AGAMBE kuwanichisya kuti dokotala jwasambano ayiche mumkuli mwawo. Pandanda mpaka akayichileje naga ali dokotala jwambone. Nambi wuli naga achimjawo ŵane ŵapite kukupochela chikamuchisyo chakwe, soni ulwele wawo umasile? Ana wawojosoni ngasaganisya yakwawula kukuwonegana najo?

Malemba Geswela gali mpela dokotalaju. Ŵandu ŵane akusakayichila yakuŵalanga Malemba. Nambo pakamulichisye masengo maloŵe galunda ga m’Malemba, umi wawo ukusaŵa wambone mnope. Alole yisyasyo yine.

Jwamkongwe jwine lina lyakwe Sumiatun jwatite, “Kundanda kwa ulombela wetu, nayiwonaga kuti ŵamkwangu, Dumas, ngakusamala ya une. Ligongo lyakutumbila, nakalipilaga ŵamkwangu, kwaponyela yindu, atamose kwaputa kwene. Ndaŵi sine ligongo lyakutumbila mnope, nakomokaga.

“Ŵamkwangu ŵala ali atandite kulijiganya Malemba Geswela, natendelaga chipongwe. Nambo mwamtemela napikanilaga paŵalijiganyaga ndili mu chipinda chakuŵandichila. Lisiku line, napikene ali mkuŵalanga ndime sine kuti: “Achakongwemwe, mwapilikanileje achiŵamkwenu, mpela mumkwapikanila Ambuje . . . jwamkongwe jwalijose akumbucileje kwacimbicisya ŵamkwakwe.” (Aefeso 5:22, 33) Maloŵega gangamwile mtima. Nam’ŵendile Mlungu kuti angululuchile ligongo lyakwatendela chipongwe ŵamkwangu, soni nam’ŵendile kuti angamuchisye kuŵa jwamkongwe jwambone. Nganipajigala ndaŵi jelewu, ŵamkwanguŵa ni une twalijiganyaga yimpepe Malemba.”

Malemba Geswela gakusaŵechetasoni kuti: “Achalume akuŵajilwa kwanonyela achiŵamkwawo, mpela mwele ŵanganyawo achimsyene akusayinonyelaga yilu yawo.” (Aefeso 5:28) Sumiatun ŵasasile kuti: “Kulijiganya yindu yeleyi kwatukamuchisye wosope. Natandite kwapa ŵamkwangu tiyi payiche pamlango kutyochela kumasengo, soni kuŵecheta nawo mwachinonyelo. Ŵamkwanguwo, nombenawo ŵatandite kunonyela mnope soni ŵangamuchisyaga kamula masengo ga pamlango. Wosope twalingagalingaga ‘kutendelana chanasa nipo kululuchilana jwine ni mjakwe.’ (Aefeso 4:32) Yeleyi, yatendekasisye kuti tujendelechele kunonyelana ni kuchimbichisyana mnope. Sambano tuŵele tuli mwiŵasa lyakusangalala kwa yaka yakupunda 40. Maloŵe galunda gakusimanikwa m’Maloŵe ga Mlungu gakamuchisye liŵasa lyetu mnope.”

Jwamlume jwine lina lyakwe Tayib, jwatite, “Naliji jwangawukamula mtima. Naputanaga mnope ni ŵandu, soni ndaŵi syejinji najogoyaga ŵane ni uti. Naputagasoni ŵamkwangu  mwamti nagwichisyaga pasi ligongo lya kutumbila mnope. Ŵandu ŵajinji ŵanjogopaga.”

“Lisiku line, naŵalasile maloŵe ga Yesu gakuti: ‘Lilamulo lya sambano menema ngumpa, lyakuti mnonyelaneje. Mpela une yindite pakumnonyela.’ (Yohane 13:34) Maloŵega gangamwile mtima mnope, soni nasimichisye kuchenga umi wangu. Ndaŵi jilijose pandumbile, napopelaga kwa Mlungu kuti angamuchisye kuŵa jwakuwusimana mtima. Kaneko kutumbilako kwamalaga mwachitema. Une ni ŵamkwangu twakamulichisye masengo maloŵe ga pa Aefeso 4:26, 27 gakuti: ‘Mkasimkunda kuti lyuŵa likapile mli chitumbilile, mkasimumpa lipesa Satana.’ Twaŵalangaga Malemba ni kupopelela yimpepe lisiku lililyose. Yeleyi yamasyaga nganisyo syakulagasya syosope sya lisikulyo, soni yatukamuchisyaga kuti tunonyelaneje mnope.

“Sambano ngumanyika kuŵa mundu jwamtendele. Ŵamkwangu ni ŵanache ŵangu akusanonyela ni kunjimbichisya. Ngwete achimjangu ŵajinji, soni ngulipikana kuti ndili paunasi mnope ni Mlungu. Ndili mundu jwakusangalala mnope.”

Goin ŵaŵechete kuti, “Nasyoŵekanaga ni ŵachinyamata ŵakusawusya, nakwembaga mnope sona, soni ndaŵi syejinji nachesyaga chilo chosope ndili ngonile pamsewu ligongo lyakukolelwa. Nakamulichisyaga masengo ni kusumisya mitela jakusalekasyaga ŵa boma, mpela chamba ni yine. Mitelaji najisungaga mu kachingambalati kakulichinjila ku yipolopolo. Atamose kuti nawonekaga jwakusawusya, soni kuti naliji jwangalwe, nambo natamaga mwawoga.

