MANATU TAFITO | KE FUA LELEI AGE KIA KOE TAU LAU IA TE TOHI-TAPU
ʼE Feafeaʼi Hau Leleiʼia Tau Lau Ia Te Tohi-Tapu?
ʼE feafeaʼi anai kia koe tau lau ia te Tohi-Tapu? ʼE fakapiko peʼe fakafiafia? ʼE fakalogo tafito te faʼahi ʼaia ki te ʼu fakatuʼutuʼu ʼae ʼe ke fai moʼo lau ia te Tohi-Tapu. Tou vakaʼi he ʼu meʼa ʼe feala ke ke fai ke ke leleiʼia tau lautohi pea mo fiafia lahi age.
Filifili he Tohi-Tapu ʼe tuha mo te falala pea ʼe ke mahino ki ai. Kapau ʼe ke lau he tohi ʼe lahi ai te ʼu kupu ʼe mole ke mahino ki ai he ʼe faigataʼa peʼe kua ʼafeā, pea ʼe lagi mole ke fiafia anai ʼi tona lau. Koia, kumi he Tohi-Tapu ʼe ke mahino gafua ki ai pea ʼe malave anai ki tou loto. Kaʼe ʼe tonu foki ko he Tohi-Tapu neʼe lelei pea mo totonu tona fakaliliu. *
Fakaʼaogaʼi te ʼu masini foʼou. ʼE kei ta ia ʼaho nei te ʼu Tohi-Tapu. Kaʼe ʼe toe feala ke ke lau te Tohi-Tapu ʼi te ʼu masini. Ko ʼihi ʼe natou lau te Tohi-Tapu ʼi te Neti peʼe natou toʼo mai ai ʼo ʼai ki he olotinatea, he tablette, peʼe ko he telefoni toʼotoʼo. ʼI ʼihi Tohi-Tapu, ʼe feala ke ke vakaʼi fakavilivili he tahi age ʼu vaega ʼe talanoa ki he manatu ʼe tahi peʼe ke ke vakaʼi he tahi ʼu fakaliliu. Kapau ʼe ke leleiʼia age koe hau fagono ki te lau ʼo te Tohi-Tapu, ʼe kua toe puke foki ʼi ʼihi lea. Tokolahi ʼe natou fagono ki ai ʼi tanatou feoloʼaki ʼi te ʼu ka, ʼi tanatou faifo, peʼe ʼi tanatou fai he tahi ʼu gaue. He koʼe ʼe mole ke ʼahiʼahi he faʼahi ʼe alu tahi mo tou aluʼaga?
Fakaʼaogaʼi ni tohi ʼe tokoni atu ke ke mahino ki te Tohi-Tapu. ʼAki te ʼu tohi ʼaia ʼe lahi age anai te ʼu fua lelei ʼe ke maʼu ʼi tau lautohi. Ohage la, ʼe ʼi ai te ʼu mape ʼo te ʼu fenua ʼae ʼe talanoa ki ai te Tohi-Tapu. ʼE tokoni atu anai ke ke iloʼi te tuʼuʼaga ʼo te ʼu koga meʼa ʼae ʼe ke lau ʼi te Tohi-Tapu, pea ke hage ʼe ke sio ki te ʼu meʼa ʼae neʼe
hoko ʼi te ʼu koga meʼa ʼaia. Ko te ʼu alatike, ohage ko te ʼu alatike ʼi te nusipepa ʼaeni peʼe ʼi tamatou tuʼasila ʼi te Neti, jw.org, ʼe lava tokoni atu ke ke maʼu he ʼu fakamahino ʼo ʼuhiga mo te ʼu koga Tohi-Tapu kehekehe.Fetofetogi tau faʼahiga fai. Kapau ʼe faigataʼa kia koe tau lau ia te Tohi-Tapu mai tona kamataʼaga ʼo kaku ki tona fakaʼosi, ʼe lelei ke ke kamata lau muʼa he koga ʼo te Tohi-Tapu ʼe maʼuhiga kia koe. ʼE feala ke tupu ai hau fia hoko atu tau lautohi. Kapau ʼe ke fia iloʼi lelei he ʼu hahaʼi iloa ʼe tuʼu ʼi te Tohi-Tapu, ʼe feala ke ke ʼahiʼahi lau he ’u vaega ʼe talanoa ki te ʼu hahaʼi ʼaia, ohage ko tona fakaha ʼi te fakamatala ʼae ʼi te ʼa takai, ko tona kupu tafito: “ Ke Ke Iloʼi Lelei Age Natou ʼAe ʼe Talanoa Ki Ai Te Tohi-Tapu.” Peʼe lagi feala ke ke lau he ʼu vaega ʼe talanoa ki he manatu ʼe tahi, peʼe ko te ʼu hisitolia ʼi te Tohi-Tapu ʼo mulimuli ki te temi ʼae neʼe hoko ai. He koʼe ʼe mole ke ʼahiʼahi he faʼahiga fai ʼi te ʼu faʼahiga fai ʼaia?
^ pal. 4 Maʼa te tokolahi, ko te Tohi-Tapu. Fakaliliu ʼo Te Malama Foʼou ʼe ko he Tohi-Tapu ʼe totonu, mo tuha mo te falala pea mo faigafua te lau ʼo te ʼu mataʼi tohi. Ko te Tohi-Tapu ʼaia, ʼae ʼe ta e te kau Fakamoʼoni ʼa Sehova, kua fakaliliu ia lea ʼe 130 tupu. ʼE feala ke ke toʼo mai te Neti te Tohi-Tapu ʼaia neʼe fakaliliu ʼi te ʼu lea kehekehe, ʼi tamatou tuʼasila jw.org peʼe ko te meʼa gaue JW Library. ʼE toe feala foki ke ke toʼo mai te Neti te Fakaliliu ʼo Te Malama Foʼou ʼo Te Koga Tohi-Tapu Fakakeleka Fakakilisitiano ʼi te Fakaʼuvea. Peʼe kapau ʼe ke loto ki ai, ʼe feala ke olo atu te kau Fakamoʼoni ʼa Sehova mo hau Tohi-Tapu.
[Nota ʼi te lalo pasina 6]
^ pal. 43 ʼE mole maʼu ʼihi tohi ʼi te Fakaʼuvea.