NGANI JA PANDANDA | ANA MLUNGU AKUSAJIWONA MWATULI NGONDO?
Ana Mlungu Ŵajiwonaga Mwatuli Ngondo Ndaŵi Jakala?
Ŵandu ŵa Mlungu ŵakalakala ŵaŵakolanjikwaga kuti Ayisalayeli ŵalagaga mnope paŵaliji ku Iguputo. Jemanjaji ŵapopelaga kwa Mlungu mwakuwilisyawilisya kuti ŵakamucisye nambo pajigele ndaŵi jelewu kuti Mlungujo ŵakamucisye. (Eksodo 1:13, 14) Ayisalayeli ŵajembeceye kwa yaka yejinji kuti Mlungu ŵakulupusye ku ngalwe syaŵatendelaga Aiguputo. Kaneko ndaŵi jakwanile jakuti Mlungu ŵakamucisye. (Eksodo 3:7-10) Baibulo jikusati Mlungu msyenejo ŵaputile ngondo ni Aiguputo. Jwalakwe ŵagwisisye m’cilambo ca Iguputo milili jejinji, kaneko ŵajonasile mwenye jwa ku Iguputo ni asilikali ŵakwe m’Nyasa Jecejewu. (Salimo 136:15) Pandaŵiji, Yehofa ŵalosisye kuti ali ‘jwangondo jwamacili.’
Yaŵatesile Mlungu pakwajonanga Aiguputo pangondo yikulosya kuti jwalakwe ngakusaŵengana ni ngondo syosope. Ndaŵi sine, Mlungu ŵalamulaga Ayisalayeli kuti aputeje ngondo. Mwambone, pandaŵi jine jwalakwe ŵalamwile kuti aputane ni Akanani ŵaŵaliji ŵandu ŵakusakala mnope. (Deuteronomo 9:5; 20:17, 18) Ŵamlamwilesoni mwenye jwa Yisalayeli, Daudi kuti aputane ni Afilisiti. Mlungu ŵamsalile Daudi yakuti atende kuti apunde ngondojo.
Ngani sya m’Baibulo syelesi sikulosya kuti Ayisalayeli paŵasimanaga ni ŵandu ŵakusakala ŵaŵajogoyaga, Mlungu ŵakundaga kuti aputane nawo ni cakulinga cakwacenjela Ayisalayeliwo soni kucenjela kulambila kusyesyene. Nambo alole songa sitatusi syasikulosya yaŵatendaga Mlungu pandaŵi jangondo.
-
MLUNGU NI JUŴASAGULAGA JWAKUSOSEKWA KUPUTA NGONDO. Pandaŵi jine, Mlungu ŵasalile Ayisalayeli kuti, “Ulendo awuno ngakusosekwa kuputa ngondo.” Ligongo cici ŵasalile yeleyi? Ligongo lyakuti Mlungu msyenejo ni juŵaputile ngondojo mmalo mwa jemanjajo. (2 Mbiri 20:17; 32:7, 8) Jwalakwe ŵatesile yeleyi ndaŵi syejinji mpelasoni mwatusasile kundanda kwa nganiji. Ndaŵi sinesoni, Mlungu ŵalamulaga Ayisalayeli kuputa ngondo syaŵasijiticisyaga jwalakwejo mpela syakucenjela Cilambo Celagucisye.
—Deuteronomo 7:1, 2; Yoswa 10:40. -
MLUNGU NI JUŴASAGULAGA NDAŴI JAKUPUTILA NGONDO. Ŵakutumicila ŵa Mlungu ŵasosekwaga kwembeceya mpaka ndaŵi jasagwile Mlungu jakuti aputane ngondo ni ŵandu ŵakusakala. Jemanjaji nganasosekwaga kuputana ngondo ni ŵane ndaŵiji mkanijikwane. Baibulo jikusalosya kuti naga Ayisalayeli ŵajawulaga kungondo ndaŵi jakwe mkanijikwane Mlungu nganiŵakamucisyaga. *
-
Atamose kuti Mlungu ŵajonasile Akanani, nambope jwalakwe ŵakulupwisye ŵandu ŵane mpela Lahabu ni liŵasa lyakwe
MLUNGU JWANGASANGALALA NI CIWA CA ŴANDU KUPWATIKAPO ŴAKUSAKALA. Yehofa Mlungu ali Mkupeleka jwa umi soni Mkupanganya jwa ŵandu. (Salimo 36:9) M’yoyo, jwangasaka kuti ŵandu aweje. Nambo cakutesya canasa cili cakuti ŵandu ŵane akusatenda yindu yakwalagasya kapena kwawulaga ŵane. (Salimo 37:12, 14) M’yoyo, Mlungu ndaŵi sine ŵakundaga kuti ŵandu apute ngondo kuti amasye yindu yakusakalayi. Atamose kuti Mlungu ŵakundaga Ayisalayeli kuputa ngondo nambope jwalakwe ŵalosisye kuti ali “jwacanasa” soni “jwangatumbila citema.” (Salimo 86:15) Mwambone, Ayisalayeli mkanajonanje msinda ŵasosekwaga ‘kwenesya mumsindamo ya mtendele.’ Yeleyi yapaga ŵandu ŵa mumsindamo upile wakucenga ndamo syawo. (Deuteronomo 20:10-13) Pakutenda yeleyi Mlungu ŵalosisye kuti ‘ngakusasangalala ni ciwa ca jwakusakala, nambo akusasaka kuti mundu jwakusakala alece matala gakwe ni kuŵa cijumi.’
—Ezekieli 33:11, 14-16. *
Mwakamulana ni yatulijiganyisyeyi, tuyiweni kuti Mlungu ŵajiwonaga ngondo mpela litala lyakumacisya ŵandu ŵakusakala. Nambo Mlungu ni juŵasagulaga ndaŵi jakuŵajilwa jakuputila ngondo soni jwakusosekwa kuputa ngondojo. Nambo ana Mlungu ŵaputaga ngondo pakusaka kuwulaga ŵandu basi? Iyayi. Jwalakwe akusaŵengana ni yakuwulasyana. (Salimo 11:5) Ana Mlungu ŵacenjile mwaŵajiwonelaga ngondo Yesu Klistu ali atandite undumetume wakwe m’yaka 100 yandanda?
^ ndime 7 Amaleki soni Akanani ŵagomece Ayisalayeli ligongo lyakuputa ngondo Mlungu ali ŵalekasisye. (Numeri 14:41-45) Pali papite yaka, Mwenye jwakulupicika Yosiya ŵaputile ngondo janganajijiticisya Mlungu. Yakuyicisya yakwe jwawile.
^ ndime 8 Ayisalayeli nganajenesya ya mtendele mkanatande kuputana ni Akanani, ligongo lyakuti Mlungu ŵapele Akananiwo yaka 400 kuti alece yakusakala. Akananiwo ŵasakele mnope mwati ngamkanacenga. (Genesis 15:13-16) M’yoyo, ŵasosekwaga kwajonanga. Nambo Akanani ŵaŵacenjile ŵakulupwice.
You May Also Like
ANA
Ayisalayeli Akwinjila mu Kanani
Ana Ayisalayeli ŵajinjile cakaci mu Kanani, ligongo cici Yehofa ŵamkulupwisye Rahabi ni ŵamwiŵasa mwakwe mu msinda wa Yeliko?
