Kolose 3:1-25
3 Kaʼe kapau neʼe fakatuʼuake koutou mo Kilisito,* kotou haga kumi te ʼu meʼa ʼae ʼi ʼoluga, te potu ʼae ʼe heka ai ia Kilisito ʼi te toʼomataʼu ʼo te ʼAtua.
2 Kotou manatu tuʼumaʼu ki te ʼu meʼa ʼae ʼi ʼoluga, kaʼe mole ki te ʼu meʼa ʼae ʼi te kele.
3 He neʼe kotou mamate, pea neʼe fufu tokotou maʼuli ia Kilisito ʼo mulimuli ki te finegalo ʼo te ʼAtua.
4 Pea moka ha ia Kilisito, ʼae ʼe ina foaki te maʼuli,* ʼe kotou toe ha foki anai mo ia ʼi tona kololia.
5 Koia kotou tamateʼi ʼokotou koga sino* ʼae ʼe tupu ai te ʼu holi ki te ʼu felaveʼi fakasino heʼe ʼaoga,* mo te ʼu aga heʼe maʼa, mo te ʼu holi fakavalevale ki te ʼu felaveʼi fakasino, mo te ʼu holi kovi, pea mo te manumanū, ʼae ʼe ko te tauhi taula ʼatua.
6 ʼE hoko mai la te hauhau ʼo te ʼAtua, ʼuhi ko te ʼu meʼa ʼaia.
7 Mo koutou foki neʼe kotou fai* te ʼu aga ʼaia ʼi ʼokotou maʼuli ʼae ʼi te temi muʼa.*
8 Kaʼe ʼi te temi nei, ʼe tonu ke kotou fakamamaʼo mai ia koutou ia te hauhau, mo te ita, mo te agakovi, mo te ʼu laukovi, pea mo te ʼu palalau heʼe ʼaoga ʼae ʼe haʼu mai ʼokotou gutu.
9 ʼAua naʼa kotou feloiʼaki. Kaʼe kotou liakī ia te ʼulugaaga* ʼafeā pea mo te ʼu meʼa ʼae neʼe kotou fai ʼi te temi muʼa.
10 Pea kotou kofuʼi ia te ʼulugaaga foʼou, ʼae ʼe fakafoʼou ʼaki te ʼatamai malama totonu, ʼo mulimuli kia Ia ʼae neʼe ina fakatupu.
11 ʼAki te ʼulugaaga foʼou ʼaia, ʼe mole ʼi ai he Keleka peʼe ko he Sutea, he tagata silikosisio peʼe ko he tagata heʼe silikosisio, he matapule peʼe ko he Site,* he tagata kaugana peʼe ko he tagata ʼe ʼateaina, kaʼe ʼe liliu ia Kilisito ko meʼa fuli pea ko tatou ʼe tou fakatahi fuli mo ia.
12 ʼUhi ʼae neʼe filifili koutou e te ʼAtua, pea ko koutou ko ʼana fanau maʼoniʼoni pea mo ʼofaina, kotou kofuʼi te ʼofa mamahi, mo te manavaʼofa, mo te agaʼofa, mo te agavaivai,* mo te agamalū pea mo te kataki fualoa.
13 Kotou haga fekatakiʼaki, pea mo fefakamolemoleʼaki ʼaki he lotolelei, tatau aipe pe ʼe ʼi ai hokotou fihifihia mo he tahi. Ohage pe ko te lotolelei ʼa Sehova* ke fakamolemole kia koutou, ʼe tonu ke kotou toe fai feia mo koutou.
14 Kaʼe ʼo hilifaki ki te ʼu meʼa fuli ʼaia, kotou kofuʼi te ʼofa, he ʼe ina fakatahiʼi te hahaʼi ʼi hona faʼahiga aluʼaga ʼe lelei tukupau.
15 Pea ke pule ʼi ʼokotou loto te tokalelei ʼo Kilisito, koteʼuhi neʼe pauʼi koutou e te ʼAtua ke kotou liliu ko he sino ʼe tahi pea ke kotou tokalelei. Pea ke kotou fakaha tokotou lotofakafetaʼi.
