An usa nga trahedya o usa nga kalamidad mahimo magkaada maraot nga epekto ha kahimsog han mga tawo ha iba-iba nga paagi.

• Tungod han magraot nga panhitabo, naiistres an mga tawo, ngan an maiha nga istres mahimo magin hinungdan han agsob nga pagkasakit.

• An mga trahedya mahimo magpakuri ha mga hospital ha paghatag hin maopay nga pagtambal kay damu an durungan nga nagkakasakit ngan puydi liwat magkulang an suplay han medisina.

• Tungod han mga kalamidad, nagkukuri ha pinansyal an mga tawo salit diri nira kaya makapalit han ira mga panginahanglan sugad han masustansya nga pagkaon o medisina.

• An grabe nga sakit ngan istres mahimo makaapekto ha imo pagdesisyon, nga puydi magin hinungdan nga mapabay-an mo an mga butang nga makakaopay han imo kahimsog. Sugad nga resulta, bangin mas maggrabe pa an imo sakit.

• Kon papabay-an mo an imo sakit, mahimo ito maggrabe ngan mameligro pa ngani an imo kinabuhi.

• Kon mahimsog ka, makakahimo ka hin maopay nga mga desisyon bisan pa ha masamok hinduro nga kahimtang.

• Pobre ka man o riko, may mahihimo ka basi maprotektaran an imo kahimsog.

Kon posible, ginkukonsiderar han maaramon nga tawo an potensyal nga mga peligro ngan naghihimo hiya hin paagi basi malikyan ito. Mahimo ini iaplikar may kalabotan ha kahimsog. Kaurogan na nga nalilikyan an sakit o an paggrabe hito kon pirme kita limpyo. An paghirot maoroopay kay han pagpatambal.

“Kon pirme kami limpyo pati an amon balay, nakakatipid kami kay nalilikyan namon an gastos ha pagpadoktor ngan ha pagpatambal.”—Andreas. *