Baiboly io tsy mira boky jiaby. Torohevitry baka amy Zan̈ahary niasa atsika an̈atinizio ao. (2 Timoty 3:16) Misy vokany maventy amy fiain̈anantsika hafatra koran̈inizio ao. Baiboly mivolan̈a: “Volan̈a Zan̈ahary io velon̈o ndreky mahery.” (Hebreo 4:12) Misy fomba aroe hankatsaranizio fiain̈anantsika: Man̈amia taridalan̈a atsika amy fiain̈anantsika andavanandra avio man̈ampy atsika hahay Zan̈ahary ndreky fampan̈antinan̈anany.​—1 Timoty 4:8; Jakoba 4:8.

Mankatsara fiain̈ananao rango izioty: Baiboly io afaka man̈ampy anao amy fiain̈ananao manokan̈a. Izio man̈amia torohevitry momba raha aby ty:

• Fifandraisan̈a aminolo.​—Efesianina 4:31, 32; 5:22, 25, 28, 33.

• Fihetsehampo ndreky fahasalaman̈a arabatan̈a.​—Salamo 37:8; Ohabolana 17:22.

• Fitondranten̈a.​—1 Korintianina 6:9, 10.

• Asa.​—Ohabolana 10:4; 28:19; Efesianina 4:28. *

Nisy olo fivadiany tan Asie tan̈y, ten̈a nankasitraka torohevitriny Baiboly. Sarotro tamindro nankatsara toetrindro ndreky nifampikoran̈a tsarabe, karaha ataony vady vao jiaby fo. Fa iro baka tio namaky Baiboly ndreky nan̈araka raha nivakindro tao. Ino vokany? Karaha ty ho Vicent: “Raha nivakiko tamy Baiboly tao nan̈ampy zaho nahavita niatriky problemo hitanay tamy vadian̈a ndreky nan̈aboaka fitiavan̈a. Nahatsiaro sambatra koa zahay izioty fotony samy man̈araka raha koran̈iny Baiboly.” Karaha zen̈y koa ho Annalou vadiny: “Nan̈ampy zahay mare famakian̈a iro tantaranolo amy Baiboly ao. Zaho izioty mahatsiaro sambatra ndreky afapo amy vadian̈anay sady manan̈a tanjon̈o tsara amy fiain̈ana.”

Man̈ampy anao hahay momba Zan̈ahary. Tsy amy vadian̈a fo ilan̈a famakian̈a Baiboly io ho Vicent fa amy raha hafa koa. Ho izy: “Mahatsiaro marikitry Jehovah mandilatrany taloha zaho izioty, fotony mamaky Baiboly.” Hitantsika baka amy raha nivolan̈iny Vicent zen̈y fa hahaiharikitry Jehovah anao koa mamaky Baiboly. Anao koa man̈ano zen̈y, hahazo hatsaran̈a baka amy fan̈arehan̈a torohevitriny Baiboly, sady hanjary kamaradiny Zan̈ahary koa. Ho hitanao koa fa izy mikoran̈a raha maro momba fiain̈ana tsara hataony aminy amaray an̈y. Izio “ten̈a fiain̈ana”, dikanizen̈y fiain̈ana tsisy farany. (1 Timoty 6:19) Tsisy boky hafa mikoran̈a raha hazahoan̈a fiain̈ana tsisy farany karaha zen̈y.

Hahazo hatsaran̈a jiaby zen̈y koa anao izikoa man̈ano programo tsy miovaova hamakian̈a Baiboly. Hahaitsara fiain̈ananao rango izioty, avio hahay Zan̈ahary koa anao. Fa izikoa anao mamaky Baiboly, mety maro raha tianao han̈ontanian̈a. Aleva onon̈o raha nataony manamboninahitry etiopianin̈y araiky, 2 000 taon̈o loso zay. Izy koa fa nan̈ontanian̈a asa mazava aminany raha nivakiny, izy nivolan̈a: “Akory ma hahaizako dikany raha volan̈iny izikoa tsisy olo man̈azava izio aminaka?” * Ravoravo izy nan̈eky fan̈ampiany Filipo. Mahay Baiboly tsarabe baka Filipo io fotony izy pianatrany Jesosy. (Asan’ny Apostoly 8:30, 31, 34) Asa mba tianao koa hahay raha koran̈iny Baiboly? Izikoa zen̈y, finoa fangatahan̈a amy www.dan124.com, na koa zahava adiresy amy gazety ty ato, baka io manorata aminy araiky marikitry tany misy anao. Anao koa mety mikoran̈a amy Vavolombelon̈o Jehovah na mandeha amy Tran̈o Fivorian̈a marikitry tany misy anao. Avio niany ty anao efa mety manomboko mamaky Baiboly edy! Izio baka afaka han̈ampy anao hanan̈a fiain̈ana tsara.