Luka 7:1-50
7 ʼI tana ʼosi fai te ʼu palalau ʼaia ki te hahaʼi, neʼe alu ai leva ki Kapenaume.
2 Neʼe ʼi ai te tagata faifekau ʼa te pule solia,* ʼae neʼe ʼofa ai, neʼe mahaki kovi pea neʼe kua vave mate.
3 ʼI tana logo ki te palalau ʼo ʼuhiga mo Sesu, neʼe ina fekauʼi ʼihi takitaki Sutea ke natou olo ʼo kole age kia te ia ke haʼu ʼo fakamalolo tana tagata faifekau.
4 Neʼe natou olo ai ʼo kamata kolekole fenei age kia Sesu: “ ʼE tau mo ia ke ke fakahoko te faʼahi ʼaia,
5 he ʼe ʼofa ki tatatou hahaʼi pea ko ia totonu ʼae neʼe ina laga tomatou sinakoka.”
6 Koia neʼe alu ai ia Sesu mo natou. Kaʼe ʼi tana vave tau atu ki te ʼapi, neʼe fekauʼi mai e te pule solia ʼona kaumeʼa ke natou ui fenei age: “Tagata, ʼaua naʼa ke fakakinakina, koteʼuhi ʼe mole tuha mo au ke ke hu ki toku loto fale.
7 Koia neʼe au manatu ai ʼe mole tau mo au ke au alu atu kia te koe. Kaʼe ke ke fai pe koe he fakatotonu pea ʼe malolo anai taku tagata faifekau.
8 Koteʼuhi mo au foki ʼe ʼi ai toku pule pea ʼe au puleʼi he kau solia. Pea ka au ui ki he tahi ‘Alu’ pea ʼe alu ia, pea ki he tahi age ‘Haʼu’ pea ʼe haʼu ia, pea ki taku tagata kaugana ‘Fai te meʼa ʼae’ pea ʼe ina fai.”
9 ʼI te logo ʼa Sesu ki te ʼu palalau ʼaia, neʼe punamaʼuli ai ʼo ʼuhiga mo ia, pea neʼe haga mai ki te hahaʼi ʼae neʼe mulimuli ia te ia ʼo ina ui fenei: “ ʼE au tala atu kia koutou, maʼia ʼi Iselaele ʼe heʼeki au maʼu he tagata tui malohi feia.”
10 Pea ʼi te toe liliu atu ʼa natou ʼae neʼe fekauʼi, neʼe natou maʼu atu te tagata faifekau kua malolo.
11 Mole faʼa fualoa ki ai pea neʼe alu leva ki te kolo ʼe higoa ko Naini, pea neʼe kaugā fagona mo ia ʼana tisipulo mo te hahaʼi tokolahi.
12 ʼI tana fakaovi atu ki te huʼaga ʼo te kolo, neʼe fata mai te mate, ko te tama ʼulu tokotahi ʼo tana faʼe. Pea tahi ʼae neʼe ko te fafine vitua. Pea neʼe toe fakatahi mo ia te hahaʼi tokolahi ʼo te kolo.
13 ʼI te sio ʼa te ʼAliki kia ia, neʼe ʼofa mamahi ai, pea neʼe ina ui fenei age: “Tuku tau tagi.”
14 Neʼe fakaovi age ʼo fa ki te fata,* ʼo tutuʼu ai te kau fata. Pea ina ui fenei: “Tupulaga, ʼe au ui atu, tuʼu ake!”
15 Neʼe mafuta ake te mate ʼo kamata palalau, pea neʼe tuku age leva e Sesu ia ia ki tana faʼe.
16 Neʼe natou manavasiʼi fuli ai, ʼo natou kamata fakakololiaʼi fenei te ʼAtua: “Kua tupu ia tatou he polofeta lahi,” pea, “Kua tokagaʼi e te ʼAtua tana hahaʼi.”
17 Pea neʼe mafola te logo ʼaia ʼo ʼuhiga mo ia ʼi te ʼu tafaʼaki fuli pea mo Sutea katoa.
18 Neʼe fakamatala age e te ʼu tisipulo ʼa Soane kia ia te ʼu meʼa fuli ʼaia.
19 Koia neʼe pauʼi e Soane ʼana tisipulo ʼe toko lua ʼo fekauʼi naua ki te ʼAliki ke nā fakalavelave fenei age: “ ʼE ko koe koa ia Ia ʼae ʼe tonu ke haʼu, peʼe tonu koa ke matou fakaatalitali ki he tahi age?”
