Ha bug-os nga kalibotan, damu nga gobyerno an nagpapatuman hin physical distancing ngan diri nagtutugot nga magkatirok an damu nga tawo. Determinado an mga Saksi ni Jehova nga sundon ini nga mga patakaran ngan padayon nga magkatirok ha talwas nga paagi. Basi mahimo ito, an mga kongregasyon nagamit hin mga videoconferencing app, sugad han Zoom, para magkatirok.

 Basi magin regular an aton mga katirok, gin-aprobaran han Nagmamando nga Lawas nga gumamit hin donasyon para pumalit hin mga Zoom account nga magagamit han mga kongregasyon. Daku ini nga bulig ha mga kongregasyon nga diri makakaakos ha pagbayad hin videoconferencing account nga $15-$20 o sobra pa an presyo. Ini nga mga kongregasyon kasagaran na nga nagamit hin libre nga mga app nga limitado la an makakakonektar o waray igo nga security. Pero yana, an ngatanan nga kongregasyon nga nagamit hini nga mga Zoom account tikang ha organisasyon makakakontrol han security, ngan mas damu an makakakonektar ha tagsa nga katirok. Ha pagkayana, sobra 65,000 nga kongregasyon ha sobra 170 nga nasud an nagamit hini nga mga account.

 An Kairagi Congregation, ha Manado, North Sulawesi, Indonesia, waray na gumamit han libre nga videoconferencing app ngan nagtikang paggamit han Zoom account tikang ha organisasyon. Hi Brother Hadi Santoso nagsaysay: “Bisan an kabugtoan nga diri pamilyar ha paggamit hin mga gadyet nag-i-enjoy na yana ha mga katirok, labi na kay diri na nira kinahanglan mag-log in hin pipira ka beses kon nagkakatirok.”

 Hi Lester Jijón, Jr., usa nga tigurang ha Guayacanes Oeste Congregation ha Guayaquil, Ecuador, nagsiring: “Tungod han kahimtang ha pinansyal han damu nga kabugtoan, imposible para ha pipira nga kongregasyon an pagpalit hin Zoom account nga magagamit han bug-os nga kongregasyon ha pagtambong ha mga katirok. Yana, tungod kay mas damu an puydi makakonektar ha Zoom account tikang ha organisasyon, damu na an amon naiimbitar ha mga katirok kay diri na kami nahahadlok nga maabot an igintutugot nga kadamu han mga nakakonektar.”

 Hi Johnson Mwanza, usa nga tigurang ha Ngwerere North Congregation ha Lusaka, Zambia, nagsurat: “Damu nga kabugtoan an pauroutro nga nagsiring, ‘Tungod han kahikayan nga magkaada Zoom account tikang ha organisasyon, diri la kay inaabat namon nga mas duok kami ha kabugtoan kondi inaabat liwat namon nga hinigugma ngan gin-aataman kami ni Jehova.’”

 Ini nga mga account tikang ha organisasyon ginpalit gamit an mga pundo nga para ha disaster relief. Ito nga mga pundo ginkuha ha boluntaryo nga mga donasyon para ha bug-os-kalibotan nga buruhaton. Damu hini nga mga donasyon an iginpapadara gamit an donate.dan124.com. Salamat han imo kinasingkasing nga donasyon, nga nagagamit liwat ha iba pa nga relief work ha bug-os nga kalibotan.—2 Corinto 8:14.