«Kiʼimakchajak a wóoleʼex tu yoʼolal le esperanza yaanteʼexoʼ. Chúukpajak a wóoleʼex ken a máanseʼex muʼyajiloʼob. Maʼ u xuʼulul a orareʼex» (Romanos 12:12, Túumben Luʼum).

 «Kuxleneʼex yéetel kiʼimak óolal tu yoʼolal le alab óolal yaanteʼexoʼ; yanakteʼex chúukaʼan óolal ken muʼyajnakeʼex. Payalchiʼineneʼex mantatsʼ» (Romanos 12:12, Quiliʼich Biblia ich Maya; túumbenkuntaʼan u tsʼíibil).

 Teʼ versículoaʼ le apóstol Pablooʼ tu yaʼalaj óoxpʼéel baʼaloʼob jach jeʼel u yáantik kaʼach le cristianoʼob yanoʼob Roma utiaʼal ka chúukpajak u yóoloʼob le kéen chʼaʼpachtaʼakoʼob bey xan le kéen u aktáantoʼob uláakʼ problemaʼob.

 «Kiʼimakchajak a wóoleʼex tu yoʼolal le esperanza yaanteʼexoʼ». Le máaxoʼob meyajtik Diosoʼ yaantiʼob u esperanzail u kuxtaloʼob utiaʼal mantatsʼ, yanoʼobeʼ yaan u binoʼob kuxtal teʼ kaʼanoʼ pero u maas yaʼabileʼ yaan u kuxtal teʼ jatsʼuts Paraíso kun antal way Luʼumeʼ (Salmo 37:29; Juan 3:16; Apocalipsis 14:1-4; 21:3, 4). Ichil le esperanza yaantoʼonoʼ táakaʼan xan le u yilik máak bix ken u yutskíintil u Reino Dios a tuláakal le problemaʼob yaan tiʼ wíinikoʼ (Daniel 2:44; Mateo 6:10). Le máaxoʼob meyajtik Diosoʼ ku yilik u kiʼimaktal u yóoloʼob ken u máansoʼob problemas tumen u yojloʼobeʼ yaan u láaj cumplir le promesaʼob u beetmaj Diosoʼ. Tsʼoʼoleʼ u yojloʼob yaan u lúubloʼob utsil tiʼ Dios tu yoʼolal le chúukaʼan óolal ku yeʼeskoʼoboʼ (Mateo 5:11, 12; Romanos 5:3-5).

 «Chúukpajak a wóoleʼex ken a máanseʼex muʼyajiloʼob». Teʼ Bibliaoʼ le tʼaan «chúukpajak a wóoloʼ» ich griegoeʼ maases ku meyaj utiaʼal u yaʼalaʼal «maʼ u lukʼul máak tuʼux yaan», «maʼ u xúumpʼattik u beetik máak wa baʼax» wa «u tsʼáaik máak u yóol u beet wa baʼax». U discípuloʼob Jesúseʼ u yojloʼob ‹maʼ yóokʼol kaabiloʼobiʼ› b le oʼolal yaan kaʼach u chʼaʼpachtaʼaloʼob yéetel yaan u kʼaʼabéettal u yeʼeskoʼob chúukaʼan óolal (Juan 15:18-20; 2 Timoteo 3:12). Juntúul máax ku chúukpajal u yóol u meyajt Dios kex táan u máansik jejeláas pruebaʼob ichil u kuxtaleʼ yaan u maas muʼukʼaʼantal u fe yéetel Dioseʼ yaan u tsʼáaiktiʼ le baʼax u prometermoʼ (Mateo 24:13). U kʼaʼajsik máak lelaʼ yaan u yáantik utiaʼal ka chúukpajak u yóol tiʼ tuláakal baʼal bey xan utiaʼal ka u yeʼes paciencia yéetel kiʼimak óolal (Colosenses 1:11).

 «Maʼ u xuʼulul a orareʼex». Le máaxoʼob meyajtik Diosoʼ mantatsʼ ku kʼaʼajsaʼaltiʼob unaj u oraroʼob tumen chéen bey jeʼel u chúukpajal u yóoloʼoboʼ (Lucas 11:9; 18:1). Mantatsʼ xan unaj u suuktal u chʼaʼikoʼob en cuenta baʼax ku yaʼalik Dios (Colosenses 4:2; 1 Tesalonicenses 5:17). Tsʼoʼoleʼ jach ku confiaroʼob de ke yaan u núukaʼal u oraciónoʼob tumen táan u tsʼáaik u yóol u beetoʼob baʼax uts tu tʼaan Dios (1 Juan 3:22; 5:14). U yojloʼob xaneʼ wa mantatsʼ ku oraroʼobeʼ yaan u tsʼaʼabaltiʼob le muukʼ kʼaʼabéettiʼob kex jeʼel baʼalak ka úuchkeʼ (Filipenses 4:13).

 Pabloeʼ tu tsʼíibtaj le carta tiʼ le cristianoʼob yanoʼob Roma óoliʼ teʼ año 56 tsʼoʼokok u taal Jesúsoʼ. Teʼ capítulo 12 tiʼ le carta tu tsʼíibtoʼ tu tsʼáaj consejoʼob yoʼolal le bix jeʼel u yantal tiʼ máak le jatsʼuts modos ku taal tiʼ Diosoʼ, bix unaj u tratartaʼal le máaxoʼob yanoʼob teʼ múuchʼuliloʼ bey xan uláakʼ máakoʼoboʼ, tsʼoʼoleʼ tu yaʼalaj xan unaj k-eʼesik jeetsʼelil ken chʼaʼpachtaʼakoʼon (Romanos 12:9-21). Jach tu yorail ka kʼuch le consejo tiʼ le cristianoʼob yanoʼob Romaoʼ tumen jach taʼaytak kaʼach u káajal u chʼaʼpachtaʼaloʼob.

 Maʼ sen úuch tiʼ leloʼ, teʼ año 64, eel junpʼéel parte tiʼ u kaajil Roma. Ka túun káaj u juum u tsikbalil de ke letiʼe emperador Nerón beetoʼ. Según le baʼax tu yaʼalaj le historiador romano Tácitooʼ, le ka tu yuʼubaj Nerón baʼax ku tsikbaltaʼaleʼ tu culpartaj le cristianoʼoboʼ. Maʼ xaaneʼ lelaʼ le beet u sen chʼaʼpachtaʼal le máaxoʼob meyajtik Dios teʼ kʼiinoʼoboʼ. Le consejo tsʼaʼabtiʼob tumen Pablooʼ le áantoʼob utiaʼal ka u aguantartoʼob le baʼaxoʼob beetaʼabtiʼoboʼ. Leloʼ tu yeʼesaj jach yaan u fejoʼob (1 Tesalonicenses 5:15; 1 Pedro 3:9). Le máaxoʼob meyajtik Dios teʼ kʼiinoʼobaʼ jach maʼalob xan ka u beetoʼob beyoʼ.

 Utiaʼal a wilik tiʼ uláakʼ baʼaxoʼob ku tʼaan u Cartail Romanoseʼ chaʼant le videoaʼ.