JWALIJOSE akusalaga nganisyo, atamose ŵandu ŵa Mlungu. Jwamalumbo ŵalembile kuti, ‘Nganisyo syakulagasya syandupile mumtima mwangu.’ (Salimo 94:19) Soni Yesu ŵasasile kuti mundaŵi jambesi, “yakusawusya ya umi awuno” yicitendekasyaga ŵandu kukuwona kutumicila Yehofa kuŵa kwakusawusya. (Luka 21:34) Ana yindu yili wuli paumi wawo? Ana akulaga nganisyo ligongo lya kusoŵa kwa mbiya, yakusawusya ya mwiŵasa, kapena ulwele wine wakwe? Ana Yehofa mpaka ŵakamucisye catuli kupilila yeleyi?

M’weji pajika ngaŵa mkupakombola kulimbana ni kulagasika nganisyo. Ndumetume Paulo ŵalembile kuti, “Tukusalagasika mwamtundu wuliwose, nambo ngaŵa mkwikana pakulepela kwenda. Tukusamalaga lunda, nambo ngaŵa mkwikana pakusoŵa cakutenda. . . .  Akusatugwisya pasi, nambo ngatukusawulala.” Ana cici cacikusatukamucisya kupilila? “Macili gakupunda gacipagwa,” kugopolela kuti macili gakutyocela kwa Yehofa, Mlungu jwetu jwamaciligose.—2 Akolinto 4:7-9.

Akumbucile yayatendekwe kuti apocele “macili gakupunda gacipagwa.” Ana akukumbucila mwajakamucisile ngani jine jakwe kuyamicila mnope cinonyelo cekulungwa ca Yehofa? Ana cikulupi cawo pa yaŵatulajisye Yehofa nganicilimba paŵajiganyisye ŵane ya cembeceyo ca Paladaiso? Kwawula ku misongano ja Ciklistu ni kulimbikasyana cikulupi ni Aklistu acimjetu kukusatukamucisya kola macili gakupilila kulagasika nganisyo. Kukusatukamucisyasoni kuti tukole mtendele wa mumtima kuti tumtumicileje Yehofa mwakusangalala.

Kusala yisyene, pana yindu yejinji yampaka yitukanganice. Mwambone, Yehofa akusasaka kuti tusosesoseje Ucimwene candanda nambosoni kuti tukaleka kutenda yindu yausimu. (Matayo 6:33; Luka 13:24) Nambope, yindu mpela kutusisya kutyocela kwa acimjetu kapena ŵamwiŵasa, kulwala, kapena yakusawusya yine ya mwiŵasa mpaka yitutendekasye kulepela kutenda yejinji. Soni masengo gakucilu mpaka gatumalileje ndaŵi ni macili gakutendela yindu ni mpingo. Ligongo lyakuti pana yindu yejinji yakusosekwa kuyitenda, nambo tukwete ndaŵi ni macili gamnono gakutendela yeleyi, mpaka tuyiwone kuti tuli ŵakulepela. Mwine mpaka tuganisyeje kuti Yehofa akusasaka yindu yakuti m’wejo ngaŵa mkuyikombola.

Nambo Yehofa akusapikanicisya mwayiŵelele yindu paumi wetu. Jwalakwe jwangajembeceya kuti tutendeje yindu yakuti nganituŵa tuyikombwele. Akusamanyililasoni kuti pakusapita ndaŵi kuti mundu amalane ni ulwele kapena kulagasika nganisyo.—Salimo 103:13, 14.

Mwambone, kwende tulole yaŵatesile Yehofa pakumkamucisya jwakulocesya Eliya. Jwalakwe paŵatilile ku cipululu ligongo lyakutenguka soni woga, Yehofa nganamkalipila kapena kumsalila kuti awujile ku masengo gakwe. Kaŵili kose, Yehofa ŵatumisye  lilayika kuti likamjimusye Eliya ni kumpa cakulya. Atamose kuti yatendekwe yeleyi, nambo pali papite yaka 40, Eliya ŵalagagape nganisyo, soni ŵatendagape woga. Ana Yehofa ŵatesilesoni cici kuti amkamucisye? Candanda, Yehofa ŵalosisye kuti akwete macili gakumcenjela. Caŵili, ŵamtamice mtima pasi ni ‘maloŵe gakutuluka.’ Pambesi pakwe, Yehofa ŵamkamucisye kumanyilila kuti papalipe ŵandu ŵaŵalambilaga Mlungu mwakulupicika. Mwacitema, Eliya ŵatandilesoni kutenda masengo gakwe mwakulipeleka. (1 Mafumu 19:1-19) Ana tukulijiganya cici pelepa? Eliya paŵalagaga nganisyo, Yehofa ŵatesile najo yindu mwakuwusimana mtima, soni mwakumtendela canasa. Yehofa nganacenga. Akusasamalasoni ya m’weji.

Patukuganicisya ya yindu yampaka tumpe Yehofa, tuganisyeje yampaka tuyikombole apanopano ngaŵaga yatwatendaga munyumamo. Tuwanicisye m’yi: Mundu jwakutenda ung’asi wakuwutuka naga atemi ndaŵi jelewu ali ngakuwutuka ngaŵa mkwicila kutanda kuwutuka mpela mwaŵatendelaga pandanda. Nambo akusatanda ni kuliŵicila yakulinga yamwanamwana yayikusamkamucisya kulimbisya cilu cakwe. Aklistu ali mpela ŵandu ŵakutenda ung’asi wakuwutuka. Nombe nawo akusaliŵicila yakulinga. (1 Akolinto 9:24-27) Wuli wawojo ngaliŵicila cakulinga cimo causimu campaka acikwanilisye apano? Mwambone, mpaka akole cakulinga cakuti ajawuleje kumisongano ja mpingo. Am’ŵendeje Yehofa kuti ŵakamucisye kwanilisya cakulingaci. Pakutanda kupatasoni macili mwausimu, ‘cacilola kuti Yehofa ali jwambone.’ (Salimo 34:8) Akumbucileje kuti cilicose campaka atende, atamose cili camwana, cakulosya kuti akusamnonyela Yehofa, cikusaŵa capenani mnope kwa jwalakwejo.—Luka 21:1-4.

Ana Yehofa ŵamkamucisye catuli June jwatumsasile pandanda jula kuti awujile kwa jwalakwe? Jwalakwe ŵatite, “Napopelaga kwa Yehofa ndaŵi syosope, kum’ŵenda kuti angamucisye. Kaneko lisiku line mwanangu jwamlume, ŵamkwakwe ŵasalile kuti mu mkuli wetu cimutendekwe msongano. Naganisisye kuti ngatende nawo msonganowu kwa lisiku limpepe basi. Panayice kumsonganowu, nasangalele mnope kuwoneganosoni ni ŵandu ŵa Yehofa! Msonganowu waliji cindu cacangamucisye kuti mbujilesoni kwa Yehofa. Apano natandilesoni kutumicila Yehofa mwakusangalala, soni yindu yatandite kwenda cenene. Sano nayimanyi kuti yindu payisawisye abale ni alongo mpaka angamucisye. Nguyamicila ligongo lyakuti japalipe ndaŵi jakuti mbujile kwa Yehofa.”