Han 2021 nga tuig han pag-alagad, a an kalibotan padayon nga nag-aantos tungod han COVID-19 nga pandemya. Sugad han iginsaysay ha artikulo nga “Bug-os-Kalibotan nga Relief ha Panahon han Pandemya,” naggasto kita hin minilyon ka dolyar b para ha relief ha panahon han pandemya ngan nagkaada sobra 950 nga Disaster Relief Committee.

 Ngani, samtang nagpapadayon an pandemya, an iba nga natural ngan hinimo han tawo nga mga kalamidad nakaapekto ha aton kabugtoan ha bug-os nga kalibotan. Sugad nga pagresponde ha sobra 200 hito nga mga kalamidad, gin-aprobaran han Coordinators’ Committee han Nagmamando nga Lawas an paggasto hin 8 milyon ka dolyar labot la han relief nga igintagana para ha COVID-19. Kitaa kon paonan-o gin-gamit an iyo mga donasyon ha pagbulig ha mga biktima han duha nga bag-o pa la nga kalamidad.

 Han Mayo 22, 2021, an Mount Nyiragongo, usa nga bulkan ha Democratic Republic of the Congo, nagtikang pagbuto. Gin-guba han nag-aawas nga lava an mga balay, eskwelahan, ngan an usa nga dam. Pero diri la an lava an delikado. Mga pipira ka adlaw katapos han pagbuto, nagbuga an bulkan hin makahirilo nga abo nga inabot ha syudad han Goma ngan nagkaada liwat damu nga maghinay nga linog. Sobra katunga han populasyon han syudad an ginpaebakwit. Ginatos ka yukot an nag-ebakwit, an iba tinabok ha giutan ngadto ha Rwanda.

 Mga 5,000 nga Saksi ni Jehova an upod han nag-ebakwit. An iba nawarayan hin mga balay tungod han pagbuto han bulkan; an iba naman ginlotingan an ira balay han nag-ebakwit hira. An mga relief committee ha Rwanda ngan ha Democratic Republic of the Congo nagbulig ha panhatag hin relief. Mahitungod ha usa nga relief committee, an branch ha Congo (Kinshasa) nagreport: “Bisan masamok an kahimtang ha syudad ngan bisan antes pa hira ginpaebakwit, an komite nagtikang na panhatag hin mga pagkaon, tubig, taklap, ngan bado.” Ha usa nga bungto diin nakadto an sobra 2,000 han aton kabugtoan, usa nga relief committee an nagbutang hin mga tent, nanhatag hin mga mask, ngan nagsaysay kon paonan-o malilikyan nga matapnan han COVID-19 ngan kolera.

 Ha sulod hin tulo ka bulan durante han kalamidad, an aton kabugtoan nanhatag hin sobra unom ka tonilada nga bugas, unom ka tonilada nga harina nga mais, sobra 8,000 ka litro nga asyete, ngan sobra 8,000 ka litro nga tubig. Basi makatipid, ginhikay han branch nga pumalit hin damu nga pagkaon ha ira nasud imbes nga pumalit hin mas mahal nga pagkaon ha iba nga nasud.

 “Nahulop gud kami ngan nasubo,” siring han usa nga sister nga naguba an ira bag-o nga balay tungod han pagbuto han bulkan. Pero an ira pamilya nakakarawat hin materyal ngan espirituwal nga bulig. Ini na yana an iya siring: “Ha bulig ni Jehova, may-ada la gihap kami han amon ginkikinahanglan. Nakita namon nga gindara ni Jehova an amon pinas-an salit nagin masayon na ito para ha amon.”

 An Venezuela nag-antos hin duro nga krisis ha ekonomiya ha sulod hin damu ka tuig. An aton kabugtoan didto nag-aantos tungod han makuri nga pagkinabuhi, kakulang hin pagkaon, ngan pagdamu han krimen. Pero waray hira pabay-i han organisasyon ni Jehova.

 Durante han naglabay nga tuig han pag-alagad, sobra 1.5 milyon ka dolyar an gin-gasto ha pagpalit ngan pagpadara hin pagkaon ngan sabon ha nagkikinahanglan nga mga pamilya. An branch ha Venezuela nagreport: “Diri masayon an pagpadara hin 130 ka tonilada nga pagkaon ha bug-os nga nasud kada bulan ngan pagsiguro nga makakaabot ito ha aton kabugtoan nga nanginginahanglan.” Basi masiguro nga an pagkaon diri madaot, kasagaran na nga an kabugtoan nagpapadara hin mga pagkaon nga diri madagmit madaot. An branch dugang nga nagsiring: “Kaurogan na nga kon napalit kami hin pagkaon bultohay ngan ha panahon nga damu ito kay mas barato. Katapos, ginpapadara namon ito ha pinakabarato nga paagi.”

 Naruyagan gud ni Leonel, usa nga membro hin Disaster Relief Committee ha Venezuela, an iya toka. “Maopay gud nga buruhaton an panhatag hin relief,” siring niya. “Ini nga pribilehiyo nagparig-on gud ha akon tikang han namatay an akon hinigugma nga asawa tungod han COVID-19. Nagin busy ako ngan inabat ko nga nakakabulig ako ha kabugtoan nga nanginginahanglan. Nakita ko mismo kon paonan-o gintutuman ni Jehova an iya saad nga diri niya papabay-an an iya katawohan.”

 Usa nga brother nga nakakarawat hin relief an nag-alagad hadto sugad nga membro hin relief committee. “Yana, ako naman an nanginginahanglan hin bulig,” siring niya. “Diri la materyal nga bulig an amon nakarawat. Kami nga mag-asawa ginbuligan liwat han kabugtoan nga magpabilin nga kalmado. Gin-ataman kami nira, ginliaw, ngan gindasig.”

 An iba nga mga kalamidad gutiay la an pahamangno o tigda la nga nahitatabo. Bisan pa hito, kasagaran na nga an organisasyon ni Jehova nakakakuha ngan nakakadeliber dayon hin mga relief tungod han iyo mga donasyon ha bug-os-kalibotan nga buruhaton. An pipira nga mga pamaagi ha paghatag hin donasyon iginsasaysay ha donate.dan124.com. Salamat ha iyo pagin mahinatagon.