Yaunami yakusaŵecheta ŵandu: Ŵamboni sya Yehofa ŵangatenda nawo Kilisimasi ligongo lyakuti ŵangamkulupilila Yesu.

 Yisyesyene yakwe: Uweji tuli Aklistu soni tukusakulupilila kuti ŵandu chachikulupuka kupitila mwa Yesu Klistu.—Masengo 4:12.

 Yaunami yakusaŵecheta ŵandu: Akusasokonasya maŵasa ligongo lyakuti akusagajiganyaga kuti akasangalalilaga Kilisimasi.

 Yisyesyene yakwe: Tukusayiwona kuti maŵasa gali gakusosekwa mnope, mwamti tukusakamulichisya masengo malangiso ga m’Baibulo pakwakamuchisya ŵandu kuti akole maŵasa gakulimba.

 Yaunami yakusaŵecheta ŵandu: Yikusiyapita yindu yele ŵandu akusatenda pa Kilisimasi, mpela kupelegana mbaso, kulimbikasya mtendele pachilambopa nambosoni kusoselana yambone.

 Yisyesyene yakwe: Tukusalingalinga kwatendela ŵandu yambone nambosoni kuŵa nawo mwamtendele lisiku lililyose. (Misyungu 11:25; Aloma 12:18) Mwachisyasyo, tukusalosya yeleyi patukutenda misongano jetu nambosoni kulalichila mwakamulana ni yaŵatusalile Yesu kuti: “Mwapochele mwalulele, mpelechejesoni mwalulele.” (Mateyu 10:8) Konjechesya pelepa, tukusajembecheya kuti Uchimwene wa Mlungupe ni wawuchiyikasya mtendele usyesyene pachilambopa.—Mateyu 10:7.

•   Yesu ŵalamwile kuti tukumbuchileje chiwa chakwe, ngaŵaga kupagwa kwakwe.—Luka 22:19, 20.

•   Ŵandumetume ŵa Yesu soni ŵakulijiganya ŵakwe ŵandanda nganasangalalilaga Kilisimasi. Buku jine (The New Catholic Encyclopedia) jikusati “ŵandu ŵatandite kusangalalila Kilisimasi panyuma pachaka cha 243 [C.E.],” soni paliji pali pamasile yaka yakupunda 100 kutyochela pandaŵi jele ŵandumetume ŵakumalisya ŵawile.

•   angali umboni wakulosya kuti Yesu ŵapagwile pa 25 Disemba, nambosoni m’Baibulo pangali palipose papakusasala ya lisiku lyakupagwa kwa jwalakwe.

•   Tukusakulupilila kuti Mlungu jwangajitichisya yakuti ŵandu asangalalileje Kilisimasi, ligongo lyakuti jatyochele ku misyungu jachikusa.—2 Akolinto 6:17.

 Ŵandu ŵajinji akusasangalalila Kilisimasi atamose kuti akusamanyilila kuti jatyochele ku misyungu jachikusa soni uli msyungu wangakamulana ni Baibulo. Ŵandu ŵeleŵa akusaliwusya kuti, ligongo chichi Ŵamboni sya Yehofa akusayiwona kuti kusangalalila Kilisimasi jili ngani jekulungwa?

 Baibulo jikusatulimbikasya kuti tukagambaga kutenda yindu ligongo lyakuti ŵandu ŵajinji akutenda, nambo tukamulichisyeje masengo ‘lunda lwetu’ (Aloma 12:1, 2) Jikusatulimbikasyasoni kuti tukuyeje yayili yisyesyene. (Yohane 4:23, 24) Myoyo atamose kuti tukusasamala ni mwakusayiwonela ŵane yakutenda yetu, uweji tukusakuya mnope mfundo sya m’Baibulo atamose kuti ŵandu ŵajinji ŵangakuyaga mfundosyo.

 Atamose kuti uweji ngatukusasangalalila Kilisimasi, ngatukusitwakanganichisya ŵane kuti nombe nawo akasangalalilaga. Tukusachimbichisya ufulu wa mundu jwalijose pangani jakusangalalila Kilisimasi.