NGANI JA PANDANDA | YAMPAKA ATENDE KUTI ALIJIGANYE YEJINJI M’BAIBULO
Yampaka Atende Kuti Kuŵalanga Baibulo Kwawo Kuŵeje Kwakusangalasya
Ana kuŵalanga Baibulo akusakuwona kuŵa kwakupesya kapena kwakulimbikasya? Yikusajigalila yakusatenda pakujiŵalanga. Kwende tulole yampaka atende kuti akoleje lung’wanu soni asangalaleje ni kuŵalanga Baibulo.
Aŵalanjeje Baibulo jakusala yisyesyene, soni jakupikanika cenene. Naga akuŵalanga Baibulo jajikwete maloŵe gejinji gacikala soni gakusawusya kugapikanicisya, nikuti nganaŵa asangalele ni kuŵalanga Baibulo kwawo. M’yoyo asagule kuŵalanga Baibulo jajikwete maloŵe gangasawusya kugapikanicisya gampaka gayice pamtima. Nambosoni jiŵeje jakuti ŵajigopolele cenene. *
Akamulicisyeje masengo yakupanganyapanganya ya moŵa agano. Masiku agano, Baibulo jikusimanikwasoni pa intaneti. Mpaka ajiŵalanjile pa intaneti papopo kapena kujijigala ni kuŵalanjilaga pa kompyuta, pa tabuleti, kapena pa foni. Mabaibulo ga pa intaneti gakwete yakamucisya kuti apateje mwacitema ndime sine sya m’Baibulo syakamulana ni ngani jakuŵalangajo, soni yakamucisya kulola Mabaibulo gane. Naga ŵanganonyela mnope yakuŵalanga, akadandaula, m’yiŵeceto yine Baibuloji jipalisoni jakwamba kupikanila. Ŵandu ŵajinji akusanonyela kupikanilaga pali pa basi, pakucapa, kapena pakukamula masengo gane. Wuli alinje litala lyambone kwa wawojo?
Akamulicisyeje masengo yindu yakwakamucisya kujipikanicisya Baibulo. Panasoni mabuku ni yindu yine yakwakamucisya kujipikanicisya Baibulo. Pana mapu ga malo gakolanjikwa m’Baibulo. Mapuga mpaka gakamucisye kumanyilila cenene kuyatendecele yineyakwe soni kugawona munganisyo malo gasyesyenego. Ngani sya m’magasini mpela ajino kapena syasikusimanikwa pa webusayiti ja jw.org/yao, mpaka syakamucisye kujipikanicisya Baibulo.
Alinje matala gakulekanganalekangana. Naga akuganisya kuti kuŵalanga Baibulo kutandila kundanda mpaka kumbesi kuli kwakupesya, wuli alinje kutandila ngani syampaka syasangalasye mnope. Naga akusaka kwamanyilila cenene ŵandu ŵakumanyika mnope ŵa m’Baibulo, aŵalanjeje ngani ja mundu jwalijose pajikapajika. Cisyasyo ca litala lyeleli cili pa libokosi lyakuti, “Kwamanyilila Cenene Ŵandu Ŵakolanjikwa m’Baibulo.” Kombolekasoni kutanda kuŵalanga ngani jinejakwe jakujisaka, kapena kujiŵalanga ngani mwakuya ndaŵi jiyatendecele yindu. Wuli ngalinga yine mwa yeleyi?
^ ndime 4 Ŵandu ŵajinji ayiweni kuti Baibulo jakolanjikwa kuti Baibulo la Dziko Latsopano la Malemba Opatulika jili jegopolele cenene, jakusala yisyesyene, soni jangasawusya kujiŵalanga. Ŵamboni sya Yehofa ni ŵakuwandisya Baibuloji, soni jikusimanikwa m’yiŵeceto yine yakupunda 130. Komboleka kujigala Baibuloji pa webusayiti ja jw.org kapena pa pologalamu ja JW Library. Kombolekasoni kwasalila Ŵamboni kuti cayice najo Baibuloji kumangwawo.
