FAʼAHI 4
Te Tukugakoviʼi Pe ʼo Kita —“Fakamaa Au i Taku Agahala”
“ʼAki taku gaue foʼou, neʼe lelei age te maʼuli ʼo toku famili. Kaʼe neʼe tupu ai taku kau ki he ʼu aluʼaga kehekehe neʼe mole lelei. Neʼe au kamata kau ai ki te ʼu ʼaho lalahi, mo te ʼu meʼa fakapolitike pea au alu ki te ʼekelesia. Neʼe mole kei au fakatahi mo te kokelekasio ia taʼu ʼe 40. ʼI te fakalaka ʼae ʼo te temi, neʼe au manatu ai neʼe mole kei feala ke fakamolemole mai ia Sehova. Pea neʼe au tukugakoviʼi pe ia au. Tafitō la, neʼe au iloʼi ia te moʼoni ʼi muʼa ʼo taku fai ia te ʼu meʼa ʼaia ʼe kovi.”—Martha.
KO TAKITA tukugakoviʼi pe ia kita, ʼe feala ke liliu ko he kavega ʼe mamafa ʼaupito. Neʼe tohi fenei e te Hau ko Tavite: “E malaga aku agakovi i toku ulu; O hage ko he amoga mamafa e natou tatao au.” (Pesalemo 38:5) Ko ʼihi kau Kilisitiano ʼae ʼe natou mafasia ʼuhi ko te lotomamahi ʼaupito, ʼe natou tui papau ʼe mole kei feala ke fakamolemole ia natou e Sehova. (2 Kolinito 2:7) ʼE moʼoni koa ia te manatu ʼaia? Kapau neʼe ke fai he agahala mamafa, ʼe kua ke fakamamaʼo fau koa mai ia Sehova ke mole kei feala hana fakamolemole atu kia koe? Kailoa ia.
“Tou Fakatokatoka Ia Tatou”
ʼE mole liaki e Sehova ia te kau agahala ʼae kua natou fakahemala. Kaʼe ʼe fia tokoni ia kia natou. ʼI te lea fakata ʼo ʼuhiga mo te foha maumau koloa, neʼe fakatatau e Sesu ia Sehova ki he tamai ʼofa ʼe ʼi ai tona foha neʼe mavae ʼi te loto fale fakafamili pea neʼe alu ʼo fai te ʼu meʼa fakalialia. ʼAki te temi, neʼe fakatotonu e te foha ke toe liliu mai ki fale. Neʼe kei mamaʼo te tama, ‘kaʼe kua sio tana tamai kia ia, pea neʼe ʼofa mamahi, pea mo lele ki ai ʼo faʼufua pea mo ʼuma kia ia.’ (Luka 15:11-20) ʼE ke fia fakaovi koa kia Sehova, kaʼe ʼe ke manatu ʼe kei ke “mamao” mai ia te ia? Ohage pe ko te tamai ʼi te lea fakata ʼa Sesu, ʼe manavaʼofa ia Sehova kia koe. Pea ʼe fakaʼamu ia ke ina toe fakatalitali koe.
Kaʼe ʼe feafeaʼi mo kapau ʼe ke manatu ʼe mole feala ke fakamolemole atu Sehova koteʼuhi ʼe mamafa fau peʼe lahi fau ʼau agahala? Vakaʼi age muʼa ia te fakaafe ʼaeni neʼe fai e Sehova ia Esaia 1:18, MN: “ ‘Kotou ʼomai pea tou fakatokatoka ia tatou,’ ʼe ui e Sehova. ‘Kapau ko ʼakotou agahala ʼe kula ʼahoʼaho, ʼe natou liliu anai ʼo hihina ohage ko te nive.’ ” ʼEi, maʼia mo te ʼu agahala ʼae ʼe hage ko te lanu kula ʼahoʼaho ʼae ʼe mole feala tona toʼo ʼi he kofu hina, ʼe fealagia ia kia Sehova tona fakamolemole.
ʼE mole loto e Sehova ke ke lotomamahi aipe koteʼuhi ʼe tukugakoviʼi pe koe ʼe tou leʼo ʼo loto. Kaʼe ʼe ke lava maʼu feafeaʼi te fimalie ʼae ʼe haʼu mai te fakamolemole ʼa Sehova pea mo he leʼo ʼo loto ʼe maʼa? Tou vakaʼi ia faʼahi ʼe lua neʼe fakahoko e te Hau ko Tavite. ʼUluaki, neʼe ina ui fenei: “E au vetevete anai aku uigataa [kia Sehova].” (Pesalemo 32:5) Manatuʼi, neʼe kua fakaafe koe e Sehova ke ke fakaovi age kia te ia ʼi te faikole pea mo ke ‘fakatokatoka’ mo ia. Tali ia te fakaafe ʼaia. Vetevete ʼau agahala kia Sehova pea ke fakaha kia te ia te ʼu meʼa ʼae ʼe ke logoʼi ʼi tou loto. Neʼe ko te aluʼaga ʼaia neʼe hoko kia Tavite. Koia ʼae neʼe feala ai ke faikole fenei mo he lotofalala: “Fakamaa au i taku agahala. . . . Oi Atua! E mole ke siaki he loto fasifasi mo fakahemala.”—Pesalemo 51:4, 19.
