«Dioseʼ tu yaʼalaj xan: ‹Koʼox beetik le máak jeʼex toʼoneʼ, utiaʼal ka pʼáatak chíikaʼan tiʼ toʼon. Ka yanak tuláakal le luʼum tu yáanal u páajtaliloʼ, bey xan le kayoʼob yanoʼob teʼ kʼáaʼnáaboʼ, le baʼalcheʼob ku xikʼnaloʼoboʼ, tuláakal baʼalcheʼ ku yalakʼtaʼal bey xan tuláakal baʼalcheʼ ku jíiltikuba›» (Génesis 1:26, Túumben Luʼum).

 «Ka tu yaʼalaj [Dios]: ‹Bejlaʼeʼ koʼox beetik wíinik. Bíin béeyak jeʼel bixoʼoneʼ, utiaʼal u yantal páajtalil tiʼ tu yóokʼol kayoʼob, chʼíichʼoʼob, alakʼtbil baʼalcheʼob, kʼáaxil baʼalcheʼob, yéetel yóokʼol le ku jíiltikubaʼob luʼumoʼ›» (Génesis 1:26, Quiliʼich Biblia ich Maya).

 Dioseʼ tu beetaj wíinik jeʼel bix letiʼeʼ. Leloʼ u kʼáat u yaʼaleʼ wíinikeʼ ku páajtal u yantaltiʼ yéetel u yeʼesik le jatsʼuts modos yaan tiʼ Diosoʼ, jeʼex le yaabilajoʼ, u naʼatik bix u yuʼubikuba u maasil yéetel u beetik baʼax toj.

 «Dioseʼ tu yaʼalaj xan: ‹Koʼox beetik le máak jeʼex toʼoneʼ›». Antes tiʼ u beetik u maasil baʼaloʼobeʼ Jéeobaeʼ a tu beetaj Jesús, letiʼeʼ juntúul ángel jach yaan u poder. Jesúseʼ tu yáantaj Dios utiaʼal u beetik «le uláakʼ baʼaloʼob yanoʼob teʼ kaʼanoʼ bey xan le yanoʼob way luʼumeʼ» (Colosenses 1:16). Letiʼeʼ ku yeʼesik le modos yaan tiʼ Jéeobaoʼ, le oʼolal jeʼel u páajtal u yaʼalaʼaleʼ «ku jach eʼesik bix le Dios maʼ tu páajtal u yilaʼaloʼ» (Colosenses 1:15). Le oʼolal Dioseʼ páajchaj u yaʼalik tiʼ Jesús: «Koʼox beetik le máak jeʼex toʼoneʼ».

 «Ka yanak tuláakal le luʼum tu yáanal u páajtaliloʼ, bey xan [...] tuláakal baʼalcheʼ ku yalakʼtaʼal». Le baʼalcheʼoboʼ maʼ beetaʼaboʼob jeʼex wíinikeʼ. Le oʼolal minaʼantiʼob junpʼéel conciencia yéetel maʼ tu páajtal u yeʼeskoʼob u jatsʼuts modos Dios jeʼex le yaabilajoʼ. Chéen baʼaleʼ leloʼ maʼ u kʼáat u yaʼal wa maʼ tu kanáantaʼaloʼob tumen Diosiʼ. Letiʼeʼ tu yaʼaleʼ le baʼalcheʼoboʼ yaan u yantaloʼob «yáanal u páajtalil» wíinik. Yéetel le baʼax tu yaʼaloʼ Jéeobaeʼ tu yeʼeseʼ tiʼ wíinik u tsʼaamaj u responsabilidadil u kanáantik le baʼalcheʼoboʼ (Salmo 8:6-8; Proverbios 12:10). Letiʼeʼ u kʼáat ka k-kanáant le Luʼumoʼ bey xan tuláakal le uláakʼ baʼaxoʼob u beetmoʼ.

 U yáax kaʼapʼéel capítuloil Génesiseʼ ku yaʼalikoʼob bix beetaʼabik le universooʼ, le Luʼumoʼ bey xan tuláakal baʼal kuxaʼan. Tuláakal baʼax u beetmaj Jéeobaeʼ jach jatsʼuts yéetel ku beetik u jaʼakʼal k-óol, pero le baʼax maas maʼalob u beetmaj way yóokʼol kaabeʼ letiʼe wíinikoʼ. Le Bibliaoʼ ku yaʼalikeʼ ka tsʼoʼokeʼ Dioseʼ «tu yilaj tuláakal baʼax tsʼoʼok u beetik, ka tu yileʼ jach táaj maʼalob» (Génesis 1:31).

 Wa a kʼáat a wojel uláakʼ baʼax ku yaʼalik u libroil Génesis yoʼolal bix beetaʼabik tuláakal baʼaleʼ chaʼant le videoaʼ.

 Baʼax ku creertaʼal: Génesis 1:26, ku yeʼesikeʼ Jesúseʼ Dios.

 U jaajil: Dios yéetel Jesúseʼ jach maʼalob bix u biskubaʼob, bey jeʼex u biskuba juntúul taatatsil yéetel u hijoeʼ. Pero leloʼ maʼ u kʼáat u yaʼal wa juntúuliliʼobiʼ tumen Jesúseʼ tu kaʼanseʼ maʼ igual yéetel Diosiʼ (Juan 14:28). Wa taak a wojéeltik u maasil yoʼolal lelaʼ chaʼant le video ¿Jesucristoeʼ Dios wa? wa kaxt le xook «¿Baʼaxten ku yaʼalaʼaleʼ Jesúseʼ u hijo Dios?».

 Utiaʼal a wilik tiʼ uláakʼ baʼaxoʼob ku tʼaan u libroil Génesiseʼ chaʼant le videoaʼ.