Tianolo mampiasa fomba fivolan̈ana karaha ty izikoa fa hikoran̈a momba olo araiky nan̈ampy olo sahiran̈a: “Izy nan̈ano Samaritanin̈y Tsara Fan̈ahy.” Fomba fivolan̈ana io nalain̈y baka tamy tantara araiky nitantarainy Jesosy zay. Amizio ao izy mikoran̈a momba lelahy araiky tsara fan̈ahy, nan̈ampy olo hafa tsy mitovy tany favian̈a ndreky faripiain̈ana aminany.

Ho hitanao an̈aty lahatsoratra ty

•  Karakory ma tantarany “Samaritanin̈y Tsara Fan̈ahy”?

•  Nan̈ino ma Jesosy nitantara izio?

•  Ino fianaran̈a azontsika baka amy tantara io?

•  Azovy ma Samaritanin̈y aby io?

•  Raha ten̈a nisy ankitin̈y ma tantarany “Samaritanin̈y Tsara Fan̈ahy” in̈y?

Izikoa atao fohifohiky, karaha ty tantara nikoran̈iny Jesosy in̈y: Nisy lelahy Jiosy araiky baka ta Jerosalema, handeha a Jeriko. Fa tamy lalan̈a, izy niravainolo. Ke izikoa izy fa baka nipopohindro in̈y, izy nafotrakandro tio.

Baka io, nisy pisoron̈o Jiosy araiky ndreky pitondra fivavahan̈a Jiosy araiky zay nandalo tio. Fa tsisy araiky tamindro mba nijanon̈o nan̈ampy lelahy io, kanefa iro aminio mitovy tany favian̈a taminany.

Teteky, nisy lelahy araiky hafa, tsy karazan̈a araiky tamy lelahy io, navy. Izio lelahy samaritanin̈y. (Lioka 10:33; 17:16-18) Nahinakinaka mare Samaritanin̈y io nahita izy, ke nikarakarainy bainany. Baka io lelahy naratra io nindesiny tamy lotely. Tan̈atiny alin̈y araiky, nikarakarainy tsarabe lelahy io. Kiaka andra, nikaramainy Samaritanin̈y in̈y tompiny lotely io hikarakara lelahy naratra io, ke nan̈amia vola koa izy han̈ifan̈a depansy jiaby.​—Lioka 10:30-35.

Jesosy nan̈ano tantara io tamy lelahy araiky zay. Lelahy io nieritreritry fa lan̈ianolo mitovy karazan̈a aminany ndreky fivavahan̈a araiky aminany fo kamaradiny. Ke nisy fianaran̈a maventy tiany Jesosy hampianarin̈y izy. Tsy ino izio fa mila azony tsarabe fa tsy iro Jiosy piaramonin̈y taminany aby io fo tokony hataony “kamarady.” (Lioka 10:36, 37) Nampidirin̈y an̈aty Baiboly ao koa tantara io, baka hampianaran̈a leson maventy iro olo tihahazo fankasitrahan̈a amy Zan̈ahary.​—2 Timoty 3:16, 17.

Naboakany tantara in̈y fa kamarady tsara zen̈y, olo araiky mahay mahinakinaka olo, ke man̈ano raha han̈ampian̈a izy. Izy ohatra, tia man̈ampy olo mijaly, na ino na ino faripiain̈ana, karazan̈a, ndreky tany favianolo io. Kamarady tsara zen̈y mitondra olo hafa karaha fomba tiany hitondrasan̈a ain̈inany.​—Matio 7:12.

Samaritanin̈y aby io nipetraka tamy tanàna araiky avaratrany Jodia. Iro io taranakany Jiosy nanambady olo tsy Jiosy.

Tamy taonjato voanalohany tan̈y, iro Samaritanin̈y aby io nanan̈a fivavahan̈andro tompiny. Ikendro raha koran̈iny boky dimy voanalohany amy Soratra Hebreo, fa sisanizay tsy ikendro.

Maro Jiosy taminy andrany Jesosy, nan̈ambany Samaritanin̈y aby io, salakady tsy tiandro foeky nifandray tamindro io. (Jaona 4:9) Volan̈a “Samaritanin̈y” io aby nampiasainy Jiosy sasany an̈asahain̈a olo.​—Jaona 8:48.

Baiboly tsy mivolan̈a asa raha ten̈a nisy ankitin̈y tantara momba Samaritanin̈y in̈y. Fa matetiky fo Jesosy izikoa fa nampianatra, izy nivolan̈a toeran̈a ndreky kolontsain̈y hainolo, baka mora aminolo mitandren̈y izy mangala sary antsain̈y hevitry tiany koran̈iny.

Maro amy raha mombamomba tantara io marin̈y ankitin̈y, izikoa tantara zahavan̈a. Ty ohatra:

• Lalan̈a baka a Jerosalema mandeha a Jeriko io lalan̈a mandilatrany 20 kilometara, salakady lapanty mijotso oe. Marin̈y ankitin̈y raha volan̈iny tantara io, izikoa izy fa mivolan̈a fa iro olo aby io “nijotso baka ta Jerosalema” nandeha ta Jeriko.​—Lioka 10:30.

• Amy lalan̈a io fo koa fandihanandro pisoron̈o ndreky Levita aby mipetraka a Jeriko, izikoa fa handeha a Jerosalema.

• Mitokan̈a mare lalan̈a io, ke ao matetiky fisitrihandro pandrava aby io. Iro efa miambin̈y olo handeha ravain̈y, sirto eky olo mandeha manokan̈a.