Panyuma pa ma wiki gaŵili, ŵa Mboni sya Yehofa akopwesyesoni ma Baibulo gakwana 6. Pa Julayi 4, 2020, Baibulo ja Dziko Latsopano la Malemba Opatulika jakopweche m’yiŵecheto ya Chibislama soni Chioromo. Palisiku lyakuyichisya pa Julayi 5, pakopwechesoni ma Baibuloga m’yiŵecheto ya Chilatifiya ni Chimarathi. Konjechesya pelepa Baibulo ja Dziko Latsopano la Malemba a Chigiliki jakopweche mu Chibengali soni Chikareni (S’gaw). Ma Baibuloga ŵagakopwesye pa ngani syakutenda kwambula, soni gakusimanikwa pa inteneti. Ŵakulalichila ŵapikanile pologalamuji kupitila pa yipangiso ya makono. Jemanjanji ŵaliji ŵakusangalala kupochela mtuka wakutyochela kwa Yehofawu.

Baibulo jelinganyesoni ja Dziko Latsopano jakopweche m’chiŵecheto cha Chibislama, soni M’bale Mark Sleger jwa mukomiti ja nyambi ku Fiji ni juŵajikopwesye Baibuloji. Ŵakulalichila ŵa ku Vanuatu ŵapikanile pologalamuji kupitila pa yipangiso ya makono. Pologalamuji jatendekwaga m’chiŵecheto cha Chibislama soni ŵajigopolelaga m’chiŵecheto cha makono cha kweleko.

Masengo gakugopolela Baibuloji gajigele yaka yakupunda yitatu. Papali magulu gaŵili gagakamulaga masengo gagopolelaga. Jwagopolela jwine jwatite, “Abale ni alongo chajinonyele Baibulo jelinganyesoniji ligongo lyakuti jili jangasawusya kuŵalanga soni ulembe wakwe ukukamulana ni mwakuŵechetela ŵandu masiku agano. Yeleyi chiyikamuchisye kuti tuwupikanichisyeje chenene usyesyene.”

Tukukulupilila kuti Baibuloji chijakamuchisye ŵakulalichila ŵakupunda 700 ŵakusaŵecheta Chibislama pali mu utumiki soni pakulijiganya pajika.

M’bale Delroy Williamson jwa mukomiti ja nyambi ku Ethiopia, jwakopwesye Baibulo ja Dziko Latsopano mu Chioromo. Abale ni alongo ŵakwana 12,548 ŵalolele pologalamuji kupitila pa yipangiso yawo yamakono, kupwatikapo ŵakulalichila ŵakwana 2,000 ŵakusaŵecheta Chioromo.

Ligongo lya yakusawusya yine, Likuga Lyakulongolela lyajitichisye kuti pologalamuji ajijambule soni ajigulusye pa TV. Ŵakulalichila ŵakwetesoni upile wakupikanila pologalamuji kupitila pa ma foni gawo.

Masengo ga gopolelaga gajigele yaka yakwana msanu soni gakamulidwe ni ŵagopolela ŵakwana msanu. Baibuloji chijiŵe jakamuchisya mnope kwa abale ni alongo ŵakusaŵecheta Chioromo pali mu utumiki.

Panyuma pakamula masengo gagopolela mwakulipeleka mnope, Baibulo ja Dziko Latsopano ja mu Chilatifiya jikopweche. Mipingo jajikusakamulichisya masengo chiŵecheto cha Chilatifiya soni Chilasha jalolelele pologalamu jakopoka kwa Baibuloji.

M’bale Jouni Palmu jwa mu komiti ja nyambi ku Finiland ni juŵakopwesye Baibuloji. Jwalakwe jwatite, “Tuli ŵakusangalala koposya Baibulo jangasawusya kuŵalanga m’chiŵecheto cha Chilatifiya. Tukulupilila kuti yeleyi chiyitukamuchisye kuti tuŵeje ŵakusangalala patukulijiganya soni kuganichisya ya maloŵe ga Mlungu.”

Pakwamba ya yindu yakamuchisya pakuwungunya yayili m’Baibuloji, jumo mwa ŵaŵagopolelaga Baibuloji ŵatite, “Baibuloji, jili jangasawusya kujikamulichisya masengo soni jili jakamuchisya kuti mundu aganichisyeje mnope pakwamba ya Baibulo soni kuti alijiganyeje mwakwanila.”

Nombe ku India, Baibulo ja Dziko Latsopano ja m’chiŵecheto cha Chimarathi jikopweche. M’bale Puneet Aggarwal, jwa mu komiti ja nyambi ku India ni juŵakopwesye Baibuloji.

Masengo gakugopolela Baibuloji gajigele yaka yitatu soni gakamulidwe ni ŵagopolela 6. Jumo mwa ŵagopolelaŵa jwatite, “Baibuloji chijakamuchisye achinangolo pakwajiganya ŵanache ŵawo. Konjechesya pelepa, chijikamuchisyesoni ŵakusajiganya maloŵe ga Mlungu pakwajiganya ŵandu yajikusajiganya Baibulo.”

