Selemia 25:1-38
25 Neʼe palalau leva te ʼAtua kia Selemia ʼo ʼuhiga mo te hahaʼi katoa ʼo Suta. Neʼe ko te fa taʼu ʼaia ʼo te pule ʼa Soakimi, foha ʼo Sosiasi, hau ʼo Suta pea mo te ʼuluaki taʼu ʼo te pule ʼa te Hau ʼo Papiloni ko Nepukanesa.
2 Koʼeni te meʼa ʼae neʼe ui e te polofeta ko Selemia ʼo ʼuhiga mo* te hahaʼi katoa ʼo Suta pea mo te hahaʼi katoa ʼo Selusalemi:
3 “Kua taʼu 23 ia te palalau mai ʼa Sehova, talu mai te 13 taʼu ʼo te pule ʼa Sosiasi, foha ʼo Amone, hau ʼo Suta ʼo kaku mai ki te temi nei. Pea neʼe au palalau liuliuga atu kia koutou kae neʼe mole kotou fia fakalogo.
4 Pea neʼe fekauʼi atu e Sehova ʼana tagata faifekau fuli, ia te ʼu polofeta. Neʼe ina fekauʼi liuliuga atu ia natou kae neʼe mole kotou fia fakalogo mo tokagaʼi ia natou.
5 Neʼe natou ui: ‘ ʼE au kole atu kia koutou fuli, kotou liʼaki takotou aga ʼae ʼe kovi mo ʼakotou gaue ʼae ʼe kovi. Pea ʼe kotou nonofo fualoa anai ʼi te fenua ʼae neʼe foaki atu e Sehova ʼi te temi muʼa kia koutou mo ʼakotou kui.
6 ʼE kotou fakamamahiʼi au ʼi takotou faʼu ni fakatata. ʼAua naʼa kotou fakalogo ki ʼihi ʼatua, mo tauhi pea mo tulolo ʼi ʼonatou muʼa, naʼa au fakahoko anai he malaʼia kia koutou.’
7 “ ‘Kae neʼe mole kotou fia fakalogo mai,’ ko te ui ʼaia ʼa Sehova. ‘Neʼe kotou fakamamahiʼi au ʼi takotou faʼu ni fakatata ʼo kotou malaʼia ai.’
8 “Koia koʼeni te folafola ʼa Sehova ʼo te ʼatu kautau: ‘ “Neʼe mole kotou fia fakalogo ki ʼaku folafola,”
9 ko te ui ʼaia ʼa Sehova, “koia ʼe au pauʼi te ʼu puleʼaga fuli ʼo te potu noleto pea ʼe au pauʼi taku tagata faifekau ia te Hau ʼo Papiloni ko Nepukanesa. ʼE au fekauʼi mai anai ke natou ʼohofi te fenua ʼaeni, mo ʼana hahaʼi pea mo te ʼu puleʼaga fuli ʼae ʼi ʼona tafaʼaki. ʼE au maumauʼi anai ia te fenua pea mo te ʼu puleʼaga ʼaia. ʼE natou liliu anai ʼo fakalialia mo fehiʼaʼinaʼi ʼo vekaʼi ai natou, pea ʼe tuʼu maumau anai ʼo talu ai.
10 ʼE au fakagata anai ia te ʼu kalaga fakafiafia. ʼE mole toe logo anai ki te leʼo ʼo te tagata ʼohoana peʼe ko te leʼo ʼo te fafine ʼohoana, mo te logoaʼa ʼo te meʼa momosi fulumeto. Pea ʼe mole toe mu anai ia te malama.
11 ʼEi, ʼe maumauʼi anai ia te fenua katoa pea ʼe liliu anai ʼo fakalialia. Pea ʼe tonu anai ke tauhi e te ʼu puleʼaga ʼaia ia te hau ʼo Papiloni ia taʼu ʼe 70.” ’
12 “ ʼE ui e Sehova: ‘ ʼI te hili ʼo te ʼu taʼu ʼaia ʼe 70, ʼe au tauteaʼi anai ia te hau ʼo Papiloni mo te puleʼaga ʼaia ʼuhi ko tanatou hala, pea ʼe au fakatuʼu lavaki anai ia te fenua ʼo te kau Kaletea ʼo talu ai.
