PARA HA MAG-ASAWA
1: Dedikasyon
AN KARUYAG SIDNGON
An bana ngan asawa nga dedikado ha ira pag-asawa nagtatagad han ira relasyon sugad nga permanente nga bugkos, salit naabat hira nga may-ada hira seguridad ha kada tagsa. An kada tagsa ha ira nasarig nga an ira padis magigin maunungon ha ira pag-asawa, bisan ha magkuri nga sitwasyon.
An pipira nga mag-asawa napipiritan magpabilin ha ira pag-asawa tungod han presyur han sosiedad o han ira pamilya. Pero mas maopay gud kon an ira dedikasyon nakagamot ha gugma ngan pagtahod ha kada tagsa.
PRINSIPYO HAN BIBLIA: “Diri sadang bayaan han bana an iya asawa.”—1 Corinto 7:11.
“Kon dedikado ka ha imo pag-asawa, diri ka madali masina. Masayon ka magpasaylo ngan madagmit ka mangaro hin pasaylo. Gintatagad mo an mga problema sugad nga ulang, diri sugad nga rason ha pagbulag.”—Micah.
KON KAY ANO NGA IMPORTANTE
Kon naatubang hin problema, an mag-asawa nga diri dedikado ha ira pag-asawa madali la makasiring, ‘Diri gud kami para ha kada tagsa’ ngan magbiling hin paagi nga makagawas ha pag-asawa.
“Damu an nag-aasawa tungod kay may ‘solusyon’ hira engkaso diri maglampos an ira pag-asawa—pagbulag. Kon sumulod ha pag-asawa nga ginhuhunahuna nga daan an posibilidad han pagbulag, diri marig-on an ira dedikasyon tikang pa ha tinikangan.”—Jean.
AN IMO PUYDI BUHATON
SARIHI AN IMO KALUGARINGON
Kon nagdidiskusyon . . .
-
Nagbabasol ka ba nga ginpakasalan mo an imo asawa?
-
Nag-iilusyon ka ba nga iba an imo kaupod?
-
Nakakayakan ka ba hin “Babayaan ko ikaw” o “Magbibiling ako hin iba nga mag-aapresyar ha akon”?
Kon oo an imo baton ha usa o sobra pa hito nga mga pakiana, panahon na basi parig-unon mo an imo dedikasyon ha imo asawa.
IPAKIISTORYA HA IMO ASAWA
-
Nagluya ba an aton dedikasyon ha aton pag-asawa? Kon oo, kay ano?
-
Ano an sadang naton buhaton basi maparig-on an aton dedikasyon?
SUHESTYON
-
Ha panapanahon, surati hin love letter an imo asawa
-
Ipakita an imo dedikasyon pinaagi ha pagdispley hin mga piktyur han imo asawa ha imo gintatrabahoan
-
Tawagi o iteks an imo padis ha kada adlaw nga aadto ka ha trabaho o aadto ka ha hirayo
PRINSIPYO HAN BIBLIA: “An gintampo han Dios diri pagbulagon han bisan hin-o nga tawo.”—Mateo 19:6.
