Jesus ma tô tiꞌru tidzadawa dzamarĩꞌwa norĩ ma da te ꞌrãtiꞌi dzaꞌra da. (Tsõré na Mateus 28:19, 20.) E marĩ bété daꞌrãti. Duré e niha niꞌwa daꞌrãti te dza tsina uwaimra.

1. E marĩ daꞌrãti.

Damreme “daꞌrãti” grego mreme na te watsuꞌu ö ꞌre dadzébré niwamhã ö dawabdzuri. Ãne ma watobro Jesus dzô da te ꞌrãtiꞌi wamhã ö Jordão ãma. Ĩhöiba wahuré ma tô uptsi ö na hã. Taha wa, Ropotoꞌwai mreme te tinha ‘ö hawi ĩwatobro na hã.’ (Marcos 1:9, 10) Jesus ne hã, ĩtsadawa dzamarĩꞌwa ĩꞌuptabi norĩ da te ꞌrãtiꞌi dzaꞌra wamhã tihöiba wahuré hã te dza ꞌmadzatsi ö ꞌre.

2. E marĩ niꞌwa te dza höiꞌré da te ꞌrãtiꞌi wamhã.

Tiꞌrãtiꞌi na niꞌwa te dza höiꞌré te te tsina ĩropitsutu na Jeová ma. E niha te dza tsina ropitsutu. ꞌRãtiꞌi õ ré, te dza rowaptẽ Jeová wi te te tãma nharĩ da, dza õhõ ma tsi te te ꞌre ĩromhuri uꞌötsi mono na. Te dza ropitsutu Jeová ãma tsi wata da duré te te tsima ĩwẽdzé hã te te natsi ꞌmanharĩ da marĩ danhipai u ĩpire na tihöimanadzéb ꞌre. Ãne mono hã te dza tsadawa dzama Jesus höimanadzé duré ĩtsimirowahudu te te ĩnharĩdzéb dzarina: ‘Niꞌwa hã ĩ̱dzarina ꞌre morĩ da, te te tsima wẽ wamhã, poꞌre tsiꞌöri te te tsima ꞌre ĩwẽ mono dzéb dzarina ꞌre ĩhöimana mono dzém na hã, wede [ꞌrãtõ] te te öri, ĩ̱dzarina morĩ da.’ (Mateus 16:24) Datsina ropitsudu duré daꞌrãtiꞌi uꞌöbö tsada hã Jeová ãma datsiwaihuꞌu uptabi dzaꞌra da duré ãma ĩwata dzaꞌra norĩ ãma.

3. Niꞌwa da te ꞌrãtiꞌi da hã, e marĩ te te tsina ĩꞌuwaimrami da tsi.

Aiꞌrãtiꞌi õ ré, Jeová ãma ĩwaihuꞌu da tsi duré ãma ĩꞌatsimidzadze nhiptete da tsi. (Tsõré na Hebreus 11:6.) Atsimirowaihu duré atsimidzadze ãma ꞌre tsaꞌẽtẽ mono tsidöpötsi, atsimidzawidzé Jeová ãma te dza duré tidzaꞌẽtẽ. Tawamhã, tô tsena te dza atsima ĩwẽ dama ãma roꞌmahörö da duré ĩtsimiroti dzarina ꞌre aihöimana mono da. (2 Timóteo 4:1, 2; 1 João 5:3) Niꞌwa ‘[Jeová] te te tsima ꞌre ĩwẽ mono dzéb dzarina ꞌre höimana mono wamhã te te tãma ꞌre rowẽ mono da’ ãté te dza tãma tsina ropitsutu duré te dza ꞌrãtiꞌi ni. — Colossenses 1:9, 10. a

 WAIHUꞌU DURÉ

4. E marĩ, wa waihuꞌu dzaꞌra ni Jesus ꞌrãtiꞌi watsuꞌu na.

Atsiré tsõré aba Mateus 3:13-17 waihuꞌu petse aba da Jesus ꞌrãtiꞌi watsuꞌu na hã. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:

• Jesus, e ma tô ꞌrãtiꞌi ni aiꞌuté ré hã.