13 ʼE au fakahoko anai ki te fenua ʼaia ia te ʼu folafola ʼae neʼe au fakaha ʼo ʼuhiga mo ia, ia te ʼu meʼa fuli ʼae ʼe tohi ʼi te tohi ʼaeni, ʼae neʼe fakakikite e Selemia ʼo ʼuhiga mo te ʼu puleʼaga fuli.
14 ʼE fakapopulaʼi anai natou e ni puleʼaga ʼe kaugamalie mo ni hau ʼe malolohi, pea ʼe au liufaki anai kia natou te meʼa ʼae ʼe tuha mo ʼanatou gaue pea mo ʼanatou aga.’ ”
15 Koʼeni te folafola ʼae neʼe ui mai e Sehova, te ʼAtua ʼo Iselaele: “Toʼo ʼi toku nima ia te ipu vino ʼaeni ʼo toku hauhau pea ke fakainu ʼaki ia te ʼu puleʼaga fuli ʼae ʼe au fekauʼi koe ki ai.
16 ʼE natou iinu anai mo siʼia pea ʼe natou hage anai ko ni kau vavale ʼuhi ko te heleta ʼae ʼe au fakaʼaogaʼi moʼo taʼi ʼo natou.”
17 Neʼe au toʼo leva te ipu ʼi te nima ʼo Sehova ʼo fakainu ʼaki ia te ʼu puleʼaga fuli ʼae neʼe fekauʼi au e Sehova ki ai:
18 neʼe au kamata ʼi Selusalemi mo te ʼu kolo ʼo Suta, mo ʼona hau pea mo ʼona tama ʼaliki ke liliu ai ko he koga meʼa ʼe tuʼu lavaki, mo fakalialia,mo fehiʼaʼinaʼi pea ke talanoaʼi ʼi te ʼu faitutuku, he ʼe tonu ke hoko ʼi te temi nei.
19 Pea neʼe au fakainu ʼaki ia te hau ʼo Esipito ko Falaone, mo ʼana tagata faifekau, mo ʼana tama ʼaliki, mo tana hahaʼi fuli,
20 ʼo feia mo te kau matapule fuli ʼae ʼe nonofo ʼi tonatou fenua, pea mo te ʼu hau fuli ʼo te fenua ʼo Usia, mo te ʼu hau fuli ʼo te fenua ʼo te kau Filisitini, mo Asekaloni, mo Kasa, mo Ekelone pea mo natou ʼae ʼe kei nonofo ʼi Asoti,
21 mo Etome, mo Moape pea mo te kau Amone,
22 mo te ʼu hau fuli ʼo Tile, mo te ʼu hau fuli ʼo Sitoni pea mo te ʼu hau ʼo te motu ʼae ʼe tuʼu ʼi te tai,
23 mo Tetane, mo Tema, mo Puse pea mo natou fuli ʼae neʼe tuʼusi ʼonatou lauʼulu ki ʼonatou niania,
24 mo te ʼu hau fuli ʼo te kau Alape pea mo te ʼu hau fuli ʼo te ʼu puleʼaga kehekehe ʼae ʼe nonofo ʼi te toafa,
25 mo te ʼu hau fuli ʼo Simili, mo te ʼu hau fuli ʼo Elame pea mo te ʼu hau fuli ʼo Metia,
26 pea ʼe fefakahoahoaʼaki ia te ʼu hau fuli ʼo te potu noleto pe ʼe tuʼu ovi peʼe tuʼu mamaʼo, mo te ʼu puleʼaga fuli ʼae ʼo te malamanei, pea ʼe inu fakamuli leva ia te hau ʼo Sesake.*
27 “Pea ʼe tonu anai ke ke ui age kia natou: ‘Koʼeni te folafola ʼa Sehova ʼo te ʼatu kautau, te ʼAtua ʼo Iselaele: “Kotou iinu, kotou konahihia mo lulua. Kotou fetokaʼi pea ke mole kotou toe lava tutuʼu ake ʼuhi ko te heleta ʼae ʼe au fakaʼaogaʼi moʼo taʼi ʼaki ʼo koutou.” ’
28 Pea kapau ʼe mole natou fia toʼo ʼi tou nima ia te ipu ʼo inu, ui age kia natou: ‘Koʼeni te folafola ʼa Sehova ʼo te ʼatu kautau: “ ʼE au fakatotonu atu, kotou inu!
