XOOKIL 7
¿Baʼax unaj a beetik wa ka wuʼuyikaba ta juunal yéetel saajkech?
Ilawil le chan xiʼipal yaan teʼ dibujooʼ. Chéen tu juunal u yilaʼal yéetel bey saajkeʼ, ¿máasaʼ? ¿Yaan wa kʼiin ka wuʼuyikaba beyoʼ?... Tuláakloʼon yaan kʼiin bey k-uʼuyikbaoʼ. Le Bibliaoʼ ku tʼaan tiʼ máaxoʼob meyajt Jéeoba úuchjeakil tu yuʼububaʼob tu juunaloʼob yéetel tu chʼaʼajoʼob xan saajkil. Juntúul tiʼ letiʼobeʼ Elías. Koʼox kaanbal tiʼ letiʼ.
Jezabeleʼ taak kaʼach u kíimsik Elías
Elíaseʼ kuxlaj úuchjeakil, letiʼeʼ síij táanil tak tiʼ u síijil Jesús yéetel tiʼ kajaʼan kaʼach tu kaajil Israeleʼ. Teʼ kʼiinoʼoboʼ Acab, u reyil Israeleʼ, maʼatech u adorartik Jéeoba. Letiʼ yéetel Jezabel, u yataneʼ, ku adorartikoʼob Baal, juntúul dios kʼasaʼan. Le oʼolaleʼ óoliʼ tuláakal le israelitaʼoboʼ joʼopʼ u adorartikoʼob xan Baal. Le reina Jezabeloʼ jach kʼasaʼan yéetel u kʼáat u kíims tuláakal le máaxoʼob adorartik Jéeobaoʼ, ichiloʼobeʼ tiaʼan Elíasiʼ. ¿A wojel wa baʼax tu beetaj Elías?...
¡Elíaseʼ púutsʼi! ¡Bin tak teʼ desiertooʼ ka tu taʼakuba tiʼ junpʼéel sajkab! ¿A wojel wa baʼaxten?... Jaaj, tumen sajakchaji. Baʼaleʼ Elíaseʼ maʼ unaj u chʼaʼik saajkil kaʼachiʼ. ¿Baʼaxten? Tumen letiʼeʼ u yojel jeʼel u yáantaʼal tumen Jéeobaeʼ. Letiʼeʼ tsʼokaʼaniliʼ u yeʼesik tiʼ Elías jach yaan u páajtalil. Juntéenjeakileʼ Jéeobaeʼ tu túuxtaj kʼáakʼ desde teʼ kaʼan utiaʼal u núukik u oración Elíasoʼ. Le oʼolal unaj u kʼaʼajaltiʼ kaʼacheʼ jeʼel u kaʼa áantaʼal tumen Jéeobaeʼ.
¿Bix úuchik u yáantaʼal Elías tumen Jéeoba?
Le tiaʼan Elías teʼ sajkaboʼ, aʼalaʼabtiʼ tumen Jéeoba: «¿Baʼax ka beetik wayeʼ?». Elíaseʼ tu núukaj: «Tsʼoʼok u pʼáatal chéen teen adorartikech. Tin juunal yanen, yéetel saajken in kíimsaʼal». Elíaseʼ tu tukleʼ tsʼoʼok u kíimsaʼal tuláakal le máaxoʼob adorartik Jéeobaoʼ. Baʼaleʼ Jéeobaeʼ tu yaʼalajtiʼ: «Maʼ jaajiʼ. Yaan uláakʼ siete mil máaxoʼob adorartiken. Maʼ a sajaktal. ¡Yaan uláakʼ meyaj in kʼáat ka a beete!». ¿Bix a tuklik tu yuʼubiluba Elías le ka aʼalaʼabtiʼ lelaʼ?...
¿Baʼax ka kanik tiʼ le baʼax úuch tiʼ Elíasoʼ?... Wa yaan kʼiin ka wuʼuyikaba ta juunal yéetel saajkecheʼ, unaj a kʼaʼajsik lelaʼ: Yaantech amigoʼob u yaabiltmoʼob Jéeoba yéetel u yaabiltmechoʼob xan. Kʼaʼajaktech xaneʼ Jéeobaeʼ jach yaan u muukʼ yéetel yaan u yáantkech. ¿Maʼ wa tu kiʼimakkúuntik a wóol a wojéeltik maʼ ta juunal yanechiʼ?...
