Elo, pana achakongwe ŵajinji ŵa Mboni sya Yehofa ŵakutenda utumiki. Jemanja akusapanganya gulu jekulungwa ja ŵandu ŵakulalichila ngani syambone syakwamba Uchimwene wa Mlungu. Pakusala ya jemanjaji lilemba lya Salimo 68:11, [NWT] lyasasile mkanipaŵe kuti, “Yehofa alamwile kuti, achakongwe ŵakulalichila utenga wambone ali likuga lyekulungwa.”

Nambope, akasokonasya utumiki wakusatendaga achakongwe ŵa Mboni sya Yehofa ni utumiki wakusatendaga achakongwe ŵa dini sine. Utumiki wakusatendaga achakongwe ŵa Mboni uli wakulekangana mnope ni wakutenda achakongwe ŵa dini sine. Ana pana kulekangana kwamtuli?

Kulekangana kwakwe kuli kwakuti, achakongwe ŵa dini sine akusaŵa achimlongola mu dini syawo. Soni jemanjaji akusiŵalalichila ŵandu ŵa mu dini mwawope basi. Pele achakongwe ŵa Mboni sya Yehofa ngakusaŵalalichilaga ŵandu ŵa mu dini jawo, nambo ŵa m’madini gane. Pelepa mpaka tujile kuti jemanjaji akusiŵalalichila ŵandu ŵajinji mwakwajendela msimangwawo soni kulikose kwasimene ni ŵandu.

Kulekangana kwine kwakupali pasikati pa achakongwe ŵa Mboni sya Yehofa ni ŵa dini sine kuli kwakuti, achakongwe ŵa dini sya Chiklistu soni sine akusaŵaga achimlongola ŵa dini syawo ni kwajiganyaga ŵandu yikulupi ya dini syawosyo. Pele achakongwe ŵa Mboni sya Yehofa ŵangajiganya ŵandu mumpingo naga achalume ŵakubatisidwa apali. Masengo gelega gali ga achalume ŵaŵasagulidwe kuŵa ŵakwiganya.—1 Timoteo 3:2; Yakobo 3:1.

Baibulo jikusasala kuti achalumepe ni ŵakusosekwa kuŵa ŵakulolela mumpingo. Apikane yaŵasasile ndumetume Paulo kwa mjakwe jwine juŵaliji jwakulolela mpingo. Mjakweju ŵaliji Tito. Paulo ŵatite, Namlesile kuKilete kuti mlondesye yosope yiyaliji mkaniyimale kulongosoka, ni kuti mwaŵiche achakulungwa ŵa mpingo m’musi uliwose mpela yinatite pakumlamula.” Jwalakwe jwasasilesoni kuti, “jwamkulungwa jwa mumpingo aŵe jwangakayikasya, soni aŵe jwa ŵakongwe ŵamo.” (Tito 1:5, 6) Paulo jwasasilesoni maloŵe gagaga mu chikalata chakwawula kwa Timoteyo. Jwalakwe jwatite, “Naga mundu akusaka masengo gakulolela mpingo, akusaka masengo gambone. Jwakulongolela mpingo aŵeje mundu jwangali ulemwa, aŵe jwa jwamkongwe jumpepe, . . . soni jwakombola kwiganya.”—1 Timoteo 3:1, 2.

Nambo ana ligongo chichi achalumepe ni ŵakusosekwa kola ma udindo mumpingo? Paulo jwatite: “Ngangukunda kuti jwamkongwe alijiganyeje [“ajiganyeje,” NWT] kapena kola ulamusi pa jwamlume, kwakwe kuli kutama jii. Pajatu Adamu ni juŵatandite kupanganyidwa, kaneko Hawa.” (1 Timoteo 2:12, 13) Yeleyi yikulosya kuti Mlungu apeleche udindo wakwiganya soni kulolela mpingo kwa achalume.

Ŵakutumichila ŵa Yehofa akusakuyaga chisyasyo cha Mlongola jwawo, jwali Yesu Klistu. Pakwamba ya utumiki waŵatendaga Yesu, Luka juŵaliji jwakumkuya Yesu, jwasasile kuti, “Yesu ŵapitile m’misinda ni m’misi achilalichilaga ni kwasalila ŵandu Ngani Syambone syakwamba ya uchimwene wa Mlungu.” Kaneko Yesu ŵatumile ŵakulijiganya ŵakwe kuti akakamule masengo gagaga. Jemanjaji, “ŵapite m’misi josope achilalichilaga Ngani Syambone.”—Luka 8:1; 9:2-6.

Masiku aganosoni, ŵakutumichila ŵa Yehofa, achalume ni achakongwe ŵakwe akusakamulaga masengo gakulalichilaga mwakulipeleka. Pajatu jwalakwe jwatite, “Nipo Ngani Syambonesi syakwamba Uchimwene wa Mlungu tisichilalichidwa pa chilambo chosope chapasi kuti ŵandu ŵa mitundu josope asipikane, kaneko mbesi ni tijichiyika.”—Mateyu 24:14.