U YAATAL u yóol máak yoʼolal baʼax u beetmeʼ jach ku taasik muʼyajil. Davideʼ tu yaʼalaj: «Maʼ tu xuʼulul in tuukul tiʼ le baʼaxoʼob maʼ maʼalob tin beetoʼ, beyoʼob junpʼéel baʼal jach aal táan u pechʼkeneʼ» (Salmo 38:4, TNM). Yaan sukuʼunoʼob yéetel kiikoʼobeʼ ku deprimiroʼob, tumen ku tuklikoʼob mix bikʼin u perdonartaʼaloʼob tumen Jéeoba (2 Corintoiloʼob 2:7). Techeʼ, ¿ka tuklik wa xan maʼ tu perdonartaʼal a kʼebanoʼob tumen Jéeoba? ¿Ka tuklik wa jach nuuktak a kʼeban, le oʼolal maʼ tu páajtal u perdonartik? Maʼ tuukul beyoʼ, ¡Jéeobaeʼ u kʼáat u yáantech!

Jéeobaeʼ mix juntéen ku pʼáatal maʼ u kʼamik le máaxoʼob ku arrepentiroʼoboʼ. Baʼaxeʼ ¡ku yilik u yáantkoʼob! Tu kettʼaanil le paal tu xuʼuxupaj u herenciaeʼ, Jesuseʼ tu yaʼaleʼ lukʼ tu yotocheʼ ka bin u beet baʼaloʼob kʼaastak yéetel koʼoleloʼob chéen bey u máanoʼoboʼ. Baʼaleʼ ka máan kʼiineʼ taakchaj u suut tu yotoch. ¿Baʼax úuch le táan u suutoʼ? «Desde náach u taal[eʼ] ilaʼab tumen u taataeʼ ka chʼaʼab óotsilil tiʼ; u taata túuneʼ bin áalkabileʼ, tu méekʼeʼ ka tu tsʼuʼutsʼaj.» (Lucas 15:11-20.) Jéeobaeʼ bey jeʼex le taatatsil jach yaan u yaabilaj yéetel tu chʼaʼaj óotsililoʼ. ¿A kʼáat wa náatsʼal tu yiknal, baʼaleʼ ka wuʼuyik bey «náach» yanil tiʼ techeʼ? Wa ka suunakecheʼ, letiʼeʼ u tichʼmaj u kʼab utiaʼal u kʼamkech.

¿Ka wuʼuyik wa jach yaʼab a kʼebanoʼob wa jach kʼaastak, le oʼolal maʼ tu páajtal a perdonartaʼal tumen Jéeoba? Wa beyoʼ, tuukulnen tiʼ le baʼax ku yaʼalik Isaías 1:18: «Yuumtsileʼ ku yaʼalik: ‹Koʼoteneʼex ka k-ilaʼa bukaʼaj a pʼaaxeʼex. Kex tumen sen chakjopeʼen a kʼebaneʼexeʼ, teneʼ bíin in pʼaʼat sen sak bey [nieveeʼ]›». Jach beyoʼ, Jéeobaeʼ jeʼel u perdonartik le kʼebanoʼob ku tuklaʼal bey maʼ tu perdonartaʼal, wa u tuʼupul jeʼex junpʼéel nookʼ sak ku bóonol yéetel junpʼéel chak pinturaeʼ.

Jéeobaeʼ maʼ u kʼáat ka seguernak a muʼyaj tumen yaachajaʼan a concienciaiʼ. Ken u perdonartech Dioseʼ ku yantaltech junpʼéel maʼalob conciencia, leloʼ jeʼel u yáantkech a wuʼuyaba maʼalobileʼ. ¿Baʼax unaj a beetik utiaʼal u perdonarkech? Unaj a beetik le baʼax tu beetaj xan rey David úuchjeakiloʼ. Yáaxeʼ tu yaʼalaj: «Yaan in waʼalik tiʼ Jéeoba le baʼax maʼ maʼalob in beetmoʼ» (Salmo 32:5, TNM). Kʼaʼajaktecheʼ Jéeobaeʼ tsʼoʼok u yaʼaliktech: ‹Koʼoten ka k-ilaʼa bukaʼaj a pʼaax›. Uʼuy baʼax ku yaʼalik, natsʼaba tu yiknal ich oración. Aʼaltiʼ baʼax ta beetaj yéetel bix a wuʼuyikaba. Davideʼ tu yaʼalajtiʼ tu jaajil u yóol: «Perdonart in kʼebaniʼ. [...] In Dios, techeʼ yaan a kʼamik junpʼéel puksiʼikʼal yaachajaʼan u yóol ku yuʼubik bey táan u peʼechʼleʼ» (Salmo 51:2, 17, TNM).

