Gelega gali maloŵe gakutyochela kwa ŵandu ŵakusalwala ulwele wa kulagasika nganisyo. Ana wawojo kapena mjawo jwakusamnonyela, akulaga ni ulwele wa kulagasika nganisyo?

Amanyilile kuti nganaŵa jika. Ŵandu ŵajinji masiku agano akulagasika nganisyo. Yeleyi yikusatendekwa ligongo lya yindu yayikututendechela m’wejo kapena yayikwatendechelasoni ŵane.

Jwalijose mpaka ajitichisye kuti tukutama “mundaŵi jakusawusya soni jakogoya.” Ni ligongo lyakwe yili yangasimonjesya kuti tukusimana ni yindu yejinji yakulagasya nganisyo. (2 Timoteyo 3:1) Ŵakuwungunya ŵane ŵapatile kuti pachilambo chosope, pa ŵandu 8 ŵaliwose mundu jumo akusalaga ni ulwele wa kulagasika nganisyo. Ligongo lya ulwele wa COVID-19, ŵandu chiŵandika 26 pa ŵandu 100 ŵaliwose ŵadandawulaga mnope mu chaka cha 2020 kulekangana ni chaka cha 2019. Nambosoni mu chaka cha 2020, ŵandu chiŵandika 28 pa ŵandu 100 ŵaliwose ŵalwasile mnope ulwele wa kulagasika nganisyo kulekangana ni muyaŵelele mu chaka cha 2019.

Kumanyilila kuti ŵandu ŵajinji masiku agano akudandawula soni kulwala ulwele wa kulagasika nganisyo, kuli kwakusosekwa mnope. Nambo chindu chakusosekwa mnope chili chakuti, tumanyilileje mwachitema yindu yayikututendechela nambosoni yayikwatendechela achalongo achimjetu.

Mundu pangakulagasika nganisyo yindu yikusamjendela chenene paumi soni akusatenda yindu chenene. Jwalakwe akusakombola kumalana ni yindu yakulagasya nganisyo, akusakamula masengo chenene soni akusaŵa jwakusangalala ni umi wakwe.

• Ulwelewu NGAWUKUSATANDA ligongo lyakuti mundu akulepela kutenda yindu yineyakwe chenene.

• ULI ulwele wawukusamtendekasya mundu kuti alagasicheje nganisyo soni alepeleje kuganisya chenene, ukusamtendekasyagasoni kuti alepeleje kulilekasya soni akusatenda yindu mpela jwamasoka.

•   Mundu jwakulaga ni ulwelewu, yikusaŵa yakusawusya kupata achimjakwe soni akusalepela kutenda yindu yakusosekwa mnope paumi wakwe.

• Mundu jwalijose mpaka alwale ulwelewu. Yili myoyo ligongo lyakuti ulwelewu wangalola yaka yakwete mundu, mtundu wakusatyochela, mbumba jakusatyochela, kawoneche ka mundu, ndamo, dini jali, majiganyo gakwete kapenasoni chipanje chakwete.

Ndaŵi sine mundu mpaka asimanikwe kuti atandite kutenda yindu mwakusimonjesya. Jwalakwe mpaka agoneje mnope kapena panandi, mpaka atande kulya mnope kulekangana ni mwaŵalilaga pandanda kapena mpaka atande kudandawula mnope. Naga yili myoyo, mpaka asosekwe kuwonegana ni ŵachipatala ni chakulinga chakuti ŵasalile chachikutendekasya yeleyi soni yampaka atende kuti aŵe chenene. Nambo, ana ni kwapisoni kwampaka apate chikamuchisyo?

Yesu Klistu juŵaliji jwalunda mnope kupunda mundu jwalijose pachilambopa, jwasasile kuti, “Ŵandu ŵambonembonepe ŵangasosekwa dokotala, nambo ŵakulwala.” (Mateyu 9:12) Ŵandu ŵakulwala mpaka aŵe ŵakusangalala soni mpaka awuwoneje umi wawo kuti ukwete chakulinga naga akupochela chikamuchisyo chambone chamtela. Myoyo mpaka luŵe lunda kuja kupochela chikamuchisyo chamtela mwachitema payiweni yimanyisyo yakulosya kuti akulwala. a

Yili yisyene kuti Baibulo nganijiŵa buku ja chipatala nambo yajikusasala mpaka yitukamuchisye kuti tuganisyeje chenene. Tukwalimbikasya kuti aŵalanje magasiniji ligongo jikusala yampaka atende ŵandu ŵakulwala ulwele wa kulagasika nganisyo.