Lua, neʼe maʼu tokoni ia Tavite mai te tagata fakafofoga ʼae neʼe hinoʼi e te ʼAtua, ia te polofeta ko 2 Samuele 12:13) Ia ʼaho nei, ʼe foaki mai e Sehova ia te kau tagata ʼafeā ʼo te kokelekasio ʼae neʼe akoʼi ke tokoni ki te kau agahala ʼae neʼe fakahemala, ke natou toe kaumeʼa mo Sehova. Ka ke kole tokoni ki te ʼu tagata ʼafeā, ʼe natou fakaʼaogaʼi anai ia te Tohi-Tapu pea mo faikole fakamalotoloto anai ke fimalie ai tou loto, mo fakasiʼisiʼi peʼe pulihi ʼau manatu fakalotovaivai pea mo ke malolō ʼi te faʼahi fakalaumalie.—Sakopo 5:14-16.
Natane. (“Manuia Ae Kua . . . Uufi Tana Agahala”
ʼE mahino ia, ʼe lagi faigataʼa ʼaupito kia koe ia tau vetevete ʼau agahala kia Sehova ʼAtua pea mo ke kole tokoni ki te kau tagata ʼafeā. Neʼe toe logoʼi e Tavite ia te ʼu meʼa ʼaia. Koteʼuhi lolotoga he temi, neʼe “fakalogologo” ia ia ʼo ʼuhiga mo ʼana agahala. (Pesalemo 32:3) Kaʼe neʼe fiafia ki ʼamuli ki te ʼu fua lelei ʼo tana vetevete ʼana agahala pea mo te fetogi ʼo tana aga.
Ko te fua lelei maʼuhiga ʼae neʼe toe maʼu e Tavite, neʼe ko tana fiafia. Neʼe ina tohi fenei: “Manuia ae kua fakamolemole kia ia tana uigataa, ae kua uufi tana agahala.” (Pesalemo 32:1) Neʼe toe faikole fenei: “[Sehova], avahi oku laugutu, pea e fakaha anai e toku gutu tau fakavikiviki.” (Pesalemo 51:17) ʼI tana maʼu ia he leʼo ʼo loto ʼe maʼa pea mo tana lotofakafetaʼi ki te lotofakamolemole ʼa te ʼAtua, neʼe uga ai ia Tavite ke ina fakaha ki ʼihi pe ko ai ia Sehova.
ʼE loto e Sehova ke ke maʼu ia te fimalie ʼae ʼe haʼu mai he leʼo ʼo loto ʼe maʼa. Pea ʼe ina loto ke ke fakaha ki ʼihi pe ko ai ia ia pea mo ʼana fakatuʼutuʼu mo he lotofiafia moʼoni, kaʼe mole ʼaki hau tukugakoviʼi pe ia koe. (Pesalemo 65:2-5) Manatuʼi ia te fakaafe ʼae ʼa Sehova ke ina ‘fakamolemole ʼau agahala, koteʼuhi ke ina ʼaumai e ia totonu ni temi fakamokomoko’.—Gaue 3:19, 20.
Ko he aluʼaga ia neʼe hoko kia Martha. ʼE ina fakamatala fenei: “Neʼe momoli tuʼumaʼu mai e taku kiʼi tama ia Te Tule Leʼo pea mo te Réveillez-vous ! ʼAki te temi, neʼe au ako ke au toe iloʼi ia Sehova. Ko te faʼahi ʼae neʼe faigataʼa ki taku toe liliu mai, ko taku kole ke fakamolemole ʼaku agahala fuli. Logo la te faʼahi ʼaia, kaʼe neʼe au fakaovi pe ki te ʼAtua ʼi te faikole pea mo kole kia te ia ke fakamolemole mai. Pea fakafuafua age muʼa neʼe hoki au toe liliu mai kia Sehova kua ʼosi ki ai taʼu ʼe 40. Ko te ʼu aluʼaga ʼae neʼe hoko kia au, ʼe ko he fakamoʼoni ʼaia ʼe feala ki ʼihi hanatou toe liliu mai ʼo tauhi kia Sehova pea mo nonofo ʼi tona ʼofa.”