• E niha ma tô ꞌrãtiꞌi ni. E ö tsuru na ma tô ĩꞌrã nhitsiwi tsaꞌwari ni.

Da te ꞌrãtiꞌi parimhã, Jesus ma tô ãma tsãnaꞌrata te te ꞌmanharĩ da romhuri ĩpire Ropotoꞌwa te te tãma ĩtsõmri hã. Atsiré tsõré aba Lucas 3:21-23 duré João 6:38. Taha parimhã atsima robdzanhamri aba ãhã dadzadanharĩ ãma piꞌrebamhã:

• Tiꞌrãtiꞌi parimhã, e mahã romhuri tãma ĩmorĩꞌrata uptabi Jesus höimanadzéb ꞌremhã.

5. Aiꞌrãti atsina ãma uwaimrami waihuꞌu petse di

Jeová ma datsina ropitsudu duré daꞌrãti tô tsena marĩ ĩpire uptabi. Taha wa, ãté taha ma aipahi di. Tane nherẽ, Jeová ãma natsi romnhoré wamhã duré ĩmreme dzarina ꞌre aihöimana mono wamhã, te dza atsibꞌru na atsina ĩpitsu ãhã ꞌmanharĩ da. ꞌMadöꞌö niꞌwam norĩ ãne te te ĩꞌmanharĩ dzaꞌra. ꞌMadöꞌö aba ĨROPODO.

Atsiré tsõré aba João 17:3 duré Tiago 1:5. Taha parimhã atsima robdzanhamri aba ãhã dadzadanharĩ ãma piꞌrebamhã:

• E marĩ te dza pawapto niꞌwa daꞌrãtiꞌi da hã tsada tsitsaꞌra wẽ da.

1. Jeová ma, wa dza watsina ropitsutu dzaꞌra ni wa te tãma nharĩ dzaꞌra wamhã, õhõ ma tsi dza wa te ꞌre ĩromhuri uꞌötsi dzaꞌra mono na.

2. Waꞌrãtiꞌi na, wa dza dama höiꞌré dzaꞌra ni Ropotoꞌwai ma wa te watsina ĩropitsutu dzaꞌra na hã.

 6. Da te waꞌrãtiꞌi dzaꞌra wamhã Jeová nhibꞌaꞌuwẽ norĩ me wa dza wahöimana dzaꞌra ni

Da te waꞌrãtiꞌi dzaꞌra wamhã, wa dza wahöimana dzaꞌra ni Jeová nhibꞌaꞌuwẽ norĩ me tiꞌai mono bö tsimitsutu ꞌre ĩhöimana dzaꞌra mono hã. Waro duré wahöimanadzé aimawi nherẽ, wa tsadze dzaꞌra ni tô marĩ na hã duré wa tsadawa dzamarĩ dzaꞌra ni tô Ropotoꞌwai nhimiroti hã. Atsiré tsõré aba Provérbios 3:32 duré 1 Pedro 2:17. Taha parimhã atsima robdzanhamri aba ãhã dadzadanharĩ ãma piꞌrebamhã:

• Da te ꞌrãtiꞌi parimhã, e niha dza datsiwaihuꞌudzé hã Jeová ãma duré ãma ĩwata dzaꞌra norĩ ãma.

 ĨWAIHUꞌUDZÉ HÃ

Jesus ma tô tiꞌru tidzadawa dzamarĩꞌwa norĩ ma da te ꞌrãtiꞌi dzaꞌra da. Tahã niꞌwa te te tsina uwaimrami da Jeová ãma ĩtsimidzadze nhiptete da tsi, ĩmreme dzarina ꞌre ĩhöimana mono da tsi duré te te tãma tsina ­ĩropitsutu da tsi.

Ãma aipoꞌre puꞌu

• E marĩ daꞌrãti duré e marĩ wa, ĩmorĩꞌrata uptabi.

• E marĩ niꞌwa tiꞌrãtiꞌi na te dza höiꞌré.

• E marĩ niꞌwa te te ĩꞌmanharĩ da tsi Jeová ma te te tsina ropitsutu da duré daꞌrãti te te tsina uwaimrami da.