Jili jimasile miyesi jakuŵalanjika, Hitoshi ŵalasile mnope ligongo lyakusoŵa masego. Ali apatile upile wine wakulembedwa masengo, Hitoshi ŵasalile ŵakumlembawo kuti jwangatenda yitendo ya ungakulupicika. Ŵakumlembawo ŵatite, “M’mwe mli jwakusimonjesya!” Liŵasa lya Hitoshi soni acimjakwe ŵamlimbikasisye kuti ajendelecele kuŵa jwakulupicika. Nambo jwalakwe jwatandite kayicila. Mwambone, jwaŵecete kuti, “Nguganisya kuti nganindenda cenene kuŵa jwakulupicika.”

Yayamtendecele Hitoshi yikutukumbusya kuti, ngaŵa ŵandu wosope ŵakusakuwona kulupicika kuŵa kwakusosekwa. Ŵanesoni akusakuwona kuti kulupicika mpaka kuyikasye yakusawusya, mnopemnope pamalonda. Jwamkongwe jwine jwakusakamula masengo ku South Africa jwaŵecete kuti, “Wosope ŵangusakamula nawo masengo ali ŵangakulupicika, m’yoyo ndaŵi sine yikusaŵa yakusawusya kuŵa jwakulupicika.”

Mtundu wine wa ungakulupicika wawuli posepose masiku agano uli unami. Mkujiganya jwine jwa pa Koleji ja Massachusetts Amherst, lina lyakwe Robert S. Feldman paŵawungunyisye ŵapatile kuti ŵandu 60 pa ŵandu 100 ŵalisose ŵacakulungwa, akusalambusya kamo pa 10 minisi jilijose jakutagulilana. Ce Feldman ŵaŵecete kuti, “Yakuyicisya yakuwungunyaku yaliji yakusimonjesya mnope. Nganitujembeceyaga kuti ŵandu ŵajinji mpaka alambusyeje cati m’yiyi.” Ŵandu ŵajinji akusaŵengana nayo yakuti mundu jwine jwalambusyeje, atamose kuti pana ŵandu ŵajinji ŵakusalambusya.

Ligongo cici masiku agano kulambusya, wiyi soni ndamo sine sya ungakulupicika sili syakuwanda? Ana ungakulupicika ukusiwakwaya wuli ŵandu wosope? Ana m’weji mpaka tuŵambale wuli ungakulupicika?