2 ʼE Tokoni Atu Ke Ke Fakatokatoka Te ʼu Fihifihia
ʼE ʼi ai ʼihi fihifihia ʼo te maʼuli kua tauaka ia tatou lolotoga ni taʼu, kae ʼe mole pe la tou tokagaʼi. ʼE foaki atu koa ʼi te Tohi-Tapu he poto ke ke lava fakatokatoka ai te ʼu faigataʼaʼia ʼaia? Tou vakaʼi ʼihi fihifihia.
TE HOHA FAU
ʼE ui fenei e Rosie: “Ko au pe ʼae neʼe au fakalalahiʼi fau te aluʼaga ʼi taku fakakaukau ʼo tupu ai taku hoha tuʼumaʼu.” Kotea te ʼu vaega ʼae neʼe tokoni kia Rosie? Neʼe kau ai ia Mateo 6:34: “ ʼAua naʼa kotou tuʼania ki te apogipogi, koteʼuhi ʼe toe ʼi ai anai mo ʼona tuʼania. ʼE feʼauga pe te ʼaho takitahi mo ʼona fihifihia.” ʼI te temi leva ʼaeni, ʼe ui e Rosie neʼe tokoni age te ʼu palalau ʼaia ʼa Sesu ke tuku tana tuʼania ki te apogipogi. Pea ʼe ina toe ui fenei: “Neʼe kua feʼauga pe ʼoku fihifihia. Neʼe mole he ʼaoga ʼo haku toe hoha ki he tahi ʼu aluʼaga ʼe mole lagi hoko anai.”
Neʼe mafasia ia Yasmine ʼuhi ko tana hoha fau. “Neʼe au tagi lolotoga ni ʼaho pea ko ʼihi po neʼe mole kei feala haku moe. Neʼe au nofo pe mo te ʼu manatu ʼe mole lelei.” Kotea te vaega ʼae neʼe tokoni kia Yasmine? Ko 1 Petelo 5:7: “Kotou tuku [ki te ʼAtua] ʼakotou tuʼania fuli, he ʼe tokaga ia kia koutou.” ʼE ui e Yasmine: “ ʼI te alu ʼo te temi, neʼe au haga faikole pe kia Sehova, pea neʼe ina tali ʼaku faikole. Neʼe hage neʼe toʼo ia au he toe kavega mamafa. ʼI ʼihi temi, ʼe kei au maʼu pe he ʼu manatu ʼe mole lelei. Kae kua au iloʼi leva peʼe feafeaʼi tona tauʼi.”
TE TUKU KI HE TAHI AGE TEMI TE FAI ʼO HE MEʼA
ʼE ui fenei e Isabella: “Kia au, ko te holoʼi ʼo te fai ʼo he meʼa ki he tahi age temi, neʼe ko he agamahani neʼe au maʼu mai taku tamai, he neʼe toe feia pe mo ia. Neʼe au tuku ki muli age te ʼu meʼa maʼuhiga ke feala haku malolo mo sioʼi te televisio. ʼE mole ko he agamahani ʼaia ʼe lelei, ʼuhi he ʼe fakatupu hoha pea ʼe mole fakahoko lelei ai he gaue.” Neʼe tokoni age te pelesepeto ʼae ia 2 Timoteo 2:15: “Ke ke faiga malohi ke ke tuʼu ia muʼa ʼo te ʼAtua ohage ko he tagata ʼe ina tali leleiʼi, ko he tagata gaue ʼe mole feala ke valokiʼi tana gaue.” Pea ʼe toe ui fenei e Isabella: “Neʼe mole au loto ke valokiʼi e Sehova taku gaue.” Koia neʼe ina fai ai he ʼu fetogi lahi.
Neʼe toe feia pe mo Kelsey. ʼE ina ui fenei: “Neʼe ʼi ai te fakatuʼutuʼu neʼe tonu ke au fai kae neʼe mole au fai kei tautonu. Neʼe au tagi, neʼe mole kei au mamoe pea neʼe au hoha fau. Neʼe au logo kovi ai.” Neʼe tokoni te ʼAtua kia Kelsey ʼaki te vaega ʼo Taaga Lea 13:16: “E fakakaukau te tagata poto ia mua o te fai o tana gaue, kae e fakaha e te vale tona vale.” ʼAki tana metitasio ki te vaega ʼaia, neʼe mahino ai leva: “ ʼE ko he aga fakapotopoto te fai fakatomuʼa ʼo he fakatuʼutuʼu. Kua au ʼai nei ʼi toku pilo ia he kaupepa ʼe tohi ai te ʼu gaue ʼae ʼe tonu ke au fai. Pea ʼe tokoni mai ke au fai fakatomuʼa te ʼu gaue ʼaia.”
