წიგნი „ბიბლიურ ისტორიეფი‘‘, ნამუთ 2012 წანას პანგასიანურ ნინაშა გიშაშქვესინ, ფილიპინეფს მანგარო ოხვარუ სკოლაშ ბაღანეფს, ნამუთ თე ნინაშა იჩიებუნა. ფილიპინეფიშ განათლებაშ სამინისტროქ დადგინუ, ნამდა დაჭყაფ კლასეფს მასწავლებლეფქ ბაღანეფს მუნეფიშ ნინაშა რდუნ თი მასალათ ოკო ოგურუესკონ. წიგნი „ბიბლიურ ისტორიეფი“ თეშო მანგარ ჯგირ საშუალება რე.

ფილიპინეფს 100-შე უმოს ნინაშა რაგადანა. ათეშგურშენ, ქიანა ხანს მსჯელენდეს, ნამ ნინა ოკო გიმურინუაფუდესკონ დაჭყაფ კლასეფს. 2012 წანას განათლებაშ სამინისტროშ დუნადგინათ, „ბაღანეფ უმოს უჯგუშო დო მალას ქიდიგურუანდეს ოგურაფალ პროგრამას, მასაწავლებლეფ თინეფს ჸუდეს იჩიებუნან თი ნინაშა ქიდაგურუანდეს-და“. ათეშგურშენ, გეგშაშქვეს „ბრელ ნინაშა რაგადანან ფერ ქიანაშო სპეციალურ ოგურაფალ პროგრამა მუნეფიშ ნინაშა“.

გეგშაგორეს პანგასიანურ ნინა. მარა ართ პრობლემაქ გემკორჩქინდ. ართ-ართ სკოლაშ დირექტორქ თქუ, ნამდა პანგასიანურ ნინაშა ოკითხე მასალა ბრელ ვა რდუ. თაშ ნამდა, იეჰოვაშ მოწმეეფქ გვალო დროულო გეგშაშქვეს წიგნი „ბიბლიურ ისტორიეფი“ პანგასიანურ ნინაშა; თენა 2012 წანაშ რეგიონალურ კონგრესის გეგმაცხადეს.

კონგრესეფს სოდგარენ 10 000 წიგნი არიგეს. მშობლეფქ დო ბაღანეფქ ხიოლით ცას ქანჭეს, მუჟამსით წიგნიქ მუნეფიშ ნინაშა ქაშუეს. ართ წყვილქ თქუ: „ჩქინ ბაღანეფს მანგარო უჸორა თე წიგნი, მუშენ-და ირფელს ჯგირო გებულენა“.

კონგრესეფიშ უკულ ქალაქ დაგუპანს, მუსხირენ მოწმექ წიგნი „ბიბლიურ ისტორიეფი“ სკოლაშა მიდეღუ. მასწავლებლეფს ახიოლეს თექ, მუშენდა თინეფს მანგარო ოკოდეს პანგასიანურ ნინაშა უღუდესკონ მუდგაინ ოკითხე. იეჰოვაშ მოწმეეფიშ ბაღანეფქ სკოლას 340-შე უმოს წიგნი დარიგეს. მასწავლებლეფქ ხეთეშე ქიდიჭყეს თე წიგნიშ გიმორინაფა დო ბაღანეფს კითხირს ოგურუანდეს მუნეფიშ ნინაშა.

იეჰოვაშ მოწმეეფს ოხიოლნა, ნამდა თე წიგნი მუშ საქმეს ორთუ, ბაღანეფქ ქიგურუანი თიშ გურშენ. ართ მათარგმნალქ, ნამუთ თე წიგნიშ თარგმნუას ოხვარუდუნ, იჩიებუ: „ბრელ ხან რე მეხვალამირ ვორექ, მუსხის ქონიშნენს, ხალხის მუშ ნინაშა უღუდას ლიტერატურა, მუშენდა ნაკითხირ გურშა ენახანტუნა თინეფს. ზუსტას თეშ გურშენ იეჰოვაშ მოწმეეფს ვაზოგუნა მუნეფიშ ძალეფი, ნამდა ბიბლია დო თიშა გერსხილ ლიტერატურა ოშობით ნინაშა გეგნოთარგმნან“.