Vavolombelon̈o Jehovah izioty mahazo boky ndreky gazety, lahatsoratra amy forma elektroniky, avio video maro mare mandilatrany taloha. Fa amy tany sasany, sarotro amindro rahalahy ndreky ranabavy aby io mangala raha aminy Internet. Amy tany sasany koa matetiky tapaka jiro, na miadan̈a be Internet, na tsisy foeky.

 Fa izioty ndraiky, efa maro koa rahalahy ndreky ranabavy afaka mangala video ndreky lahatsoratra amy forma elektroniky, kanefa tsy mila Internet aby.

 Misy raha hely zay ampiasaindro, JW Box. Izio rasain̈a amy fiangonan̈a tsy afaka mampiasa Internet. Misy raha telo an̈atinizio ao: Fitaovan̈a fandrasan̈a raha amy forma elektroniky nivangain̈a taminy orinasa araiky, programo niforon̈in̈y Sampandraharahany Ordinatera amy Betela an̈y, baka io boky ndreky gazety ndreky video baka amy jw.org. Kadiriny 75 dolara io vangany JW Box araiky.

 Apetraka amy Tran̈o Fivorian̈a an̈y JW Box io. Ampifandraisiny rahalahy ndreky ranabavy baka aminy Wi-Fi ny JW Box io telefonindro ndreky fitaovan̈a hafa ampiasaindro, amy zen̈y iro afaka mangala boky ndreky gazety. Fitaovan̈a elektroniky ampiasaindro na araiky efa taloha aby in̈y na iro tsotra aby in̈y, mbala mety ampifandraisin̈y aminany io fo. Akory fo izikoa tsy afaka mampiasa Internet fiangonan̈a misy JW Box io? Akory fomba hazahoandro video ndreky lahatsoratra niboaka farany ampidirin̈y amy JW Box ao? Ampidiriny birôny sampan̈a an̈atiny clé USB zay raha niboaka farany amy jw.org ao, baka io izio alefa tsy tapaka amy fiangonan̈a, baka io fiangonan̈a mampiditry izio amy JW Box ao. Kadiriny 4 dolara vidiny clé USB araiky.

 Ten̈a man̈ampy iro rahalahintsika aby io ma JW Box io? Karaha ty nivolan̈iny Nathan Adruandra, lelahy manambady amanjanaka mipetraka amy Repobliky Demokratikiny Congo an̈y: “Efa ela zaho nangala filma “A Jehovah, Zaho Matoky Anao” ndreky Tsarova Vadiny Lota, fa farany zaho rivan̈a eky, fotony raha io tsy nety nazoko! Fa izioty zaho efa afaka mangala iro video aby io amy telefoninaka. Ten̈a man̈ampy zahay fivadiany izio, zahay koa fa mampianatra zanakanay.”

 Karaha ty koa nivolan̈iny rahalahy araiky man̈ampy fiangonan̈a maro a Nizeria an̈y, amy fampiasan̈a JW Box: “Iro rahalahy ndreky ranabavy aby io mivolan̈a fa kadô miavaka baka amy Jehovah JW Box io. Ravoravo mare iro fotony tsy mijaly eky iro mangala boky ndreky video baka amy Fitaovan̈a Fampianaran̈a.”

 Efa mandilatrany 1 700 JW Box nalefa amindro rahalahintsika an Afriky, Oseanie, baka io Ameriky Atsimo an̈y. Efa misy fandaharan̈a koa izioty ataontsika handifasan̈a izio amy fiangonan̈a maro. Aia azahoantsika vola an̈anovan̈a raha jiaby zen̈y? Baka amy fan̈amezan̈a ataontsika niny asa man̈erantany. Amy izioty koa ten̈a maro aminaro man̈ano fan̈amezan̈a amy donate.dan124.com. Man̈ano mersy anaro, fotony anaro ten̈a tia man̈amia!