Mikaele, jwele ŵandu ŵadini sine akusamkolanga kuti “Mikaele Jwamswela,” lili lina lya Yesu lyele aŵele ali mkulikamulichisya masengo mkanayiche pachilambo chapasi soni paŵawujile kwinani. a Pandaŵi jine, Mikaele jwakanganile ni Satana, Mose ali awile. Jwalakwe jwalikamuchisye lilayika line kuti likapeleche utenga wakutyochela kwa Mlungu kwawula kwa jwakulochesya Daniele. (Daniele 10:13, 21; Yuda 9) Lina lyakuti Mikaele likusagopolela kuti, “Ŵani Ŵali Mpela Mlungu? Jwalakwe aŵele ali mkutenda yindu mwakamulana ni linali, ligongo aŵele ali mkuwuchenjela ulamusi wa Mlungu soni aŵele ali mkuputa ngondo pakulimbana ni achimmagongo ŵa Mlungu.​—Daniele 12:1; Chiwunukuko 12:7

 Kwende tulole ligongo lyakwe yili yakupikanika kusala kuti Yesu ali Mikaele jwamkulungwa jwa malayika.

•   Mikaele ni jwali ‘jwamkulungwa jwa malayika.’ (Yuda 9) Maloŵe gakuti ‘jwamkulungwa jwa malayika,’ gakusasimanikwa mmalo gaŵilipe m’Baibulo. Malo gosopega akusakamulichisya masengo maloŵe gakulosya kuti lilayika lyalikwete udindowu lipali limpepe basi. Ndime jine jikusasala kuti Ambuje Yesu chachituluka kutyochela kwinani ni “tipachiŵa kubangula kwa maloŵe ga jwamkulungwa jwa malayika.” (1 Atesalonika 4:​16) Myoyo, ligongo lyakuti Baibulo jikusala kuti Yesu akwete maloŵe ga “jwamkulungwa jwa malayika,” nikuti jwalakwe ni jwali Mikaele soni jwamkulungwa jwa malayika.

•   Mikaele ni jwakusalongolela gulu ja ngondo ja malayika. “Mikaele ni malayika gakwe ŵaliji mkumenyana ni chingwena,” jwali Satana. (Chiwunukuko 12:7) Mikaele akwete udindo wekulungwa mnope kwinani, ligongo akusakolanjidwa kuti “jumo jwa malayika gekulungwa” soni “lilayika lyekulungwa.” (Daniele 10:13, 21; 12:1) Mundu jwine jwakumanyilila ya Baibulo lina lyakwe David E. Aune, jwasasile kuti mena gelega gakulosya kuti “Mikaele ali jwamkulungwa jwamalayika.”

   Baibulo jikusasala lina line lipempe lya lilayika lyalikwete udindo wakulongolela gulu ja malayika. Jikusasala kuti ‘tachiyika Ambuje Yesu kutyochela kwinani pamo ni malayika gawo gamachili. Tachiyika ni moto wakolela, ni kwapa chilango ŵandu.’ (2 Atesalonika 1:​7, 8; Mateyu 16:27) Yesu “jwakwesile kwawula kwinani nipo akutama ku mkono wamlyo wa Mlungu. Kweleko malayika ni maulamusi gakwinani ni ŵamachili akusampikanila jwalakwejo.” (1 Petulo 3:​21, 22) Yili yangapikanika kuti Mlungu aŵiche Yesu soni ndaŵi jijojo nikuŵikasoni Mikaele kuti alongoleleje malayika gakwe geswela. Myoyo, mpaka tujile kuti mena gakuti, Yesu ni Mikaele, gakusala ya mundu jumo.

•   Mikaele “tachiyika” pandaŵi ja “yisawusyo yakogoya” yanganiyiwonecheje chitandilile. (Daniele 12:1) Mu buku ja Daniele, maloŵe gakuti “tachiyika” akusagakamulichisya masengo pakusala ya mwenye jajikoseche kuti jitende yine yakwe yakusosekwa mnope. (Daniele 11:​2-4, 21) Yesu Klistu, mpela “Maloŵe ga Mlungu” soni “Mchimwene jwa ayimwene” chachajonanga achimmagongo ŵa Mlungu soni kwakulupusya ŵandu ŵa Mlungu. (Chiwunukuko 19:11-​16) Jwalakwe chachitenda yeleyi pandaŵi ja ‘yisawusyo yakogoya mnope yayichiwoneka gele masikugo, yanganiyiwonechejesoni chitandilile chipanganyichisye Mlungu chilambo chapasi.’​—Mateyu 24:21, 42.