Bix jeʼel u yantal kiʼimak óolal ichil a familiaeʼ
Dios tsʼaamil le tsʼoʼokol beeloʼ bey xan u páajtalil u yantal u paalal máak, leloʼobaʼ jatsʼuts regaloʼob u tsʼaamaj Dios. Letiʼeʼ u kʼáat ka yanak kiʼimak óolal tiʼ le familiaʼoboʼ, le oʼolal ku tsʼáaik maʼalob consejoʼob tiʼob. Le consejoʼobaʼ tiaʼanoʼob teʼ Bibliaoʼ, le libro u tsʼaamajtoʼon Diosoʼ. Teʼ xookaʼ yaan k-ilik jujunpʼéeloʼobiʼ.
Íichamtsileʼex, yaabilt a wataneʼex
«Le íichamtsiloʼoboʼ unaj u yaabiltikoʼob u yatanoʼob jeʼex u yaabiltikoʼob u wíinkliloʼobeʼ. Máax u yaabiltmaj u yataneʼ u yaabiltmuba xan. Tumen mix máak ku pʼektik u wíinklil, baʼaxeʼ ku tséentik yéetel ku kanáantik» (EFESIOS 5:28, 29).
Le íichamtsiloʼ letiʼ u poolil u yatan (Efesios 5:23). Chéen baʼaleʼ kex ku nuʼuktik u yataneʼ maʼatech u maltratartik mix tu yaʼaliktiʼ ka u beet junpʼéel baʼal u yojel maʼ tu páajtal u beetik. Baʼaxeʼ ku yaabiltik, ku kanáantik yéetel ku tsʼáaik le baʼax kʼaʼabéettiʼoʼ. Tsʼoʼoleʼ tumen u kʼáat ka kiʼimakchajak u yóoleʼ ku kaxtik u yutsil (Filipenses 2:4). Kéen tsikbalnak tu yéeteleʼ ku yaʼaliktiʼ bix u yuʼubikuba yéetel baʼax ku tuklik, pero ku chʼaʼik xan en cuenta bix u yuʼubikuba u yatan. Maʼatech xan u chʼaʼkʼuxtik, maʼatech u jatsʼik mix tech u yaʼalik baʼaloʼob tiʼ ka u beet u yaatal u yóol (Colosenses 3:19).
Atantsileʼex, unaj a respetarkeʼex a wíichameʼex
«Le atantsil[oʼ] unaj u jach respetartik u yíicham» (EFESIOS 5:33).
Wa juntúul atantsil ku respetartik u yíicham yéetel ku apoyartik le baʼax ku chʼaʼtuklikoʼ ku yáantaj utiaʼal ka u bisuba maʼalob tuláakal le familiaoʼ. Tsʼoʼoleʼ wa le íichamtsil ku beetik junpʼéel baʼal maʼ maʼaloboʼ le atantsiloʼ maʼatech u chʼinik tu yich mix tech u tsʼíikil tu yéetel (1 Pedro 3:4). Wa yaan xan u yutskíintikoʼob junpʼéel problemaeʼ le atantsiloʼ ku yilik tiʼ baʼax súutukil maas maʼalob ka u beete yéetel ku yeʼesik respeto tiʼ u yíicham le kéen tʼaanak (Eclesiastés 3:7).
Maʼ unaj u tusik u núup máak yéetel yaanaliʼ
«Le xiiboʼ yaan u nupkuba yéetel u yatan, tu kaʼatúulaloʼob[eʼ] yaan u suutoʼob junpʼéeliliʼ wíinklil» (GÉNESIS 2:24, nota).
Kéen tsʼoʼokok u beel juntúul xiib yéetel juntúul koʼoleleʼ ku maas yaabiltikubaʼob. Le oʼolal tu kaʼatúulaloʼob unaj u tsʼáaik u yóoloʼob utiaʼal maʼ u xuʼulul u yaabiltikubaʼob. ¿Baʼax jeʼel u yáantajeʼ? Le kéen tsikbalnakoʼobeʼ kʼaʼabéet u tʼaanoʼob tu jaajil u yóoloʼob, u tʼankubaʼob yéetel yaabilaj yéetel u paklan áantkubaʼob mantatsʼ. Jach junpuliʼ maʼ unaj u máansik tu tuukul u tusik u núup yéetel yaanaliʼ tumen jeʼel u beetik u sufrir u núupeʼ yéetel ku pʼáatal minaʼan confianza ichiloʼob (Hebreos 13:4).
