Taʼaga Lea 23:1-35
23 Ka ke kai fakatahi mo he hau,Tokaga lelei ki te ʼu meʼa ʼae ʼi ʼou muʼa.
2 Kapau ʼe ke mahani ʼi te kai lahi,Kai fakameʼameʼa.
3 ʼAua naʼa ke manumanū ki ʼana meʼa kai lelei,Naʼa fakahalaʼi ai koe.
4 ʼAua naʼa ke kinakina fau ʼi te kumi koloa.
Tuku pea ke ʼatamai.*
5 ʼE ke sio anai, kua puli ia,He ʼe ʼi ai ʼona pakakau ohage ko te akuila pea ʼe lele ia ʼi te lagi.
6 ʼAua naʼa ke toʼo te meʼa kai ʼa ia ʼae ʼe kaikovi,ʼAua naʼa ke manumanū ki ʼana meʼa kai lelei,
7 He ʼe hage ia ʼe ina tohi ia meʼa fuli ʼae ʼe ke kai.
ʼE ina ui atu: “Kai mo inu,” kae mole ko tona loto ʼaia.
8 ʼE ke luaʼi anai ʼau maʼaga,Pea ʼe mole he ʼuhiga anai ʼo te ʼu laupisi ʼae neʼe ke fai age.
9 ʼAua naʼa ke palalau ki he tahi ʼe vale,He ʼe ina meʼa noaʼi anai ʼau palalau fakapotopoto.
10 ʼAua naʼa ke hiki he tuʼakoi ʼafeā ʼo he kele,Pea ʼaua naʼa ke hu ki te gaueʼaga ʼo ia ʼae ʼe hala mo tamai,
11 He ʼe mafimafi tonatou Haofakiʼaga.Ko ia ʼae ka ina fakafofoga natou ʼi te faifakamau.
12 Avahi tou loto ʼo tali te fakatonutonu,Pea mo ʼou taliga ki te ʼu palalau fakapotopoto.
13 ʼE tonu ke ke akonakiʼi tou foha.*
ʼE mole mate anai moka ke ta ʼaki he kauʼi ʼakau.
14 Ta ʼaki he kauʼi ʼakauKe hao mai te Faitoka.*
15 Siʼoku foha, kapau ʼe ke liliu ʼo poto,ʼE fiafia anai toku loto.
16 ʼE au fiafia anai ʼi toku loto katoa,Moka fakaha e ʼou laugutu te meʼa ʼae ʼe totonu.
17 Ke mole maheka tou loto ki te kau agahala,Kae ke ke manavasiʼi kia Sehova ʼi te ʼaho katoa,
18 He ʼe ke maʼu ai anai he ka haʼu ʼe lelei,Pea ʼe mole puli anai tau ʼamanaki.
19 Siʼoku foha, fakalogo ke ke liliu ai ʼo poto,Takitaki tou loto ki te ala ʼae ʼe totonu.
20 ʼAua naʼa ke fakatahi mo natou ʼae ʼe natou inu fakavale te vino,Pea mo natou ʼae ʼe natou kai fakavale te kanoʼi manu,
21 He ʼe masisiva anai te kau konana mo te hahaʼi ʼae ʼe kakai fakavalevale,Pea ʼe mahaehae anai te ʼu teu ʼo natou ʼae ʼe tulemomoe.
22 Fakalogo ki tau tamai ʼae neʼe ke tupu ai,Pea ʼaua naʼa ke meʼa noaʼi tau faʼe ʼuhi pe he ʼe kua finematuʼa.
23 Totogi* te moʼoni pea ʼaua naʼa ke fakatau ʼi he temi.Toe fai feia ki te poto, te fakatonutonu pea mo te ʼatamai.
24 ʼE mahino ia, ʼe fiafia anai te tamai ʼa he faitotonu.Pea ʼe fiafia anai te tamai ʼae neʼe tupu ai he foha poto.
25 ʼE fiafia anai tau tamai mo tau faʼe,ʼEi, ʼe fiafia anai ia ia ʼae neʼe ina fanauʼi koe.
26 Siʼoku foha, foaki mai tou loto,Pea ke ke fiafia ʼi tau sioʼi ʼaku aga.
27 ʼE hage te fafine paomutu ko he luo loloto,Pea ʼe hage te fafine ʼae ʼe ina fai ni aga heʼe ʼaoga* ko he vai keli lauveliveli.
28 ʼE nono ʼo lamalama ohage ko he tagata kaihaʼa,Pea ʼe kaugamalie age te ʼu tagata heʼe agatonu ʼuhi ko ia.
29 Maʼa ai te malaʼia? Maʼa ai te lotohoha?
Maʼa ai te ʼu kē? Maʼa ai te ʼu lauga?
Maʼa ai te ʼu lavea kae mole hona tupuʼaga? Maʼa ai te ʼu mata fufula?
30 Maʼa natou ʼae ʼe konana,Maʼa natou ʼae ʼe natou leleiʼia* te vino ʼae ʼe huʼi.
31 ʼAua naʼa ke sioʼi te lanu kula ʼo te vino,ʼAe ʼe tapa gigila mo hifo lelei,
32 Koteʼuhi ki muli age, ʼe ʼusiʼusi ia ohage ko he gata,Pea ʼe kona ia ohage ko he gata kafokona.
33 ʼE ke sio anai ki ni meʼa faikehe,Pea ʼe haʼu anai mai tou loto ni manatu ʼe kovi.
34 ʼE ke hage anai ko he tagata ʼi te loto tai,Peʼe ko he tagata ʼae ʼe takoto ʼi te fuga fana ʼo he vaka.
35 ʼE ke ui anai: “Neʼe ta au, kae neʼe mole au logoʼi.*
Neʼe haha au, kae neʼe mole au iloʼi.
ʼE au ʼala koa ʼafea?
ʼE kei au fia inu pe.”
Nota ’i te lalo pasina
^ Peʼe lagi “Tuku tau mulimuli ki tou ʼatamai.”
^ Peʼe “tau fanau,” peʼe “tau tupulaga.”
^ Vakaʼi Te ʼu Kupu.
^ Peʼe “Ke ke maʼu.”
^ Hep. “ ʼae ʼe mole iloʼi.” ʼE lagi ko he fafine neʼe fakamamaʼo mai te ʼu pelesepeto ʼa te ʼAtua.
^ Peʼe “fakatahitahi moʼo ʼahiʼahi.”
^ Peʼe “mamahi.”