Maleko 3:1-35
3 ʼI tana toe hu ki te sinakoka, neʼe ʼi ai te tagata neʼe nima mate.
2 Pea neʼe natou lamalama ia ia pe ʼe ina fakamalolo anai te tagata ʼaia ʼi te Sapato, ke tupu ai hanatou fakalakahalaʼi ia ia.
3 Neʼe ina ui fenei age ki te tagata nima mate: “Tuʼu ake pea ke haʼu ki lotomalie.”
4 Pea neʼe ina ui fenei age kia natou: “ ʼE gafua koa ʼi te Lao ke fai he meʼa ʼe lelei peʼe kovi ʼi te Sapato, ke haofaki ai he maʼuli,* peʼe ke matehi?” Kaʼe neʼe mole gu he tahi.
5 ʼI tana fesioʼaki, neʼe ita mo lotomamahi ʼaupito ai ʼuhi ko tanatou lotofefeka. Neʼe ina ui fenei age leva ki te tagata: “Faoʼi tou nima.” Neʼe ina faoʼi tona nima pea neʼe lelei ai.
6 Pea neʼe mavae leva ia te kau Faliseo ʼo natou fonofono atu aipe mo natou ʼae ʼe lagolago ki te faʼahi ʼo Helote, ke natou matehi ia ia.
7 Kaʼe neʼe alu leva ia Sesu mo ʼana tisipulo ki te matatai, pea neʼe mulimuli ia te ia te hahaʼi tokolahi mai Kalilea pea mo Sutea.
8 Neʼe toe ʼomai kia te ia he hahaʼi tokolahi mai Selusalemi mo Itumeo pea mo te tahi kauvai ʼo Solotane pea mo te ʼu tafaʼaki ʼo te ʼu kolo ʼo Tile mo Sitoni, ʼi tanatou logo ki te ʼu gaue lalahi ʼae neʼe ina fai.
9 Pea neʼe ina kole ki ʼana tisipulo ke teuteuʼi he kiʼi vaka maʼa ia ke ʼaua naʼa ʼefihia ʼi te hahaʼi.
10 ʼUhi ko tana fakamalolo te tokolahi, ko natou fuli ʼae neʼe tau mo te ʼu mahaki faigataʼa neʼe natou faigaʼi ke natou fakaovi mai kia te ia ʼo fa ki ai.
11 ʼO toe feia aipe mo te ʼu laumalie kovi, ʼi tanatou sisio ʼae kia te ia, neʼe natou tulolo ifo ʼi ʼona muʼa ʼo natou kalaga fenei: “Ko koe ko te ʼAlo ʼo te ʼAtua.”
12 Kaʼe neʼe tuʼa lahi tana fakatotonu malohi age kia natou ke ʼaua naʼa natou palalau ʼo ʼuhiga mo ia.
13 Neʼe hake ia ki te moʼuga pea ina pauʼi ia natou ʼae neʼe loto ki ai, ʼo natou ʼomai ai kia te ia.
14 Pea neʼe ina fakatahiʼi* te toko 12, ʼae neʼe ina toe fakahigoaʼi ko te kau apositolo, ke natou kaugā fagona mo ia, mo fekauʼi natou ke natou olo ʼo faifakamafola
15 pea ke natou maʼu te malohi moʼo kapu ʼaki te ʼu temonio.
16 Pea ko te toko 12 ʼae neʼe ina fakatahiʼi* neʼe ko Simone ʼae neʼe ina toe fakahigoa’i ko Petelo,
17 mo Sakopo te foha ʼo Sepeteo pea mo tona tehina ko Soane (pea neʼe ina toe fakahigoaʼi naua ko Poanelesese, ko tona fakaʼuhiga “Te ʼu Foha ʼo Te Mana”),
18 mo Atelea, mo Filipo, mo Paletolomeo, mo Mateo, mo Tomasi, mo Sakopo te foha ʼo Alefeo, mo Tateo, mo Simone ʼae ʼe toe higoa ko te Kananite,*
19 pea mo Sutasi Isekaliote, ʼae neʼe ina lavakiʼi ia Sesu ki muli age.
