Ken a wuʼuy le noticiaʼoboʼ, maʼ xaaneʼ ka wuʼuyik yaan baʼaloʼob kʼaastak ku beetik le religionoʼoboʼ. U jaajileʼ maʼ tuláakal le religionoʼob ku taaloʼob tiʼ Diosoʼ (Mateo 7:15). Baʼaleʼ óoliʼ mix máak u yojel. (Xok 1 Juan 5:19.)

Baʼaleʼ Dioseʼ u yojel yaan máaxoʼob uts tu tʼaan u beetkoʼob baʼax uts yéetel u kʼáat u yojéeltoʼob u jaajil (Juan 4:23). Dioseʼ ku invitartikoʼob ka u kaxtoʼob u jaajil teʼ Bibliaoʼ. (Xok 1 Timoteo 2:3-5.)

Yaʼab máakoʼob jejeláas u religionoʼob kaʼacheʼ bejlaʼeʼ táan u muʼuchʼloʼob tumen Jéeoba ikil u kaʼansaʼaltiʼob u jaajil yéetel ikil u kaʼansaʼaltiʼob ka u yaabiltubaʼob tu baatsiloʼob (Miqueas 4:2, 3). Le oʼolaleʼ jeʼel u páajtal a kʼaj óoltik máaxoʼob yanoʼob ichil u jaajil religión ken a wil bix u biskubaʼobeʼ. (Xok Juan 13:35.)

Letiʼobeʼ ku creertikoʼob le Bibliaoʼ yéetel ku beetkoʼob baʼax ku kankoʼobiʼ (2 Timoteo 3:16). Ku yeʼeskoʼob tsiikil tiʼ u kʼaabaʼ Dios (Salmo 83:18). Tsʼoʼoleʼ ku kʼaʼaytikoʼobeʼ chéen u Reino Dios kun utskíintik tuláakal baʼal way Luʼumeʼ (Daniel 2:44). Jeʼex Jesuseʼ, ku chaʼikoʼob ‹u juul u sáasiloʼob›, tumen ku beetkoʼob uts tiʼ u yéet máakiloʼob (Mateo 5:16). Le jaajil cristianoʼoboʼ séeb u kʼaj óoltaʼaloʼob, tumen ku xíimbaltik u vecinoʼob utiaʼal u tsikbaltiktiʼob u maʼalob péektsilil u Reino Dios. (Xok Mateo 24:14; Baʼaxoʼob 5:42; 20:20.)