TE LOGOʼI ʼO TAU NOFO TOKOTAHI
ʼE fakamatala fenei e Kirsten: “Neʼe mā mavete mo toku ʼohoana, pea neʼe au taupau tokotahi ʼaku toe ʼe fa.” Kotea te pelesepeto Fakatohi-tapu ʼae neʼe tokoni kia Kirsten? Ko Taaga Lea 17:17: “E ofa te kaumea i te temi fuli, pea i te malaia e hage ia ia ko he tehina.” Neʼe kumi tokoni ia Kirsten ki te kokelekasio. Neʼe kotea te tokoni ʼaia? “Neʼe tokoni mai ʼoku kaumeʼa ʼi te ʼu aluʼaga kehekehe. Neʼe tuku mai e ʼihi te ʼu meʼa kai mo te ʼu fisiʼi teu ʼi toku muʼa matapa. Pea neʼe matou fetogi ʼapi tuʼa tolu, pea neʼe tokoni mai he kiʼi kutuga ki tamatou fehikiʼaki. Neʼe ʼi ai mo te tahi neʼe tokoni mai ke au maʼu haku gaue. Koia, neʼe tokoni tuʼumaʼu mai pe ʼoku kaumeʼa kia au.”
Ko Delphine, ʼae neʼe tou talanoa ki ai, neʼe ina toe logoʼi mo ia tana nofo tokotahi. ʼE ina ui fenei: “Neʼe au sio kia natou ʼae, ʼe maʼuli fiafia natou. Kae ko au ia, neʼe au nofo tokotahi pe.” Neʼe tokoni age te vaega ʼo Pesalemo 68:6, MN: “E foaki e te ʼAtua he ʼapi kia natou ʼae ʼe nofo tokotahi.” ʼE ina fakamahino fenei mai: “Neʼe au iloʼi ʼe mole talanoa pe te vaega ʼaeni ki he ʼapi. Kae, neʼe au mahino ai ʼe foaki mai e te ʼAtua he ʼapi fakalaumalie, ʼe tou maʼu ai te fimalie pea mo te felogoi tahi moʼoni mo natou ʼae ʼe ʼoʼofa kia Sehova. Pea, neʼe au toe mahino ai kapau ʼe au fakaovi muʼa kia Sehova pea ʼe hoki feala ai anai ke au fakaovi ki ʼihi. Neʼe tokoni mai te vaega ʼo Pesalemo 37:4: ‘Ke au fai [kia Sehova] taku fiafiaaga lahi, pea e ina foaki mai anai te mea ae e holi ki ai toku loto.’ ”
ʼE ina fakaʼosi fenei tana palalau: “Neʼe au mahino neʼe tonu ke au pipiki maʼu kia Sehova. ʼE ko ia ko toku kaumeʼa lelei tukupau. Neʼe au fai leva te lisi ʼo te ʼu gaue ʼae ʼe feala ke au fai anai mo natou ʼae ʼe kaumeʼa mo ʼoʼofa kia Sehova. Neʼe au faigaʼi ke au tokagaʼi pe te ʼu kalitate ʼo ʼihi kae mole ko ʼanatou agahala.”
ʼE moʼoni, ko natou ʼae ʼe tauhi ki te ʼAtua, ʼe kei natou agahala pe. Ohage pe ko te hahaʼi fuli, ʼe felaveʼi te kau Fakamoʼoni ʼa Sehova mo he ʼu fihifihia. Kae, ko te ʼu akonaki fakatohi-tapu ʼe ʼekenaki ʼaki ai te hahaʼi ke natou fetokoniʼaki moka ʼe feala. ʼE lelei ke tou maʼu he ʼu kaumeʼa feia. Kae, ʼe toe feala koa ke tokoni atu te ʼu pelesepeto Fakatohi-tapu, ki te ʼu mamahi ʼae ʼe mole feala ke pulihi ia ʼaho nei, ohage ko te ʼu mahaki kovi mo te mamahi ʼae ʼe tou logoʼi moka mate he tahi?
Ko te maʼuliʼi ʼo te ʼu pelesepeto Fakatohi-tapu, ʼe tokoni atu anai ke ke maʼu he ʼu kaumeʼa lelei