Maro karazany asandro Levita tsy pisoron̈o aby io. An̈isanizen̈y ohatra, niambin̈y tempoly. Miramiran̈a aminy asany polisy raha nataondro tamy fotoan̈anizen̈y. Sefony piambin̈y tempoly nan̈aramaso iro io. Nisy panoratra jiosy zay, Philon an̈arany, nan̈azava raha tafiditry aminy asandro piambin̈y aby io. Ho izy: “Sasany tamindro [Levita aby io] nirahin̈y nitsangana tamy varavaran̈a fidiran̈a aby io. Tio iro niambin̈y. Sasany ndraiky tan̈atiny [faritriny tempoly] mifan̈atriky amy toeran̈a masin̈y. Tio iro nisakana lan̈iany olo tsy nahazo lalan̈a hiditry, na kiniandro zen̈y na tsy kiniandro. Nisy amindro koa nan̈ariary man̈odidin̈y tempoly io, nan̈aramaso raha nandalo. Nifandimby nan̈ano zen̈y iro mantsan̈a alin̈y.”

Fitsaran̈a Avo Jiosy tamy zen̈y afaka nibeko iro piambin̈y aby io. Iro Jiosy piambin̈y aby io zaraiky fo nimboandro Romanin̈y aby io hitondra raha findesin̈y miady.

Karaha ty nambarany manampahaizan̈a araiky, Joachim Jeremias an̈arany: ‘Tamy Jesosy nisamborin̈y, izy nan̈ontany olo nandeha nanambotro izy aby io nan̈ino iro tsy nanambotro izy, taminizy nampianatra tamy tempoly tao. (Mat. 26:55) Izikoa tsy an̈isany piambin̈y tempoly iro olo aby io, Jesosy tsy mety nan̈ontany zen̈y tamindro.’ Nikeny manampahaizan̈a io fa piambin̈y tempoly koa iro olo nirahin̈y hanambotro Jesosy taloha helinizen̈y. (Jaona 7:32, 45, 46) Mbala iro piambin̈y tempoly ndreky sefondro piambin̈y aby io fo nirahin̈y nanambotro pianatra Jesosy ndreky nitondra iro tamy Fitsaran̈a Avo Jiosy, tafara tatỳ. Tsy maintsy iro fo koa nan̈antsoritsory apostoly Paoly niboaka tambelan̈any tempoly.—Asa. 4:1-3; 5:17-27; 21:27-30.