Ha Hulyo ngan Agosto 2020, ha siyahan nga higayon, an kabugtoan ha bug-os nga kalibotan magkikita han pariho nga programa han regional nga kombensyon ha pariho nga panahon. Basi mahimo ini, an nakarekord nga programa kinahanglan ihubad ha sobra 500 nga yinaknan. An pagplano ngan pagtapos han sugad nga proyekto kasagaran nga naabot hin usa ka tuig o sobra pa. Pero tungod han coronavirus nga pandemya, an mga translator may-ada na la sobra tulo ka bulan ha paghubad han 2020 ‘Magrayhak Pirme’! Regional nga Kombensyon.

 An Translation Services ngan Global Purchasing ha World Headquarters han mga Saksi ni Jehova binulig hinin daku hinduro nga proyekto. Maaram an Translation Services nga para mahimo ini, damu nga translation team an nagkikinahanglan hin dugang nga garamiton, labi na hin de-kalidad nga mga mikropono. An Global Purchasing nagpalit hin 1,000 nga mikropono ngan iginpadara ito ha haros 200 nga lugar.

 Basi makatipid, bultohay an pagpalit han mga mikropono. Iginpadeliber ito ha usa nga lugar, ngan tikang didto iginpadara ito ha mga translator ha bug-os nga kalibotan. Tungod han bultohay nga pagpalit, mga $170 U.S. na la an presyo han tagsa nga mikropono upod na an pagpadara, salit nakatipid kita hin sobra 20 porsyento.

 Ito nga mga mikropono kinahanglan paliton ngan ipadara han Global Purchasing han Abril ngan Mayo 2020—panahon nga limitado la an nahihimo han mga negosyo tungod han pandemya. Bisan pa hito, ha kataposan han Mayo, an kadam-an han mga remote translation office, branch office, ngan iba pa nga lokasyon diin ginhihimo an paghubad nakakarawat na han ginkikinahanglan nga mga garamiton.

 “Hini nga bug-os nga proyekto, maopay an transaksyon butnga han mga departamento han Bethel ngan han mga suplayer,” siring ni Jay Swinney, nga paramangno han Global Purchasing. “Madagmit namon ini nga nahimo, ngan nagamit ha pinakamaopay nga paagi an donasyon han kabugtoan, tungod han bulig han espiritu ni Jehova.”

 Hi Nicholas Ahladis, nga nagtatrabaho ha Translation Services, nagsiring: “An mga translator nga na-lockdown hito nga panahon nadasig gud han nakarawat nira ini nga mga garamiton. Bisan kon diri nira nakakaupod an iba nga membro han ira translation team, urosa hira nga makakagtrabaho ha paghubad ngan pagrekord han mga pahayag, mga drama, ngan mga kanta ha sobra 500 nga yinaknan.”

 Usa ini han damu nga proyekto nga natapos basi mahimo an 2020 ‘Magrayhak Pirme’! Regional nga Kombensyon para ha kabugtoan ha bug-os nga kalibotan. An imo kinasingkasing nga donasyon gamit an donate.dan124.com ngan iba pa nga paagi nakabulig basi mapalit inin ginkikinahanglan nga mga garamiton.