1 Timotiu 2:1-15
2 Ãhã na marĩ ipire na wa za aima rowasuꞌu. ꞌRe ihâimana uꞌâsi mono ma ꞌre damreme zusi mono wamhã, te za uburé daꞌãma tãma ꞌre damreme zusi, te te ꞌre daꞌapawapto mono da. Marĩ zô dawi ꞌre rowaptâꞌâ zaꞌra mono wamhã, uburé dama te za da te tiwi ꞌre rowaptẽrẽ zaꞌra, marĩ hã te te dama ꞌre anhomri mono da. Duré marĩ na dama ꞌre sõpru mono wamhã, te za ãma ꞌre dawata zaꞌra.
2 Danhibꞌapito mono bâ, dama ꞌre ihâimana zaꞌra mono norĩ ãma, te za tãma ꞌre damreme zusi, uburé dama ipire zaꞌra norĩ ãma zama. E marĩ da. Ta norĩ hã te te dama ꞌre roti wẽ zaꞌra mono da, taha zarina ꞌre dasiꞌwapé zaꞌra mono õ wa, rowẽ na dasiré ꞌre wanomro mono da, duré dama ꞌre wahâimana wẽ zaꞌra mono da, ꞌRe ihâimana uꞌâsi mono nhimiroti ꞌmadâꞌâ sina.
3 2:3-4 ꞌRe ihâimana uꞌâsi mono hã Waꞌanhoꞌreptuiꞌwa. Ta hã ma tô te te sima ꞌre daꞌawẽ, uburé te te ꞌre daꞌanhoꞌreptui mono da. Ma tô duré te te sima ꞌre daꞌawẽ, aihĩni pese isimiroti hã da te ꞌre waihuꞌu zaꞌra mono da, ãma ꞌre danomro wẽ mono da, isimiroti hã tô sena uptabi wa. Aihĩni ãma ꞌre wamreme zusi mono wamhã, tãma rowẽ di. Tahawa, te za wama ꞌre to zaꞌra.
4 ꞌMadâꞌâ 2:3
5 Misire hâiwa ãma ꞌre ihâimana mono si, uburé Danhibꞌapito uptabi hã. Misire daꞌãwisi wẽ ꞌwa Wamama u hã. Ta hã Cristu Zezusi, aibâ na ꞌre ihâimana mono.
6 Ta hã ma tô dazada sisõ, uburé te te daꞌawaꞌâbâ da. ꞌRe ihâimana uꞌâsi mono hã bâdâ te te ipisutuzém na, ma tô daꞌawaꞌâ. Tahawa, ꞌRe ihâimana uꞌâsi mono te te sima ꞌre idaꞌawẽ mono zé hã, uburé pese te te ꞌre idaꞌanhoꞌreptui mono zéb da hã, wa tô waihuꞌu zaꞌra ni.
7 Ta hã ma tô ĩpisutu, isadawa wasuꞌuꞌwa ꞌre ĩhâimana mono da, zudeuꞌõ norĩ hã te ꞌre poꞌre puꞌu zaꞌra mono da, isadawa para, Wanhibꞌapito wasuꞌuwẽ na. E marĩ da. Wanhibꞌapito hã te te ꞌre saze zaꞌra mono da, duré te te ãma ꞌre sasõmri zaꞌra mono da, isimiroti zarina si ꞌre nomro wẽ mono da, tô sena uptabi wa, isimiroti hã. Ĩzadawa nhipese na aima ĩsiwasuꞌu õ di. Tô sena wa tô aima ꞌre ĩsiwasuꞌu.
8 Wa za oto aima waihuꞌu, te ĩsima ꞌre idaꞌawẽ mono zém na hã. Aibâ norĩ hã nimame ꞌre ihâimana zaꞌra mono zé mono bâ te za ꞌre mreme zusi, ꞌRe ihâimana uꞌâsi mono ma. Ta norĩ hã dama ꞌre hâimana wẽ zaꞌra mono wamhã, te za tãma ꞌre mreme zusi, tãma ꞌre simiwẽ zaꞌra mono sina, hâiwa u, te te ꞌre daꞌruiwapari zaꞌra mono ãna, duré tizadawa na ꞌre isiꞌwapé zaꞌra mono ãna.
9 2:9-10 Piꞌõ norĩ hã, aibâ norĩ te te sima ꞌre ꞌmadâꞌâ ze zaꞌra mono da, dama ꞌre siꞌuza wamnarĩ zaꞌra mono õ di za. Duré dama ꞌmadâꞌâ ze da, ꞌre siséré tété wẽ zaꞌra mono da hã mare di za. Duré tinhoꞌrebzui wẽ na si, sima ꞌre isipese zaꞌra mono õ di za. Duré tinhipsisi wẽ na si, sima ꞌre isipese zaꞌra mono da hã mare di za. Duré daꞌuzazé iwaꞌâbâ zaꞌẽtẽ na si, ꞌre isiꞌuza zaꞌra mono da hã mare di za. Dama robꞌmanharĩ wẽ zéb zô si, te za sina ꞌre sõpré, ꞌRe ihâimana uꞌâsi mono nhimiroti ꞌmadâꞌâꞌwa na ꞌre isiwasuꞌu zaꞌra mono zéb zarina.
10 ꞌMadâꞌâ 2:9
11 Isazeiꞌwa norĩ ꞌmadâꞌâꞌwa norĩ hã te te dama ꞌre rowahutu zaꞌra mono ré, te za piꞌõ norĩ hã ariꞌiwi te te ꞌre wapari zaꞌra. Iꞌmadâꞌâꞌwa norĩ zapari ꞌre ihâimana zaꞌra mono na te za ꞌre siꞌmadâꞌâ zaꞌra piꞌõ norĩ hã, ariꞌiwi te te ꞌre iwapari zaꞌra mono da hã.
12 2:12-13 Piꞌõ norĩ hã aibâ norĩ ma, te te ꞌre irowahutu zaꞌra mono da hã, mare di. Aibâ norĩ ma, timreme pire na ꞌre siꞌmadâꞌâ zaꞌra mono õ di za. Ariꞌiwi te za ꞌre siꞌubumro, piꞌõ norĩ hã. E marĩ wa, wa ãne aima waihuꞌu. ꞌRe ihâimana uꞌâsi mono hã ma tô aibâ hã poto naꞌrata, Adã na isisi hã. Taha zaꞌu si ma duré piꞌõ hã poto, Ewa hã.
13 ꞌMadâꞌâ 2:12
14 Piꞌõ si, Waꞌuburé nhimiroti hã tô senaiꞌõ na te te waihuꞌu õ di. Tanei õ di, Adã hã. Piꞌõ si Waꞌuburé nhimiroti hã tô senaiꞌõ na te te iwaihuꞌu õ zéb zarina, ma tô Wamama nhimiroti na hã upa naꞌrata.
15 Tane nherẽ, piꞌõi mono bâ hâimana wẽ na ꞌre hâimana zaꞌra mono wamhã, tãma ꞌre rowẽ zaꞌra mono di za. Wanhibꞌapito umnhasi sina, te za ꞌre hâimana zaꞌra. Te za duré te te ꞌre dazawi pese zaꞌra. Hâimana wẽ uptabi na te za dama ꞌre hâimana zaꞌra. Tawamhã iwasã hã ãma ꞌre sépuꞌu zaꞌra mono wamhã, iꞌra hã tãma ꞌre rereꞌe wẽ mono da, te za Wamama hã te te ꞌre anhoꞌreptu, piꞌõ norĩ hã.