20 ʼI tanā ʼomai kia te ia, neʼe ui fenei e te ʼu tagata: “Neʼe fekauʼi mai maua kia te koe e Soane Patita ke ma fakalavelave atu: ‘ ʼE ko koe koa ia Ia ʼae ʼe tonu ke haʼu, peʼe tonu koa ke matou fakaatalitali ki he tahi age?’ ”
21 ʼI te hola ʼaia, neʼe ina fakamalolo te hahaʼi tokolahi neʼe tau mo te ʼu mahaki kehekehe, neʼe ulu sino ai te ʼu laumalie kovi, pea tokolahi te hahaʼi kivi neʼe natou toe sisio.
22 Neʼe ina tali fenei age kia naua: “Kolua olo pea kolua fakamatala kia Soane ia te ʼu meʼa ʼaeni ʼe kolua sisio pea mo logo ki ai: Kua sisio te kau kivi, kua haʼele te kau ketu, kua fakamaʼa te kau kilia, kua logo te kau tuli, kua fakatuʼuake te kau mate pea kua tala ia te logo lelei ki te kau masisiva.
23 Manuʼia ia ia ʼae ʼe mole tukia ʼo tupu ko au.”
24 ʼI te mavae atu ʼa te kau ʼave logo ʼa Soane, neʼe kamata palalau fenei ia Sesu ki te hahaʼi kaugā malie ʼo ʼuhiga mo Soane: “Kotea ʼae neʼe kotou olo ʼo vakaʼi ʼi te toafa? Ko he kaho koa neʼe fakagaūgaūe e te matagi?
25 Kotea ʼae neʼe kotou sisio ki ai? Ko he tagata koa neʼe teu matalelei? ʼE mahino ia, ko natou ʼae ʼe teu matalelei pea mo maʼuli fakaʼaliʼaliki ʼe natou nonofo ʼi te ʼu fale hau.
26 Koia, he koʼe neʼe kotou olo ki te toafa? Ke kotou sisio ki he polofeta? ʼEi, pea ʼe au tala atu, ʼe maʼuhiga age ia ʼi he polofeta.
27 Neʼe tohi fenei ʼo ʼuhiga mo ia: ‘ ʼE au fekauʼi taku tagata ʼave logo ke muʼamuʼa ia koe, ke ina teuteuʼi tou ala.’
28 ʼE au tala moʼoni atu kia koutou, ia natou ʼae neʼe tutupu mai he ʼu fafine, ʼe mole he tahi ʼe lahi age ia Soane, kaʼe ko ʼae ʼe veliveli ʼi te Puleʼaga ʼo te ʼAtua, ʼe lahi age ia ia.”
29 (ʼI te logo ki ai ʼa te hahaʼi fuli pea mo te kau tanaki tukuhau, neʼe natou tala ai ʼe faitotonu te ʼAtua, koteʼuhi neʼe papitemaʼi natou ʼaki te papitema ʼa Soane.
30 Kaʼe ko te kau Faliseo pea mo natou ʼae ʼe popoto ʼi te Lao neʼe natou meʼa noaʼi te tokoni* ʼa te ʼAtua ʼo ʼuhiga mo natou, koteʼuhi neʼe mole ina papitemaʼi natou.)
31 “ ʼE au fakatatau anai koa kia ai ia te hahaʼi ʼo te taʼiake ʼaeni pea ʼe natou hage ko ai?
32 ʼE natou hage ko he ʼu fanau ʼe heheka ʼi te fakatauʼaga koloa pea mo natou kalaga fenei ki ʼihi fanau: ‘Neʼe matou puhi fagufagu maʼa koutou kaʼe neʼe mole kotou memeʼe, neʼe matou tagilaulau kaʼe neʼe mole kotou fetagihi.’
33 ʼO toe feia pe, neʼe haʼu ia Soane Patita, neʼe mole kai ki he moʼi pane pea neʼe mole inu ki he vino, kaʼe ʼe kotou ui fenei: ‘ ʼE nofo mo he temonio.’
34 Pea neʼe haʼu te Foha ʼo te tagata ʼo kai pea mo inu, kaʼe ʼe kotou ui fenei: ‘Ko te tagata ʼaeni ʼe kai pea mo inu fakavale,* pea ʼe kaumeʼa mo te kau tanaki tukuhau mo te kau agahala.’