Neʼe hu ia ki he loto fale,
20 pea neʼe toe fakatahitahi mai te hahaʼi, ʼo mole pe la feala ke natou kakai.
21 Kaʼe ʼi te logo ʼo tona famili ki te faʼahi ʼaia, neʼe natou ʼomai ke natou ʼave ia ia, he neʼe natou ui fenei: “Kua ʼulu vale ia.”
22 Pea ʼi te ʼomai ʼa te kau sekelipa mai Selusalemi, neʼe natou ui fenei: “Kua ulu sino ia Pelesepu* ʼi te tagata ʼaeni, pea ʼe ina kapu te kau temonio ʼaki te malohi ʼo te pule ʼo te kau temonio.”
23 Pea ʼi tana ʼosi pauʼi age natou kia te ia, neʼe palalau age kia natou ʼaki te ʼu lea fakatata ʼaeni: “ ʼE lava kapu feafeaʼi e Satana ia Satana?
24 ʼE mole tuʼu fualoa anai he puleʼaga mo kapau ʼe fetauʼaki pe tana hahaʼi.
25 Pea ʼe mole tuʼu fualoa anai he ʼapi mo kapau ʼe fetauʼaki pe te ʼu hahaʼi ʼo tona loto fale.
26 Koia, kapau ko Satana ʼe fakafeagai pe kia ia totonu pea mo fetauʼaki ia natou ʼae ʼe kau mo ia, pea ʼe mole tuʼu malohi anai, kaʼe ʼe pulihi anai ia.
27 Pea tahi, ke ulufi e he tahi he ʼapi ʼo he tagata malohi ʼo kaihaʼa ʼona koloa, ʼe tonu muʼa ke ina haʼihaʼi te tagata malohi ʼaia. Pea ʼe hoki feala leva ke ina kaihaʼa tona ʼapi.
28 Pea ʼe au tala moʼoni atu kia koutou, ko he faʼahiga agahala pe peʼe ko he faʼahiga laukovi pe ʼe fai e te ʼu foha ʼo te tagata, ʼe fakamolemole anai kia natou.
29 Kaʼe ko ʼae ʼe laukovi ki te laumalie maʼoniʼoni, ʼe mole fakamolemole anai ki ai ʼo talu ai, he ʼe lakahala ia ʼo heʼe gata ʼuhi ko tana agahala.”
30 Neʼe ina fai te ʼu palalau ʼaia he neʼe natou ui fenei: “ ʼE ulu sino te laumalie kovi ʼi te tagata ʼaeni.”
31 Pea neʼe ʼomai tana faʼe mo ʼona tehina, ʼo tutuʼu ʼi tuʼa, pea natou kole ki he tahi ke alu ʼo pauʼi mai ia ia.
32 Neʼe nonofo takai te hahaʼi tokolahi ia ia, pea neʼe fakaha age kia ia: “Koʼe tau faʼe mo ʼou tehina ʼi tuʼa, ʼe natou fia palalau mo koe.”
33 Kaʼe neʼe ina tali fenei age: “Ko ai taku faʼe, pea ko ai ʼoku tehina?”
34 Pea ʼi tana ʼosi sio kia natou ʼae neʼe nonofo ʼi ʼona tafa, neʼe ina ui fenei: “Koʼeni taku faʼe pea mo ʼoku tehina!
35 Ko ʼae ʼe ina fai te finegalo ʼo te ʼAtua, ʼe ko ia ʼaia ko toku tehina, mo toku tuagaʼane pea mo taku faʼe.”
Nota ’i te lalo pasina
^ ʼI te Fakakeleka, psukhê. Vakaʼi Te ʼu Kupu Mo ʼOna Fakaʼuhiga.
^ Peʼe “fakanofo.”
^ Peʼe “fakanofo.”
^ Peʼe “ko te tagata faʼafai.”
^ Ko te tahi higoa ʼo Satana.