Jwagopolela jwine jwasasilesoni kuti, “Yili yakusangalasya mnope kumanyilila kuti Baibuloji jiwuchisye pa malo gakwe gakuŵajilwa lina lisyesyene lya Mlungu lyakuti Yehofa. Ŵakuŵalanga chakomboleje kulisimana lina lyakuti Yehofa chiŵandika pa peji jilijose. Yeleyi chiyikamuchisye kuti lina lya Yehofa lichimbichikwe.”

Ŵandu ŵakupunda 83 miliyoni ŵakusaŵecheta chiŵecheto cha Chimarathi, akusatamaga dela ja pasikati pa chilambo cha India.

M’bale Ashok Patel jwa mu komiti ja nyambi, ni juŵakopwesye Baibulo ja Dziko Latsopano la Malemba Achigiliki Achiklistu. Ŵakulalichila ŵakupunda 1,200 ŵapikanile pologalamuji kutyochela ku India soni ku Bangladesh.

Ŵandu ŵakupunda 265 miliyoni akusaŵecheta Chibengali. Chiŵechetochi chili chimo mwa yiŵecheto yayikusaŵechedwa mnope pa chilambo chosope. Pakusaka kuti akoposye Baibulo jangasawusya kujipikanichisya, kagulu ka ŵagopolela ŵakutyochela ku India soni Bangladesh kakamwile masengo mwakamulana kwa yaka yitatu.

Pangani jakopochesya Baibuloji, M’bale Patel ŵatite, “Chiŵecheto cha Chibengali chili chimo mwa yiŵecheto yandanda yele Baibulo jagopoleledwe m’chiŵechetochi. Baibulo ja Malemba Achigiliki jakopweche mu 1801. Chakusangalasya ni Baibuloji chaliji chakuti jakwete lina lya Mlungu lyakuti Yehofa. Nambo ma Baibulo gagagopoleledwe mwachangakaŵa, lina lya Mlungu lila alityosisyemo ni aŵisilemo lina lya uchimbichimbi lyakuti ‘Ambuje.’ Myoyo Baibulo ja Dziko Latsopano la Malemba Achigiliki Achiklistu jili jegopoleledwe mwakulondola soni gangasawusya kujipikanichisya.”

Jumo mwa ŵagopolelawo ŵatite, “Baibuloji jikupeleka umboni wakuti Yehofa Mlungu akusiŵanonyela ŵandu ŵa mitundu jakulekanganalekangana, soni kuti akusaka ŵanduwo ammanyilile jwalakwe ni mwanache jwakwe, Yesu Klistu.”

M’bale Hiroshi Aoki, jwa mukomiti ja nyambi ku Myanmar ni juŵakopwesye Baibulo ja Dziko Latsopano la Malemba Achigiliki Achiklistu ja mu chiŵecheto cha Chikareni (S’gaw). Ŵandu ŵakwana 510 ŵakutyochela m’mpingo 6 ni tumagulu mcheche ŵapikanile pologalamuji kupitila payipangiso yawo.

Masengo gagopolela Baibuloji gajigele chaka chimo. Jumo mwa ŵagopolelawo ŵatite, “Abale ni alongo kupwatikaposoni ŵandu wosope ŵakusaŵecheta Chikaleni (S’gaw) chasangalale ni Baibuloji ligongo lyakuti jiwuchisyesoni lina lya Mlungu lyakuti Yehofa pa malo gakwe soni jigopoleledwe m’chiŵecheto chakuŵecheta ŵandu masiku agano. Baibuloji jili jakupikanika chenene, jigopoleledwe mwakulondola soni jangasawusya kujipikanichisya. Tukumyamichila Yehofa ligongo lya mtuka welewu. Mtukawu chiwutukamuchisye kuŵa paunasi ni Mlungu kupitila m’chiŵecheto cha pamtima petu.”

Jwagopolela jwine jwaŵechetesoni kuti, “Baibulo ja Dziko Latsopano jeleji jigopoleledwe mu chiŵecheto chakusaŵechetaga ŵandu lisiku lililyose. Yeleyi chiyikamuchisye kuti ŵakuŵalanga apikanichisye muŵapikanilaga ŵandu ŵa m’Baibulo. Chakombolechejesoni kuganichisya yindu yayatendechelaga paumi soni nikusyasyaga chikulupi chawo.”

Tukusangalala ni abale ni alongo ŵetu ŵapochele ma Baibuloga. Ngatukukuyichila kuti kukopoka kwa ma Baibuloga chikukamuchisye ŵakulalichila ŵakusaŵecheta yiŵechetoyi kuŵa paunasi ni Yehofa. Chikukamuchisyesoni pakulalichila usyesyene kwa ŵane.—Yohane 17:17.