Taatatsileʼex, kaʼans a paalaleʼex
«Kaʼans le [paal] utiaʼal u bin teʼ bej tuʼux unaj u binoʼ, beyoʼ tak ken chʼíijkeʼ maʼ ken u pʼat le bejoʼ» (PROVERBIOS 22:6).
Dioseʼ tsʼoʼok u yaʼalik tiʼ le taatatsiloʼob ka u kaʼans u paalaloʼoboʼ. Le taatatsiloʼoboʼ unaj u tsʼáaikoʼob junpʼéel maʼalob ejemplo tiʼ u paalaloʼob, beyoʼ le paalaloʼoboʼ yaan u yuʼubikoʼob tʼaan yéetel yaan u kankoʼob u yeʼesoʼob maʼalob modos (Deuteronomio 6:6, 7). Wa yaan hora maʼ tu yuʼubik tʼaan le paalaloʼoboʼ le taatatsiloʼoboʼ maʼ unaj u maltratartik u paalaloʼobiʼ. Baʼaxeʼ le taatatsiloʼoboʼ kʼaʼabéet u yuʼubikoʼob baʼax ku yaʼalaʼaltiʼob, chéen baʼaleʼ maʼ unaj u séeb tʼaanoʼobiʼ mix unaj u séeb pʼuʼujuloʼobiʼ (Santiago 1:19). Wa le taatatsiloʼob ku chʼaʼtuklikoʼob u castigartik u paalaloʼoboʼ unaj u beetkoʼob tumen u yaabiltmoʼob maʼ tumen pʼujaʼanoʼobiʼ.
Paalaleʼex, uʼuyeʼex u tʼaan a taataʼex
«Paalaleʼex, uʼuyeʼex u tʼaan a taataʼex [...]. ‹Respetart a papá yéetel a maama›» (EFESIOS 6:1, 2).
Le paalaloʼoboʼ kʼaʼabéet u yuʼubikoʼob u tʼaan u taataʼob yéetel u respetarkoʼob, kéen u beetoʼob beyoʼ ku yantal kiʼimak óolal ichil le familiaoʼ. Tsʼoʼoleʼ kex tsʼoʼok u nojochtaloʼobeʼ kʼaʼabéet u seguer u respetarkoʼob u taataʼob, u yilkoʼob wa yaan baʼax kʼaʼabéet u yutskíintaʼal teʼ naj tuʼux kajaʼanoʼoboʼ yéetel u yilkoʼob wa yaantiʼob tuláakal le baʼax kʼaʼabéettiʼoboʼ (1 Timoteo 5:3, 4).
Maʼ xaaneʼ jeʼel u yutstal xan ta wicheʼ
JEʼEL U YANTAL KIʼIMAK ÓOLAL ICHIL A FAMILIAEʼ
Kaxteʼex u yáantaj Dios utiaʼal u yantalteʼex kiʼimak óolal
Kaʼapʼéel baʼal jeʼel u yáantkech utiaʼal u yantaltech kiʼimak óolal yéetel a núupeʼ.
LE MÁAX KU KANANOʼ
¿Bix juntúul maʼalob íichamtsil?
Le maʼalob atantsiloʼ maʼ chéen ku bisik taakʼin tu yotoch, baʼaxeʼ yaan uláakʼ baʼax kʼaʼanaʼan ku beetik.
BAʼALOʼOB KU NÚUKAʼAL TEʼ BIBLIAOʼ
¿Ku yaʼalik wa Dios ka k-kanáant k-taataʼob tsʼoʼok u chʼíijloʼoboʼ?
Le Bibliaoʼ ku yaʼalik baʼax tu beetaj jujuntúul máaxoʼob meyajt Dios úuchjeakil utiaʼal u kanáantik u taataʼob. Ku yaʼalik xan bix jeʼel k-beetik toʼoneʼ.
