Le Bibliaoʼ ku yaʼalik: «Le máaxoʼob kuxaʼanoʼoboʼ u yojloʼob yaan u kíimloʼob, pero le kimenoʼoboʼ maʼ u yojloʼob mix baʼaliʼ» (Eclesiastés 9:5; Salmo 146:4). Jeʼex k-ilkoʼ kéen kíimik máakeʼ ku xuʼulul u kuxtal. Maʼ tu páajtal u yuʼubik mix baʼal, mix u tuukul mix u beetik mix baʼal tiʼ máak.

«Teʼ luʼum bíin suunakechoʼ»

 Dioseʼ tu tsolaj tiʼ le yáax wíinik baʼax kun úuchultiʼ kéen kíimkoʼ. Tumen Adán maʼ tu yuʼubaj tʼaaneʼ Dioseʼ tu yaʼalajtiʼ: «Tumen luʼumech yéetel teʼ luʼum bíin suunakechoʼ» (Génesis 3:19). Adáneʼ yéetel luʼum beetaʼabik tumen Dios (Génesis 2:7). Ka kíimeʼ suunaj teʼ luʼum tuʼux chʼaʼaboʼ, jach junpuliʼ xuʼul u kuxtal.

 Láayliʼ bey u yúuchul teʼ kʼiinoʼobaʼ. Le Bibliaoʼ ku yaʼalik baʼax ku yúuchul tiʼ máak bey xan tiʼ baʼalcheʼ kéen kíimik: «Tuláakloʼob tiʼ luʼum u taaloʼob, yéetel tuláakloʼob ku kaʼa suutoʼob luʼumil» (Eclesiastés 3:19, 20).

¿Bey wa kun tsʼoʼokol tiʼ máakoʼ?

 Le Bibliaoʼ ku yaʼalikeʼ kéen kíimik máakeʼ bey chéen táan u weenleʼ (Salmo 13:3; Juan 11:11-14; Hechos 7:60). Máax jach tʼuubul u weenleʼ maʼ u yojel baʼax ku yúuchliʼ. Bey túun xanoʼ le kimenoʼoboʼ maʼ u yojloʼob baʼax ku yúuchul way yóokʼol kaabeʼ. Chéen baʼaleʼ le Bibliaoʼ ku yaʼalikeʼ Dioseʼ jeʼel u páajtal u kaʼa kuxkíintikoʼobeʼ (Job 14:13-15). Jeʼex túun k-ilkoʼ maʼ bey kun tsʼoʼokol tiʼ máakoʼ tumen Dioseʼ yaan máaxoʼob ken u kaʼa kuxkíinte.