantos kamatay niya.”

Tinuod nga kon nagbubuhat kita hin maopay ha iba, damu nga kaopayan an aton nakakarawat. Pero nasantop han damu nga sinsero nga nangangalimbasog nga magin maopay ha iba nga an pagbuhat hito diri pirme nagriresulta ha ira ginlalaoman. “Nahibaroan ko tikang ha akon mismo eksperyensya nga adton nagbubuhat hin maopay diri pirme nababalosan hin maopay,” siring ni Shiu Ping, usa nga babaye nga naukoy ha Hong Kong. “Ginhimo ko an tanan basi atamanon an akon pamilya ngan magbuhat hin maopay. Pero waray maglampos an amon pag-asawa, ngan kami han akon anak ginbayaan han akon bana.”

Damu an nakapansin nga an relihiyon diri pirme nakakabulig nga magin mas maopay an mga tawo. “Umapi ako ha usa nga relihiyon ngan nagin direktor ha mga buruhaton para ha mga batan-on,” siring ni Etsuko, usa nga babaye nga naukoy ha Japan. “Diri ako makatoo nga an iba han akon mga karelihiyon imoral, nag-aaraway para ha katungdanan, ngan diri tangkod ha paggamit han pondo han amon relihiyon.”

An iba nga relihiyoso gud nasubo han waray hira makakarawat hin bendisyon tungod han ira mag-opay nga buhat. Ito an gin-abat ni Van, usa nga babaye nga taga-Vietnam. “Kada adlaw napalit ako hin prutas, bukad, ngan pagkaon ngan iginhahalad ito ha mga altar han akon namatay nga mga kaapoy-apoyan, kay naglalaom ako nga magkakaada ako mga bendisyon ha tiarabot,” siring niya. “Bisan pa han ngatanan nga mag-opay nga buhat ngan mga rituwal nga akon ginhimo ha sulod hin damu ka tuig, nagkasakit hin grabe an akon bana. Katapos, namatay an akon anak nga babaye samtang naeskwela hiya ha iba nga nasud.”

Kon diri igo an pagin maopay nga tawo, ano an naggagarantiya hin mas maopay nga kabubuwason? Basi mabaton ini, kinahanglan naton hin masasarigan nga giya—usa nga surok hin impormasyon nga makakabaton han aton mga pakiana ngan makakagtutdo han paagi ha pagkaada mas maopay nga kabubuwason. Diin kita makakabiling hito?