29 ʼE mahino ia, kapau ʼe au fakahoko muʼa ia te malaʼia ki te kolo ʼae ʼe tuʼu ai toku huafa, pea ʼe tonu ia ke toe tauteaʼi mo koutou.” ’
“ ‘ ʼEi, ʼe mole kotou hao anai mai te tautea he ʼe au fakaʼaogaʼi te heleta moʼo taʼi ʼo te hahaʼi fuli ʼo te kele,’ ko te ui ʼaia ʼa Sehova ʼo te ʼatu kautau.
30 “ ʼE ke fakakikite anai kia natou ia te ʼu folafola fuli ʼaeni ʼo ke ui:‘ ʼE gugulu anai ia Sehova mai ʼoluga,Pea mai te koga meʼa taputapu ʼae ʼe nofo ai ʼe logo anai tona leʼo.
ʼE gugulu malohi anai ki tona nofoʼaga.
ʼE kalaga anai ohage ko natou ʼae ʼe natou malamalaki te vite ʼi te lomiʼaga vite.ʼE ina hiva anai he hiva ʼo tana malo ki te hahaʼi fuli ʼo te kele.’
31 ‘ ʼE kaku anai he toe logoaʼa ki te ʼu potu taupotu ʼo te kele,Koteʼuhi ʼe fihi ia Sehova mo te ʼu puleʼaga.
ʼEi, ʼe ina fakamauʼi totonu anai ia te hahaʼi fuli.
Pea ʼe ina tuku anai ia te kau agakovi ki te heleta,’ ko te ui ʼaia ʼa Sehova.
32 Koʼeni te folafola ʼa Sehova ʼo te ʼatu kautau:
‘Kua hoko he malaʼia mai he puleʼaga ki he tahi age puleʼaga.Kua to he toe afā ki te ʼu potu mamaʼo ʼo te kele pea ʼe haʼu nei.
33 “ ‘ ʼI te ʼaho ʼaia, ʼe matehi anai e Sehova ni hahaʼi mai he potu ki he tahi potu ʼo te kele. ʼE mole tagiʼi anai natou, ʼe mole tanaki anai ʼonatou sino pea ʼe mole tanu anai ia. ʼE natou hage anai ko he meʼa fakagakokele.’
34 ʼU tauhi ovi, kotou lauga mo kalaga!
ʼU tagata maʼuhiga ʼo te faga ovi, kotou teka makafulifuli ʼi te kele,Koteʼuhi kua hoko mai te temi ʼae ka matehi mo fakamavetevete ai koutou.ʼEi, ʼe kotou maluluku anai ohage ko he ipu maʼuhiga.
35 ʼE mole ʼi ai he koga meʼa ke feholaki ki ai te ʼu tauhi ovi,Pea ʼe mole feala ke feholaki ia te ʼu tagata maʼuhiga ʼo te faga ovi.
36 Kotou fagono! ʼE kalaga te ʼu tauhi ovi,Pea ʼe lauga te ʼu tagata maʼuhiga ʼo te faga ovi,Koteʼuhi ʼe maumauʼi e Sehova tonatou koga meʼa lunaʼia.
37 Kua lavaki te ʼu koga meʼa ʼae neʼe maʼuli tokalelei ai te hahaʼiʼUhi ko te hauhau ʼo Sehova.
38 Neʼe mavae ʼi tona nofoʼaga ohage ko he laione kei mui,Koteʼuhi kua liliu tonatou fenua ʼo fakalialiaHe neʼe mole ʼofa ʼi tana fakaʼaogaʼi ia te heletaPea neʼe ina fakato tona hauhau kia natou.”