Pa 27 Januwale, 2023, lili lisiku lyele ŵandu ŵajinji pachilambo chosope chakumbuchile ŵandu ŵajinji ŵaŵawulajidwe ni ulamusi wa Nazi ku Germany. Yindu yangalwe soni yakogoya yayatendekwe yaka yakupunda 75 munyumamu mpaka yatendekasye ŵandu kuliwusya kuti ligongo chichi Mlungu ŵakundile kuti ŵandu ŵajinji awulajidwe mu ulamusi wa Nazi ku Germany.

•   Kuti amanyilile yajikusasala Baibulo panganiji aŵalanje ngani jakuti “Ligongo Chichi Mlungu Ŵakundile Kuti Ŵandu Ŵajinji Awulajidwe mu Ulamusi wa Nazi ku Germany?”

 Ayuda ŵajinji ŵalasile mnope ni yindu yayatendekweyi. Mwamti ulamusi wa Nazi ŵalinganyisye yakuti uwulaje ŵandu mamiliyoni gejinji. Magulu ganesoni ga ŵandu ŵagalagasyaga soni kugawulaga. Jimo mwa magulu gelega jili ja Mboni sya Yehofa. Jemanjaji ŵalagasyaga ligongo lya yindu yakusakulupilila yakutyochela m’Baibulo.

•   Kuti amanyilile yejinji panganiji, aŵalanje ngani ja Chichewa jakuti “Kodi a Mboni za Yehova Zinawathera Bwanji pa Nthawi Imene Anthu Ambirimbiri Anaphedwa mu Ulamuliro wa Chipani cha Nazi ku Germany?”

 Ŵandu ŵajinji akogopa kuti kuwulajidwa kwa ŵandu ŵajinji mpela kweleku mpaka kutendekwesoni kusogoloku. Nambo ngani jambone jili jakuti, Baibulo jikusasala kuti msogolo yindu yakogoyayi ngasiyitendekwasoni.

•   “Une [Yehofa] ni jungusamanyilila yinamkolochesye jemanja, yakuti timchiŵa pambone ngaŵaga pakusakala, kuti mkole chembecheyo chisyesyene pa yamsogolo.”—Yelemiya 29:11. a

 Yeleyi yichitendekwa pandaŵi jele Yehofa Mlungu chachimasya yakusakala yosope ni kulinganya yindu yayijonasiche. Jwalakwe pangakaŵapa:

•   Chatyosye ŵandu ŵakusakala ŵele chakulinga chawo chili kwawulasya ŵane.—Misyungu 2:22.

•   Chamasye yakusawusya ya ŵandu wosope ŵakulaga.—Chiwunukuko 21:4.

•   Chajimusye ŵandu ŵaŵawile.—Yohane 5:28, 29.

 Yili yakomboleka kulupilila yajikusasala Baibulo pangani ja chembecheyo chelechi. Kuti amanyilile ligongo lyakwe akusosekwa kukulupilila yeleyi, tukwaŵenda kuti atande kulijiganya Baibulo mwalulele ni ŵa Mboni sya Yehofa.