U kaʼapʼéel baʼax tu beetaj Davideʼ tu kʼamaj le áantaj tsʼaʼabtiʼ tumen Natán, le profeta túuxtaʼab tu yiknal tumen Diosoʼ (2 Samuel 12:13). Teʼ kʼiinoʼob xanaʼ Jéeobaeʼ tsʼoʼok u tsʼáaik ancianoʼob teʼ  múuchʼuliloʼoboʼ. Letiʼobeʼ noʼojaʼanoʼob utiaʼal u yáantkoʼob le máaxoʼob tsʼoʼok u arrepentiroʼob utiaʼal u seguer u biskubaʼob maʼalob yéetel Jéeoba. Ken tʼaanakech yéetel le ancianoʼoboʼ, yaan u meyajtiʼob le Biblia utiaʼal u yáantkechoʼob a natsʼaba tiʼ Dios tu kaʼatéenoʼ. Tsʼoʼoleʼ yaan u oraroʼob ta wéetel utiaʼal u xuʼulul a chiʼichnaktal yéetel utiaʼal a luʼsik ta tuukul le baʼaxoʼob beetik u yaatal a wóoloʼ (Santiago 5:14-16).

U jaajileʼ maʼ chéen chʼaʼabil u yaʼalik máak tiʼ Jéeoba yéetel tiʼ le ancianoʼob le baʼax kʼaas tsʼoʼok u beetkoʼ. Tak Davideʼ bey úuchiktiʼoʼ. Le Bibliaoʼ ku yeʼesikeʼ maʼ tu jáan aʼalaj tiʼ mix máak le baʼax kʼaas tu beetoʼ (Salmo 32:3). Baʼaleʼ ka máan kʼiineʼ tu yilaj u yutsil úuchik u yaʼalik yéetel úuchik u arrepentir.

Junpʼéel tiʼ le utsiloʼob maas nojoch tu yilaj Davidoʼ letiʼe kiʼimak óolal kaʼa anchajtiʼoʼ. Letiʼeʼ tu yaʼalaj: «Kiʼimak u yóol le máax ku perdonartaʼaloʼ, le máax ku perdonartaʼal le kʼeban u beetmoʼ» (Salmo 32:1, TNM). Tsʼoʼoleʼ tu kʼáataj xan: «Jéeoba Dios, chaʼa in tʼaan, beyoʼ yaan in alabarkech yéetel in chiʼ» (Salmo 51:15, TNM). Davideʼ kiʼimakchaj u yóol tu kaʼatéen, le oʼolal tu tsʼáaj u graciasil tiʼ Jéeoba yéetel tu alabartaj tu táan uláakʼ máakoʼob.

Jéeobaeʼ u kʼáat ka yanaktech junpʼéel conciencia limpio. U kʼáateʼ le ken a tsikbalt tiʼ uláakʼ máakoʼob baʼaxoʼob ku yaʼalikeʼ ka a beet yéetel kiʼimak óolal, maʼ u yaatal a conciencia yéetel ka ilaʼak ka beetik le baʼax ka waʼalikoʼ (Salmo 65:1-4). Jéeobaeʼ ku yaʼaliktoʼon: «Kʼex a tuukuleʼex yéetel utskíint a kuxtaleʼex utiaʼal ka perdonartaʼak a kʼebaneʼex, utiaʼal ka taalak u kʼiinil u kaʼa tsʼaʼabal a muukʼeʼex tumen Jéeoba, lelaʼ jach letiʼ kun beetik» (Baʼaxoʼob 3:19).

Martha, le t-aʼalaj tu káajbaleʼ ku yaʼalik: «In hijoeʼ seguernaj u túuxtikten U Pʼíich Tulumil Kanan yéetel ¡Despertad! Jujunpʼíitileʼ joʼopʼ in kaʼa biskinba yéetel Jéeoba. Le baʼax maas talam úuchik in wilkoʼ, in kʼáatiktiʼ ka u perdonart tuláakal le baʼaxoʼob kʼaastak in beetmoʼ. Hasta ka tin beetaj. Maʼ tin creertik, máan cuarenta años ka suunajen yiknal Jéeoba. Le baʼax úuchtenoʼ ku yeʼesikeʼ kex jeʼel bukaʼaj tiempo náachchajkoʼon tiʼ Jéeobaeʼ, letiʼeʼ ku tsʼáaiktoʼon u páajtalil k-natsʼikba tiʼ u yaabilaj utiaʼal k-múuchʼ meyajtik yéetel u kaajal».