Le Yáax Nojoch Baʼateltáambaloʼ tsʼoʼok 11 tiʼ noviembre tiʼ 1918. Kʼaʼal le negocioʼoboʼ, yéetel óokʼotnaj le máakoʼob teʼ bejoʼoboʼ. Baʼaleʼ maʼ xáanchaj kiʼimak u yóoloʼobiʼ. Junpʼéel baʼal maas kʼaas kaʼach ku taal u kʼiin.

Tu mesil junio tiʼ 1918, tsaʼay junpʼéel kʼaakʼas seʼen tiʼ le soldadoʼob yanoʼob Franciaoʼ. Le seʼenaʼ séeb úuchik u kíimsik yaʼab máakoʼob. Kʼuch kʼaj óoltbil gripe española. Maas yaʼab soldadoʼob estados unidosil kíimoʼob Francia yoʼolal le kʼojaʼaniloʼ ke yoʼolal le baʼateltáambaloʼ. Tsʼoʼoleʼ le ka suunaj le soldadoʼob teʼ jejeláas luʼumoʼob tuʼux u taaloʼoboʼ tu kʼiʼitbesoʼob le kʼojaʼanil tiʼ tuláakal yóokʼol kaaboʼ.

Ka tsʼoʼok le baʼateltáambaloʼ, jach yaʼab wiʼijil yéetel óotsilil káaj u yilaʼal. Káaj u kíimil yéetel wiʼijil yaʼab máakoʼob teʼ Europaoʼ. Tu jaʼabil 1923, le taakʼin ku meyaj kaʼach tiʼ le alemanoʼoboʼ jach éem u tojol. Seis jaʼab tiʼ leloʼ, jach óotsilchaj yóokʼol kaab. Tu jaʼabil 1939, káaj le Kaʼapʼéel Nojoch Baʼateltáambaloʼ. Jeʼel u páajtal u yaʼalaʼaleʼ bey letiʼe yáax baʼateltáambal seguernajoʼ. ¿Máax jach tu jaajil beet u yúuchul le yaayaj baʼaloʼobaʼ?

Le profecíaʼob yaan teʼ Bibliaoʼ ku yáantkoʼon k-il baʼaxten úuch jujunpʼéel baʼaloʼob, maases le Yáax Nojoch Baʼateltáambaloʼ. Jesucristoeʼ u yaʼalmiliʼ yaan u kʼuchul u kʼiinil ‹u líikʼil junpʼéel kaaj tu contra uláakʼ kaaj›, u yantal wiʼijil yéetel u yantal pakʼbeʼen kʼojaʼaniloʼob tiʼ tuláakal yóokʼol kaab (Mateo 24:3, 7; Lucas 21:10, 11). Tu yaʼaleʼ le baʼaloʼobaʼ u chíikulal tiaʼanoʼon tu tsʼook kʼiinoʼobeʼ. U libroil Apocalipsiseʼ ku tsolikeʼ le baʼaloʼob ku  sen muʼyajtaʼal bejlaʼeʼ ku yúuchloʼob yoʼolal junpʼéel baʼateʼel anchaj teʼ kaʼanoʼ. (Ilawil le cuadro  «Baʼateltáambal way Luʼumeʼ bey xan teʼ kaʼanoʼ».)

Teʼ Apocalipsisoʼ ku yúuchul tʼaan tiʼ kantúul tsíiminoʼob. Óoxtúuleʼ ku chíikbeskoʼob le muʼyajiloʼob u yaʼalmiliʼ Jesusoʼ: baʼateltáambal, wiʼijil yéetel pakʼbeʼen kʼojaʼaniloʼob. (Ilawil le cuadro  «¿Tu jaajil wa táan u yáalkab u kantúul tsíiminiloʼob Apocalipsis?».) Jeʼex tsʼoʼok k-ilkoʼ le Yáax Nojoch Baʼateltáambaloʼ tu taasaj muʼyajiloʼob tak bejlaʼa maʼ xuʼulukeʼ. Le Bibliaoʼ ku yaʼalikeʼ letiʼe Kʼaasilbaʼal káajs le baʼaloʼobaʼ (1 Juan 5:19). ¿Jeʼel wa u páajtal u jeʼelsaʼal le baʼax tu káajsoʼ?

U libroil Apocalipsiseʼ ku yaʼalikeʼ «chéen junpʼíit kʼiin pʼaatal» tiʼ Kʼaasilbaʼal (Apocalipsis 12:12). Le oʼolal jach pʼujaʼan yéetel táan u beetik u muʼyaj u máakiloʼob le yóokʼol kaabaʼ. Baʼaleʼ jeʼex tsʼoʼok k-ilkoʼ, jach taʼaytak u luʼsaʼal u páajtalil.

Le Yáax Nojoch Baʼateltáambaloʼ tu kʼexaj le yóokʼol kaaboʼ. Tiʼ káaj u sen yantal baʼateltáambaloʼob  yéetel u sen líikʼil máak tu contra le gobiernoʼoboʼ. Lelaʼ ku yeʼesikeʼ Satanaseʼ jach tu jaajil tojolchʼintaʼab teʼ kaʼanoʼ ka puʼul way Luʼumeʼ (Apocalipsis 12:9). Le kʼasaʼan gobernante maʼ tu páajtal u yilaʼalaʼ u yojel jach nukaʼaj luʼsbil le páajtalil yaantiʼoʼ. Bey kun xuʼulul tuláakal le muʼyajil káaj yéetel le Yáax Nojoch Baʼateltáambaloʼ.

Le profecíaʼob yanoʼob teʼ Bibliaoʼ ku yeʼesiktoʼoneʼ jeʼel u páajtal k-creertikeʼ Jesucristo, le k-Rey yaan teʼ kaʼanoʼ, maʼ kun xáantaleʼ yaan «u kʼaskúuntik u meyaj le Kʼaasilbaʼaloʼ» (1 Juan 3:8). U millonesil máakoʼobeʼ ku kʼáat óoltikoʼob ka taalak u Reino Dios. Techeʼ ¿bey wa a beetik xanoʼ? Chéen yoʼolal le Reinoaʼ le utsul máakoʼoboʼ yaan u yilkoʼob bix kun béeytal baʼax u kʼáat Dios way Luʼumeʼ, maʼ le baʼax u kʼáat le Kʼaasilbaʼaloʼ (Mateo 6:9, 10). Yáanal u Reino Dioseʼ mix bikʼin kun kaʼa antal baʼateltáambaloʼobiʼ (Salmo 46:9). Kan u maasil yoʼolal le Reinooʼ utiaʼal a wilik le kʼiin ken yanak jeetsʼelil tuláakal yóokʼol kaaboʼ (Isaías 9:6, 7).