35 Kaʼe ʼe ha* te poto ʼi ʼana fanau* fuli.”
36 Pea ko te tahi ʼi te kau Faliseo neʼe ina kole fakakinau age ke kakai mo ia. Neʼe hu ai ki te ʼapi ʼo te Faliseo pea mo heka ʼi te laupapa.
37 ʼI te kolo, neʼe ʼi ai te fafine agahala pea ʼi tana iloʼi ʼae ʼe kai ʼi te ʼapi ʼo te Faliseo, neʼe haʼu ai mo te hina lolo magoni.
38 Neʼe tuʼutuli ifo ʼi ʼona tuʼa, ʼo tagi pea mo kamata palapalaʼi ʼona vaʼe ʼaki ʼona loʼimata, pea mo holoholoʼi ʼaki tona lauʼulu. Pea neʼe ʼuma mamahi ki ʼona vaʼe pea mo takaī ʼaki te lolo magoni.
39 ʼI tana sio ki ai, neʼe manatu fenei te Faliseo ʼae neʼe faifakaafe: “Kapau ʼe ko he polofeta moʼoni ia te tagata ʼaeni, ʼe ina iloʼi pe ko te faʼahiga fafine feafeaʼi ʼae ʼe fa age ki ai, ʼe ko he fafine agahala.”
40 Kaʼe neʼe tali fenei age e Sesu kia ia: “Simone, ʼe ʼi ai te meʼa ʼe au fia ui atu.” Neʼe ina tali fenei age: “ ʼAliki, ui mai koe!”
41 “Ko tagata ʼe toko lua neʼe tuʼu maʼua ki he tagata, ko te maʼua ʼo te tahi ko tenalio* ʼe 500 pea ko te tahi age ko te 50.
42 ʼI te mole feala ʼae ke nā huʼi ʼonā maʼua, neʼe ina fakamolemole kia naua ʼaki he lotolelei. Koia, ko ai ia naua ʼae ka ʼofa lahi anai kia ia?”
43 Neʼe tali fenei age e Simone: “ ʼI taku manatu, ko ia ʼae neʼe lahi age tana fakamolemole ki ai.” Neʼe ina tali fenei age kia ia: “ ʼE tonu tau tali.”
44 Pea neʼe haga leva ki te fafine mo ui fenei kia Simone: “Sio ki te fafine ʼaeni. ʼI taku hu mai ki tou loto fale, neʼe mole ke foaki mai he moʼi vai ki ʼoku vaʼe. Kaʼe ko te fafine ʼaeni neʼe ina palapalaʼi ʼoku vaʼe ʼaki ʼona loʼimata pea neʼe ina holoholoʼi ʼaki tona lauʼulu.
45 Neʼe mole ke ʼuma mai, kaʼe ko te fafine ʼaeni, talu mai te hola ʼae neʼe au tau mai ai, neʼe haga ʼuma mamahi pe ki ʼoku vaʼe.
46 Neʼe mole ke takaī lolo toku ʼulu, kaʼe ko te fafine ʼaeni neʼe ina takaī ʼaki te lolo magoni ʼoku vaʼe.
47 ʼE au tala atu kia koutou, ʼuhi ko te faʼahi ʼaia, ʼe fakamolemole ʼana agahala, logope la tona lahi, he neʼe ʼofa lahi. Kaʼe ko ʼae ʼe fakamolemole veliveli pe ki ai, ʼe veliveli pe tona ʼofa.”
48 Pea neʼe ina ui fenei age ki te fafine: “Kua fakamolemole ʼau agahala.”
49 Ko natou ʼae neʼe nonofo mo ia ʼi te laupapa neʼe natou kamata feuiʼaki fenei: “Ko ai te tagata ʼaeni ʼae ʼe ina lava fakamolemole mo te ʼu agahala?”
50 Kaʼe neʼe ina ui fenei age ki te fafine: “Kua haofaki koe e tau tui, alu la ʼi te fimalie.”
Nota ’i te lalo pasina
^ ʼE pule ki he kau solia ʼe toko 100.
^ Peʼe “takotoʼaga ʼo te mate.”
^ Peʼe “takitaki.”
^ ʼI te Fakakeleka, “inu lahi te vino.”
^ Peʼe “fakatonuhia.”
^ Peʼe “ ʼona fua.”
^ Vakaʼi Te ʼu Kupu Mo ʼOna Fakaʼuhiga.