“Kaneko mundu jwine ŵalosisye lilemba Iyalikusati: ‘‘Mwanangu, mkaliŵalila lilamusi lyangu . . . Iigongo umi wenu ucikola masiku gamajinji ni yaka yejinji, soni cimcikola mtunjelele.’ (Misyungu 3:1, 2) Nasachililaga mnope kola umi wa yaka yejinji, soni wamtendele. Naŵalasilesoni kuti: ‘Menema  ŵakunonyelwa, pakuŵa tukwete yele yilanganoyi kwende tulikolosye twacimsyene kuleka usakwa uliwose wam’ciilu ni mumsimu, nipo pakumjogopa Mlungu tulinjeje kuŵa ŵaswela mtima kusyene.’ (2 Akolinto 7:1) Myoyo nalesile kamulichisya masengo mitela jakusokonesya mtwe, soni kusyoŵekana ni likuga lya achachanda ŵakusawusya ŵala. Kaneko natandite kumtumichila Mlungu.

“Sambano yimasile yaka 17 chilechele kamulichisya masengo mitela jakusokonesya mtwe. Apano ngwete chilu chambone, liŵasa lyakusangalala, achimjangu ŵambone, soni chikumbumtima cheswela. Soni mmalo mwakugona mumsewu ligongo lyakukolelwa, ngusagona mwamtendele chilo chilichose.”

Bambang ŵatite: “Panaliji kamnyamata kangapunda yaka 19, natamaga umi wakasa malamusi, soni ŵandu ŵajinji ŵanalagasyaga ŵaliji ŵa mtundu wakutuluka wanawuŵengaga.

“Mkupita kwandaŵi, natandite kumsosasosa Mlungu. Panamsosasosaga Mlungu napatile likuga lya ŵandu lyalyasonganaga pampepe kuti alijiganye Malemba Geswela. Kweleko, ŵandu ŵa mtundu wanawuŵengaga wula ŵambele moni mwakusangalala. Nayiwenisoni kuti mu likugalyo, ŵandu ŵa mitundu jakulekanganalekangana ŵatendelaga yindu yimpepe mwakusangalala. Nasimonjile kwabasi! Kaneko nalipikanichisye lilemba lyalikusati, ‘Mlungu jwangali lusagu kwa mundu jwalijose, nambo mundu mwalukosyo lulilose, jwelejo jwakumjogopa nikutenda yambone, Mlungu akumpocela, yangali kandu kuti alijwalukosyo lwati uli.’—Masengo 10:34, 35.

“Masiku agano, nganingolasoni lusagu ni mitundu jine. Achimjangu ŵane ŵatukusanonyelana mnope ali ŵa mtundu unawuŵengaga wula. Kupitila m’Malemba Geswela, Mlungu anjiganyisye kwanonyela ŵane.”

Garoga ŵatite: “Panaliji kamnyamata kangapunda yaka 19, ŵandaŵile kakwana katatu. Ŵandaŵile kaŵili ligongo lyawiyi soni kamo ligongo lyakumsoma mundu mwangalwe. Kaneko najinjile mu likuga lyakwimuchila ni twawuleje ŵandu ŵajinji. Pawamasile  ungapikangana, naliji jwamkulungwa jwa likuga lyakwajogoya ŵandu pakusaka kupata mbiya, soni kumanyilila ngani sine. Alonda ŵangu ŵanguyaga kulikose. Naliji mundu jwaukali mnope, soni jwakogoya.

“Kaneko, lisiku line, naŵalasile lilemba Iyakuti, ‘Jwalijose jwakwete unonyelo, ali jwakulisinga mtima nipo soni jwakuweŵa. Jwakwete unonyelo ali jwangasilila, kapena kulilumba kapena kulikwesya. Jwalijose jwakwete unonyelo jwangatenda chipongwe, jwangalinonyela, jwangatumbila, jwangali mangawa.’ (1 Akolinto 13:4, 5) Maloŵega gangamwile mtima. Nasamile kwawula kudela jasambano, nalijigenye Malemba, soni nakamulichisyaga masengo yanalijiganyagayo paumi wangu.

“Sambano nganimba mundu jwaukali. Nambo ndili jwakwiganya Maloŵe ga Mlungu jwakuchimbichika. Umi wangu wana chakulinga, soni ndili jwakwikutila.”

Yakutendekwayi, soni yine yejinji yikusalosya kuti “Maloŵe ga Mlungu gali ga umi soni gakusakamula masengo mwamachili.” (Ahebeli 4:12) Maloŵe ga Mlunguga gali gakupikanika chenene, gakamuchisya, soni gakulimbikasya.

Ana Malemba Geswela mpaka gakamuchisyesoni wawojo? Elo, mpaka gakamuchisye payakusawusya yiliyose yakusimana nayo. “Yosope yayili m’malemba yapelekwe ni Mlungu, yili ya chikamuchisyo pakwiganya usyesyene, pakwamuka, pakolosya, nipo soni pakwalanjisya ŵandu ya chilungamo, kuti mundu jwa Mlungu aŵe jwammalilwe mnope, jwana yakwenela yosope kugatenda masengo gambone gagaligose.”—2 Timoteo 3:16, 17.

Sambano, kwende tulole yindu yine yagakusajiganya Malemba Geswela.