16 Ke nofo te folafola ʼa Kilisito ia koutou ke kotou liliu ai ʼo popoto. Ke kotou haga akoʼi pea mo kotou haga fakalotomalohiʼi ʼihi ʼaki ni pesalemo, mo ni fakavikiviki ki te ʼAtua, mo ni katiko ʼe kotou hiva ʼaki he lotofakafetaʼi, pea mo kotou hiva kia Sehova* ʼaki ʼokotou loto katoa.
17 Tatau aipe pe kotea te ʼu palalau peʼe ko te ʼu gaue ʼe kotou fai, kotou fai ia meʼa fuli ʼi te huafa ʼo te ʼAliki ko Sesu, ʼo fakafetaʼi ki te ʼAtua te Tamai ʼaki ia ia.
18 ʼU fafine ʼohoana, kotou fakalogo ki ʼokotou ʼohoana, he ʼe ko te meʼa ʼaia ʼe lelei ki te ʼAliki.
19 ʼU tagata ʼohoana, kotou haga ʼoʼofa ki ʼokotou ʼohoana, pea ʼaua naʼa kotou iita kovi* kia natou.
20 ʼU fanau, kotou fakalogo ʼi te ʼu meʼa fuli ki ʼakotou matuʼā, he ʼe ko te meʼa ʼaia ʼe lelei ki te ʼAliki.
21 ʼU tamai, ʼaua naʼa kotou fakatupu ita ki ʼakotou fanau, naʼa natou lotovaivai ai.
22 ʼU kaugana, kotou fakalogo ia meʼa fuli ki ʼokotou pule fakatagata,* ʼo mole gata pe moka sioʼi koutou ke leleiʼia koutou e te hahaʼi, kaʼe ke kotou fakalogo ʼaki he loto katoa, ʼo kotou manavasiʼi kia Sehova.*
23 Ko he meʼa pe ʼe kotou fai, kotou gaue ʼaki ʼokotou loto* katoa, ohage ʼe kotou gaue kia Sehova* kaʼe mole ki te tagata.
24 He ʼe kotou iloʼi ʼe kotou maʼu anai mai ia Sehova* te tofiʼa ohage ko he fakapale. Kotou kaugana ki te Pule, ia Kilisito.
25 ʼE mahino papau ia, ko ia ʼae ʼe ina fai te kovi ʼe toe liufaki age anai ʼo mulimuli ki te kovi ʼae neʼe ina fai, pea ʼe mole fai he fakapalatahi.
Nota ’i te lalo pasina
^ Vakaʼi Te ʼu Kupu Mo ʼOna Fakaʼuhiga.
^ ʼI te Fakakeleka, “Kilisito, totatou maʼuli.”
^ ʼI te Fakakeleka, “ ʼokotou koga sino ʼae ʼe ʼi te kele.”
^ ʼI te Fakakeleka, pornéïa. Vakaʼi Te ʼu Kupu Mo ʼOna Fakaʼuhiga.
^ Peʼe “haʼele ʼi.”
^ Peʼe “ ʼi te temi ʼae neʼe kotou maʼuʼuli feia ai.”
^ ʼI te Fakakeleka, “tagata.”
^ Neʼe ko he higoa neʼe foaki ki te hahaʼi ʼae neʼe meʼa noaʼi ʼuhi ko ʼanatou aga mo agaʼi fenua.
^ Peʼe “fiamalalo.”
^ Vakaʼi Te ʼu Kupu Mo ʼOna Fakaʼuhiga.
^ Vakaʼi Te ʼu Kupu Mo ʼOna Fakaʼuhiga.
^ Peʼe “agafefeka.”
^ ʼI te Fakakeleka, “ ʼi te kakano.”
^ Vakaʼi Te ʼu Kupu Mo ʼOna Fakaʼuhiga.
^ ʼI te Fakakeleka, psukhê. Vakaʼi Te ʼu Kupu Mo ʼOna Fakaʼuhiga.
^ Vakaʼi Te ʼu Kupu Mo ʼOna Fakaʼuhiga.
^ Vakaʼi Te ʼu Kupu Mo ʼOna Fakaʼuhiga.